Nəqliyyat vasitələrində jalüzlərdən istifadəyə icazə verildi

Bu gündən etibarən noyabr ayının 15-nə qədər nəqliyyat vasitələrində sənaye üsulu ilə hazırlanan jalüzlərin istifadəsinə icazə verilib.

Bu barədə Bakı Şəhər Dövlət Yol Polisi İdarəsinin (BŞDYPİ) İctimaiyyətlə əlaqələr şöbəsinin rəisi polkovnik Vaqif Əsədov məlumat verib.

Onun sözlərinə görə, avtomobildə əyləşən sərnişinləri günəş şüalarından qorumaq məqsədi ilə sənaye üsulu ilə hazırlanan jalüzlər avtomobilin arxa sağ və sol yan şüşələrində istifadə olunmalıdır: "Kustar üsulla hazırlanan pərdə və jalüzlərin istifadəsi isə qadağandır. Yol polisləri tərəfindən belə qayda pozuntuları aşkar edildiyi halda, həmin sürücülər İnzibati Xətalar Məcəlləsinin 155-ci (nəqliyyat vasitələrinin sürücüləri tərəfindən nəqliyyat vasitələrinin istismarı qaydalarının pozulması) maddəsinə əsasən 150 manat məbləğində cərimələnəcək".

Qeyd edək ki, mayın 1-dən etibarən avtomobillərdə quraşdırılan jalüzlərin standartlara uyğunluğuna nəzarət etmək məqsədi ilə BŞDYPİ-nin əməkdaşları reydlərə başlayıb./Report/

Ölkə.Az