"Misir Mərdanovun qadınları direktor təyin etmək həvəsi çox idi"

"Çalışdığım vaxtda hiss edirdim ki, o, qadınlara böyük üstünlük verir"

"Qadın direktorlarının sayının çoxalması Misir Mərdanov təhsil naziri təyin olunandan başladı. Nədənsə Misir Mərdanovun qadınları direktor təyin etmək həvəsi çox idi. Bunun hansı səbəblərdən olduğunu bilməsəm də, ancaq çalışdığım vaxtda hiss edirdim ki, o, qadınlara böyük üstünlük verir".

Bu sözləri Ölkə.Az-a danışan təhsil eksperti Etibar Əliyev məktəblərdə qadın direktorların sayını şərh edərkən deyib.

"Mən belə hesab edirəm ki, məktəbin direktoru kişi olsa, daha yaxşıdır. Onsuz da müəllimlərin 80 faizini qadınlar təşkil edir. Bu nisbətdə də, əsasən, direktor vəzifəsini onlar tuturlar.
Bunun başqa səbəbləri də var. Maddi durumla bağlı bir neçə il bundan qabaq mərhələ-mərhələ kişilər kütləvi şəkildə məktəbləri tərk etdi. Bundan sonra isə məktəblərdə qadınların hökmranlığı yarandı. Ona görə də vəziyyət bu həddə gəlib çatıb.

Məktəblərdə qadın direktorların olması yumşaq atmosferin yaranmasına səbəb olur. Bütün bunlar isə tərbiyə təhsillə bağlı sərt qanunlar qoymağa mane olur".

Fatimə İbrahimova
Ölkə.az