Psixoloq: "Əgər min nəfər narkoman varsa, deməli, bu növbəti il 3 min olacaq"
"Əgər əvvəllər narkomanlar daha çox kişilər olurdusa, bu gün narkaman xanımlar da kifayət qədər çoxalıb"
Narkotik özü bir biznesdir. Gəlir baxımından dünyada öndəgedən biznes şəbəkəsi hesab edilir.
Biz filmlərə fikir versək görərik ki, burada narkomanlar daha uğurlu insanlar kimi tamaşaçıya təqdim edilir və daha zəngin bir insan obrazı yaradılır. Belə olanda isə bu gənclərin psixologiyasına birbaşa təsir göstərir".
Bu sözləri Ölkə.az-a psixoloq Elnur Rüstəmov ölkədəki narkomanların vəziyyətini şərh edərkən deyib.
"Digər bir tərəfdən narahat yaşayan gənclər, yeniyetmələr var ki, onlar öz narahatlıqlarını aradan qaldırmaq üçün narkotik maddələrdən istifadə edirlər.
Belə olan hallarda valideynlər diqqətli olmalıdır. Valideynlər övladları üzərində hökmranlığı itirdiyi anda uduzurlar. Övladının hər hansısa hərəkətindən şübhələnən valideyn, onu məcburi olaraq həkimə aparmağı bacarmırsa, demək valideyn artıq uduzmuş valideyndir.
Fikir verin, bizdə qız uşaqları özlərini anidən müxtəlif aparmağa başlayarlarsa, valideyn onu ginekoloqa heç vaxt apara bilməz. Eləcə də narkotik alüdəçisi olan gəncləri. Valideynlərin övladlarının qollarına, damarlarına baxıb özlərinin qərar verməsi yanlışdır. Axı heç bir valideyn mütəxəssis deyil. Ola bilər ki, gənc narkotik maddəni dilinin altına vurur.
Avropa ölkələrində narkomanları qeydiyyata alırlar və onlar istənilən vaxt narkotik alıb, istifadə edə bilərlər. Biz demirik ki, Azərbaycanda da bu praktika olsun, amma ən azından onların qeydiyyata alınması ilə ölkədə bu xəstəlikdən əziyyət çəkən insanların nə qədər olduğunu dəqiq bilmək olar.
Əgər 1000 nəfər narkoman varsa, demək növbəti il bu say 3000 olacaq. Onların hər biri ən azı 3 nəfəri buna cəlb edəcəklər. Bu artacaq. Narkoman üçün ondan başqa müqəddəs heç nə yoxdur. O, doğma qardaşını da bu işə cəlb edə bilər. Yetər ki, ona narkotik alsın. Bu bir bəladır və artan sürətdə də davam edəcək".
Qeyd edək ki, bu ilin I rübü ərzində Səhiyyə Nazirliyi Respublika Narkoloji Mərkəzində 1235 nəfər yeni qeydiyyata götürülüb, 955 nəfər isə qeydiyyatdan çıxarılıb.
Bununla da hazırda Səhiyyə Nazirliyi Respublika Narkoloji Mərkəzində qeydiyyatda olan narkomanların sayı 28 min 946 nəfərə çatıb.
Xatırladaq ki, ötən il qeydiyyata alınan narkomanların cəmi 554 nəfərini qadınlar təşkil edib.
Fatimə İbrahimova
Ölkə.az
