Həftənin icmalı
Abdulla Gül Heydər Əliyev Mərkəzini ziyarət etdi
01.05.2015
Türkiyə Respublikasının 11-ci prezidenti Abdulla Gül mayın 1-də Heydər Əliyev Mərkəzini ziyarət edib.
Mərkəzdən verilən məlumata görə, qonaq əvvəlcə Mərkəzdəki Heydər Əliyev Muzeyi ilə tanış olub. O, Heydər Əliyevin həyat və fəaliyyətini, ölkə tarixində xidmətlərini, həyata keçirdiyi beynəlxalq miqyaslı layihələri özündə əks etdirən foto və videomateriallara, eksponatlara baxıb.
Abdulla Gül, həmçinin ölkənin tarixini və mədəni irsini əks etdirən “Azərbaycan inciləri: tarixin axarında”, “Mini Azərbaycan” sərgiləri, eləcə də Mərkəzin qeyri-adi gözəlliyə və akustikaya malik Auditorium zalında da olub. Abdulla Gül Mərkəzin xatirə kitabına ürək sözlərini yazıb.
Azərbaycanda yükdaşıma tarifləri azaldıldı
01.05.2015
Azərbaycanda dəmiryol nəqliyyatında yükdaşıma tarifləri azaldılıb.
“Azərbaycan Dəmir Yolları” QSC-nin mətbuat katibi Nadir Əzməmmədov bildirib ki, QSC yeni daşıma siyasətinin tətbiq edilməsinə start verir: “Ölkə rəhbərliyi və Nəqliyyat Nazirliyi tərəfindən dəmiryolçular qarşısında qoyulan ən mühüm tapşırıq yükdaşımaların, xüsusilə də tranzit yükdaşımaların həcminin artırılmasıdır. Buna isə daşımaların sürətinin artırılması, daşınan yüklərin təhlükəsizliyinin təmin edilməsi, çevik tarif siyasəti, irimiqyaslı logistika və marketinq işi ilə nail olmaq mümkündür. Tranzit yüklərin ölkə ərazisindən keçirilməsi əlavə valyuta resurslarının Azərbaycan iqtisadiyyatına cəlb olunması üçün çox əhəmiyyətlidir”.
İran səfiri Heydər məscidi ilə tanış olub
01.05.2015
Bu gün İran İslam Respublikasının Azərbaycandakı fövqəladə və səlahiyyətli səfiri Möhsün Pakayin Bakı şəhərinin Binəqədi rayonundakı Heydər məscidi ilə tanış olub.
Qafqaz Müsəlmanları İdarəsindən (QMİ) bildiriblər ki, Heydər məscid-kompleksinin sədri, QMİ-nin sədr müavini Sabir Həsənli iranlı diplomatı səmimiyyətlə qarşılayıb və məscidlə bağlı ətraflı məlumat verib.
S.Həsənli bildirib ki, milli-mənəvi irsə böyük diqqət və qayğı ilə yanaşan dövlət başçısının tövsiyəsi ilə inşa olunan bu yeni məscid 12 min kvadratmetr sahədə salınıb. Məscidin fasadı Şirvan-Abşeron memarlıq üslubunda xüsusi daşlarla üzlənib, ornamentlərin zənginliyi fasadda xüsusi arxitektura harmoniyası yaradıb. Burada 95 metr hündürlüyündə 4 minarə inşa olunub, məscidin daxilində xüsusi bəzək elementlərindən istifadə olunub, günbəzin kənarlarına Quran ayələri yazılıb. 55 metr hündürlüyündə olan baş günbəz, o cümlədən hündürlüyü 35 metr olan ikinci günbəz məscidin daxilinə xüsusi gözəllik verir. Qonağın diqqətinə çatdırılıb ki, ümumi sahəsi 20 hektar olan məscid-kompleksin ətrafında abadlaşdırma işləri aparılıb.
İlham Əliyev ehtiyat fondundan 3 milyon ayırdı
01.05.2015
Azərbaycan Prezidenti İlham Əliyev Saatlı rayonunun Saatlı-Sarıcalar-Qara Nuru-Şirinbəyli-Fətəlikənd-Azadkənd avtomobil yolunun tikintisi ilə bağlı tədbirlər haqqında sərəncam imzalayıb.
Ölkə.Az "AzərTac"a istinadən xəbər verir ki, sərəncamda aşağıdakı göstərişlər verilib:
“1. Əlli bir min nəfər əhalinin yaşadığı 19 yaşayış məntəqəsini birləşdirən Saatlı-Sarıcalar-Qara Nuru-Şirinbəyli-Fətəlikənd-Azadkənd avtomobil yolunun tikintisi məqsədi ilə Azərbaycan Respublikasının 2015-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Saatlı Rayon İcra Hakimiyyətinə ilkin olaraq 3,0 (üç) milyon manat ayrılsın.
2. Azərbaycan Respublikasının Maliyyə Nazirliyi bu Sərəncamın 1-ci hissəsində nəzərdə tutulan məbləğdə maliyyələşməni müəyyən olunmuş qaydada təmin etsin”.
İyunun 1-dən 30-dək bu avtomobillər Bakıya buraxılmayacaq — BDYPİ
01.05.2015
İdarə Azərbaycanda yükdaşıma fəaliyyəti ilə məşğul olan hüquqi və fiziki şəxslərə müraciət edib.
Baş Dövlət Yol Polisi İdarəsi (BDYPİ) sürücülərə müraciət edib.
Ölkə.Az-ın BDYPİ-nin saytına istinadən verdiyi məlumata görə, Azərbaycan Respublikası Daxili İşlər Nazirliyinin Baş Dövlət Yol Polisi İdarəsi yükdaşıma fəaliyyəti ilə məşğul olan hüquqi və fiziki şəxslərdən xahiş edir ki, Bakıda keçiriləcək 1-ci Avropa Oyunları ilə əlaqədar bu il iyun ayının 1-dən 30-dək yarış iştirakçılarının, azarkeşlərin və ölkəmizə gələn çoxsaylı qonaqların təhlükəsiz və sərbəst hərəkətlərinin təşkili ilə əlaqədar paytaxtın mərkəzi küçə və prospektlərində nəqliyyat sıxlığının azaldılması məqsədilə qeyd olunan müddət ərzində müxtəlif təyinatlı yük avtomobillərinin Bakı şəhərinə buraxılmayacağını iş planlarında nəzərə alsın.
Etibarnamə ilə maşın alanlara — Xəbərdarlıq
30.04.2015
Vətəndaşların çoxu maşın alarkən onu öz adına keçirmək yerinə etibarnamə ilə əldə etməyə üstünlük verir. Bu vəziyyət isə üzərindən illər keçməsinə baxmayaraq ciddi problemlərə, hətta avtomobilin itirilməsinə səbəb ola bilər.
Səbəb bunun daha asan və ucuz başa gəlməsidir. Alıcı elə düşünür ki etibarnaməni və texniki pasportu alıbsa, artıq avtomobil ona məxsusdur. Amma bu avtomobilin hüquqi olaraq satılması demək deyil.
Məsələn avtomobilin hüquqi sahibinin hər hansı bir hüquqi müstəvidə maddi öhdəliyi yaranarsa məhkəmə qaydasında həmin avtomobil müsadirə oluna bilər. Bu zaman əsas ziyan onu alan ikinci şəxsə dəyir.
Ziya Məmmədov vətəndaşları qəbul etdi
30.04.2015
Aprelin 30-da nəqliyyat naziri Ziya Məmmədov Yardımlı şəhərindəki Heydər Əliyev Mərkəzində Masallı, Yardımlı və Cəlilabad rayonlarından olan vətəndaşları qəbul edərək, onların şikayət və təkliflərini dinləyib.
Ölkə.Az AzərTA-c-a istinadla xəbər verir ki, əvvəlcə nazir Ziya Məmmədov ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad edib, Ulu Öndərin adını daşıyan Mərkəzdə böyük rəhbərin zəngin və mənalı ömür yolunu əks etdirən eksponatlar və fotoşəkillərlə tanış olub, şəhər sakinləri ilə görüşüb.
Vətəndaşların qəbulunda “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanov, “Azəryolsevis” Açıq Səhmdar Cəmiyyətinin sədr vəzifəsini müvəqqəti icra edən Saleh Məmmədov, Dövlət Avtomobil Nəqliyyatı Xidmətinin rəisi Hüseyn Salamov iştirak ediblər.
Azərbaycan Nepaldan Gürcüstan vətəndaşlarını da təxliyyə edəcək
30.04.2015
Nepalda - təbii fəlakət zonasında olan azərbaycanlıları təxliyyə edəcək Azərbaycan təyyarəsi Gürcüstan vətəndaşlarını da Bakıya gətirəcək.
Bu barədə hazırda Nepalda olan azərbaycanlılardan biri məlumat verib. “Azərbaycan Fövqəladə Hallar Nazirliyinin təyyarəsi azərbaycanlılarla yanaşı, Gürcüstan vətəndaşlarını da təxliyyə edəcək”, - o, bildirib.
Qeyd edək ki, Prezident İlham Əliyevin göstərişinə əsasən aprelin 29-da Azərbaycan hökuməti adından Fövqəladə Hallar Nazirliyi (FHN) Nepal Federativ Demokratik Respublikasının ərazisində baş vermiş güclü zəlzələ ilə əlaqədar bu ölkəyə humanitar yardım yola salıb. FHN-ə məxsus “BE-200ÇS” tipli təyyarə ilə yola salınan humanitar yardıma 1 tona yaxın müxtəlif dərman və tibbi ləvazimatlar, xeyli sayda çadır, ədyal və qablaşdırılmış içməli su daxildir.
"Torqovı"dan insan sümükləri tapıldı
30.04.2015
Əraziyə ilk olaraq polis əməkdaşları gəldi.
Bəzi qurumlar vaxtlı-vaxtında təmir işləri apararaq işlərini möhkəm tutmağa üstünlük verir. Paytaxtın mərkəzində aparılan növbəti belə təmir işləri zamani fəhlələr bir müddətlik əl saxlamalı olublar. Səbəb isə aşkar edilən tapıntı olub.
Ölkə.Az xəbər verir ki, Ans tv-nin məlumatına görə, Bakının Səbail rayonu Nizami küçəsində (Torqovıy) su xətinin təmir işləri zamanı qəribə bir tapıntıya rast gəlinib.
Belə ki, işlərin qızğın çağında tapılan bir neçə sümük fəhlələri şoka salıb. Həmin sümüklərin isə insana məxsus olduğu ehtimal edilir. Sakinlər bildirir ki, bu tapıntını ilk olaraq onlar müşahidə edib.
Neft Akademiyasında törədilən terrordan 6 il ötür
30.04.2015
Bu gün Azərbaycan Dövlət Neft Akademiyasında (ADNA) törədilən terror hadisəsindən 6 il ötür.
2009-cu il aprelin 30-da səhər saatlarında ADNA-nın Bakı şəhəri Dilarə Əliyeva küçəsi, 227 ünvanında yerləşən ikinci korpusuna daxil olan Gürcüstan vətəndaşı, 1980-ci il təvəllüdlü Fərda Qədirov binanın birinci mərtəbəsindən altıncı mərtəbəsinədək qarşısına çıxan şəxslərə “Makarov” tipli tapançadan atəş açıb. Qədirov hadisə zamanı 12 nəfəri öldürüb, 13 nəfəri yaralayıb. Sonra özünü də öldürüb.
Qeyd edək ki, faktla bağlı Cinayət Məcəlləsinin terrorçuluq, qəsdən adam öldürmə, qaçaqmalçılıq, qanunsuz olaraq odlu silah, döyüş sursatı əldəetmə, saxlama, daşıma və gəzdirmə və qanunsuz olaraq narkotik vasitələri əldəetmə, saxlama və daşıma maddələri ilə cinayət işi açılıb.
İlham Əliyev Bakıda yeni mərkəzin açılışını etdi
29.04.2015
Aprelin 29-da Bakı Konqres Mərkəzinin açılışı olub.
Azərbaycan Prezidenti İlham Əliyev, xanımı Mehriban Əliyeva və qızı Arzu Əliyeva açılışda iştirak ediblər.
Maliyyə naziri Samir Şərifov Mərkəzdə görülən işlər barədə dövlət başçısına məlumat verib.
Prezident Bakı Konqres Mərkəzinin rəmzi açılışını bildirən lenti kəsib.
Binanın foyesində 405 kvadratmetrlik monitor quraşdırılıb. Bu, dünyada qapalı məkanda quraşdırılan ən böyük və ən çox pikselli monitordur. Ümumilikdə isə binada müxtəlif ölçülü 50-dən artıq monitor quraşdırılıb. Mərkəzdə 17 konfrans zalı yaradılıb. Onların ümumi tutumu 2500 nəfərdən çoxdur. Konfrans zallarında yaradılan şərait onların tutumunu tədbirə qatılan qonaqların sayına uyğun olaraq dəyişdirməyə imkan verir.
İlham Əliyev yeni elektron informasiya sistemi yaratdı
29.04.2015
Azərbaycan prezidenti İlham Əliyev yerli icra hakimiyyəti orqanlarında vətəndaşların müraciətləri üzrə vahid elektron informasiya sisteminin yaradılması haqqında fərman imzalayıb.
Ölkə.Az prezidentin rəsmi saytına istinadla xəbər verir ki, sənədə əsasən yerli icra hakimiyyəti orqanlarında vətəndaşların müraciətləri üzrə vahid elektron informasiya sistemi yaradılır, “Yerli icra hakimiyyəti orqanlarında vətəndaşların müraciətləri üzrə vahid elektron informasiya sistemindən istifadə Qaydaları” təsdiq edilir.
Avropa İttifaqı Azərbaycan vətəndaşları üçün yeni viza qaydalarını tətbiq edir
29.04.2015
2015-ci il iyunun 23-dən Avropa İttifaqı Azərbaycan, Ermənistan, Belarus, Gürcüstan, Moldova və Ukrayna vətəndaşları üçün yeni viza qaydalarını tətbiq edəcək.
Ölkə.Az-ın Apa-ya istinadən verdiyi məlumata görə, bundan sonra viza almaq üçün vətəndaşlardan barmaq izləri və rəqəmsal fotoşəkil tələb olunacaq.
Avropa İttifaqının fəaliyyətə başlayacağı Viza İnformasiya Sistemi (VIS) Şengen ölkələrində qısamüddətli vizalar haqqında məlumatların mübadiləsini nəzərdə tutan mərkəzləşdirilmiş məlumat bazasıdır. Bazada saxlanılan biometrik məlumatlar 59 ay ərzində saxlanılacaq.
Barmaq izləri konsulluqlarda götürüləcək.
Azərbaycan elmi dilindəki terminlərin terminoloji bazası yaradılır
29.04.2015
Azərbaycan Milli Elmlər Akademiyası (AMEA) Azərbaycan elmi dilindəki terminlərin daha düzgün işlədilməsi üçün terminoloji baza yaratmağı planlaşdırır.
Bunu bu gün keçirilən AMEA-nın ümumi yığıncağında çıxış edən Akademiyanın akademik-katibi Rasim Әliquliyev deyib. Onun sözlərinə görə, bu baza həm də elmi dilimizin inkişafina səbəb olacaq.
R.Әliquliyev bildirib ki, virtual məkandan son vaxtlar dilimizə daxil olan çoxlu sayda sözləri azərbaycanlaşdırmaq lazımdır.
AMEA Dilçilik İnstitutunun direktoru Tofiq Haçıyev isə bildirib ki, əvvəllər dissertasiyalar Azərbaycan dilindən daha çox rus dilində yazılırdı, indi isə istedadlı alimlər dissertasiyalarını ingilis dilində yazırlar. T.Hacıyev təklif edib ki, alim olmaq istəyən alimlər müdafiə üçün ingilis dilində yazdıqları elmi əsərləri Azərbaycan dilinə də tərçümə etsinlər.
Cavid Qurbanov Bakı sərnişin stansiyasında aparılan təmir işləri ilə tanış olub
29.04.2015
“Azərbaycan Dəmir Yolları” QSC-nin sədri Cavid Qurbanov Bakı sərnişin stansiyasında və stansiya yollarında aparılan əsaslı təmir işlərinin gedişi ilə tanış olub.
“Azərbaycan Dəmir Yolları” QSC-nin mətbuat katibliyindən Ölkə.Az-a verilən məlumata görə, paytaxtımızın giriş qapısı sayılan Bakı sərnişin vağzalının yüksək səviyyədə, müasir dövrün tələblərinə cavab verməsi üçün burada yenidənqurma işlərinin görülməsinə ehtiyac yaranıb. Bu məqsədlə cari ilin mart ayında Bakı sərnişin vağzalında yenidənqurma işlərinə start verilib.
Təmir işləri uğurla davam edir. Vağzalın əsas binasının fasadı, memarlıq üslubunun saxlanması şərtilə, yenidən qurulacaq, vağzal binasının daxilində tam yenidənqurma işləri görüləcək. Bilet kassaları, saxlama kameraları, sərnişin platformaları müasir üslubda əsaslı təmir olunacaq, eskalatorlar yenisi ilə əvəzlənəcək.
Sonra C.Qurbanov stansiya yollarında aparılan əsaslı təmir işlərinin gedişini izləmiş, müvafiq tapşırıq və tövsiyələrini verib.
Bakıda kirayə evlər ucuzlaşıb
29.04.2015
Bu ilin mart ayı Bakı şəhərinin kirayə mənzil bazarında aktivlik səviyyəsinin nisbətən aşağı düşməsi, ümumilikdə isə kirayə mənzil qiymətlərinin enməsi ilə yadda qalıb.
MBA konsaltinq şirkətinin monitorinq qrupunun aylıq hesabatına görə, manat ilə ifadədə qiymət 665 manat/mənzil səviyyəsindən 4% azalaraq 639 manat/mənzil təşkil edib. Baş verən devalvasiya səbəbindən isə ABŞ valyutasında mənzilin orta kirayə haqqı 28% azalaraq 848 dollardan 609 dollara düşüb.
Bazarda əməliyyatların sayı isə 112-dən 5% azalaraq 106 ədəd təşkil edib. Hər 1 kv.m-ə görə isə kirayə haqqı manatla 5% artaraq 8,8 manat/kv.m-dən 9,3 manat/kv.m-ə yüksəlib, dollarda isə 21,53% azalaraq 11.24 dollar/kv.m-dən 8,82 dollar/kv.m-ə düşüb. Kirayə mənzil bazarında mart ayında bazara təklif edilən mənzillərin orta otaq və orta sahə göstəriciləri azaldığı halda, qiymətlərin manatla ifadədə nisbətən qalxması fevral ayında baş verən məzənnə dəyişməsi ilə izah edilir.
“Neftin qiymətlərinin azaldığı dövrdə...” — İlham Əliyev
28.04.2015
“Azərbaycan iqtisadiyyatı neftin qiymətləri azaldıqdan sonra da güclü olaraq qalır”.
Bunu Prezident İlham Əliyev aprelin 28-də Bakıda III Qlobal Açıq Cəmiyyətlər Forumunın açılış mərasimində çıxışı zamanı deyib.
Dövlət başçısı bildirib ki, son 10 ildə Azərbaycan iqtisadiyyatı 3 dəfədən çox artıb: “İqtisadiyyatı şaxələndirməyə və enerji sektorundan asılılığı azaltmağa nail olduq. Enerji sektoru bizim ÜDM-in təqribən 30 faizini təşkil edir. Şaxələndirmə siyasəti əhəmiyyətli tərəqqiyə gətirib çıxardı və hətta hazırda neftin qiymətlərinin azaldığı dövrdə Azərbaycan iqtisadiyyatı cari ilin I rübündə 5 faizdən çox artıb. Şaxələndirmə, investisiya siyasəti və müasir infrastrukturun, əlverişli biznes mühitinin yaradılması yolu ilə özümüzü neftin dəyişkən qiymətlərindən qorumağa nail olduq”.
Prezident qeyd edib ki, Azərbaycan xarici investisiyalar üçün açıq ölkədir: “Biz müstəqillik illərində 200 milyard dollardan çox investisiya əldə etmişik. Ötən il isə bu rəqəm 27 milyard dollardan çox olub və bu vəsaitin 30 faizini birbaşa xarici investisiyalar təşkil edib”.
İlham Əliyev əlavə edib ki, Azərbaycan xarici investorlar üçün çox cəlbedici ölkədir, çünki ölkədə yaxşı biznes, investisiya mühiti var: “Biz hazırda 5 faizdən az olan işsizliyi, demək olar, aradan qaldıra bildik, 2015-ci ildə yoxsulluğun səviyyəsini 2003-cü ildəki 49 faizdən 5 faizədək azaltmaq təsiredici oldu”.
İkili vətəndaşlığının olmasını gizlədən azərbaycanlılara — CƏZA
28.04.2015
Xarici dövlətin vətəndaşlığını qəbul etmiş Azərbaycan vətəndaşı bu barədə Azərbaycanın müvafiq icra orqanına məlumat vermədiyi halda məsuliyyətə cəlb ediləcək.
Ölkə.Az xəbər verir ki, APA-nın məlumatına görə, Milli Məclisin bu gün keçirilən iclasında bununla bağlı Cinayət Məcəlləsinə əlavələr müzakirəyə çıxarılıb.
Layihə barədə məlumat verən Hüquq siyasəti və dövlət quruculuğu komitəsinin sədri Əli Hüseynli bildirib ki, Azərbaycan qanunvericiliyində ikili vətəndaşlıq qadağan olunur.
O qeyd edib ki, hazırkı layihəyə görə, Azərbaycan prezidenti tərəfindən Cinayət Məcəlləsinə yeni 318-2 (Xarici dövlətin vətəndaşlığını qəbul etmiş Azərbaycan Respublikasının vətəndaşı tərəfindən bu barədə məlumatın verilməməsi) maddəsinin əlavə olunması təklif edilir.
Maddəyə əsasən xarici dövlətin vətəndaşlığını qəbul etmiş Azərbaycan Respublikasının vətəndaşı tərəfindən bu barədə müvafiq icra hakimiyyəti orqanına bir ay müddətində yazılı məlumatın verilməməsinə görə 3 min manatdan 5 min manata qədər cərimə və ya 360 saatdan 480 saatadək ictimai işlərlə cəzalandırılma nəzərdə tutulur.
Azərbaycanda geni dəyişdirilmiş bitkilər qadağan edildi
28.04.2015
Azərbaycan Milli Məclisinin bu gün keçirilən iclasında Cinayət və İnzibati Xətalar məcəllələrinə ediləcək əlavələr müzakirəyə çıxarılıb.
Ölkə.Az APA-ya istinadən xəbər verir ki, layihə barədə məlumat verən Hüquq siyasəti və dövlət quruculuğu komitəsinin sədri Əli Hüseynli bildirib ki, bu, geni dəyişdirilmiş bitkilərin idxalı, ticarəti, istifadənin qadağan olunması ilə bağlıdır.
O, əvvəlcə Cinayət Məcəlləsinə əlavə edilən 200.2-ci (Genetik modifikasiya olunmuş bitkilərin, yaxud müasir biotexnoloji və gen mühəndisliyi metodları ilə yaradılmış kənd təsərrüfatı bitki materiallarının və ya genetik modifikasiya olunmuş bitkilərin genetik materiallarından istifadə edilərək istehsal olunan yeyinti məhsullarının qanunsuz dövriyyəsi) maddə barədə məlumat verib.
“Polisin səlahiyyəti artırılsın!” — Millət vəkili
28.04.2015
“Azərbaycanda bıçaqlanma hadisələri milli adət-ənənəyə çevrilib. Elə gün yoxdur ki, bıçaqlanma hadisəsi baş verməsin”.
Bunu millət vəkili Aqil Abbas parlamentin bugünkü iclasında söyləyib. O bildirib ki, son zamanlar belə hadisələrin baş verməsinin qarşısının alınması üçün Cinayət Məcəlləsindəki soyuq silah gəzdirmə maddəsində qaydalar sərtləşdirilməlidir. “Biz tələbə vaxtı da görürdük ki, bıçaq gəzdirmək olmaz. Belə bıçaqlanma halları o zaman çox az hallarda baş verərdi. Əvvəllər 4 sm-dən uzun bıçağa görə məsuliyyət nəzərdə tutulurdu. Mən təklif edirəm ki, bu məsələ diqqətdə saxlanılsın və polisin səlahiyyətləri artırılsın. Polisə şübhələndiyi adamın üzərinə baxış keçirmək icazəsi verilsin. Kiminsə üzərində soyuq silah varsa, onu polis müəyyən etsin. Polisə xüsusi icazə verilməlidir ki, şübhələnəndə Aqil Abbası da saxlaya bilsin”.
Deputat bildirib ki, bu məsələ növbəti komitə iclaslarında müzakirəyə çıxarılmalı və polisin səlahiyyətləri artırılmalıdır. “Bu baş verən bədbəxt hadisələr sabah bizim də başımıza gələ bilər. Bu xalq da bizimdir. Ona görə də düşünürəm ki, millətimizi qorumaq üçün qərarlar qəbul etməliyik”, - deyə Aqil Abbas vurğulayıb.
Səhiyyə Nazirliyi Azərbaycanda "Kalsium xlorid" dərman vasitəsinin satışına və istifadəsinə qadağa qoyub
28.04.2015
“Bu preparatın hər hansı bir ölüm halına səbəb olması haqda məlumatlar əsassızdır”
Səhiyyə Nazirliyi son günlər bir sıra sosial şəbəkələrdə "Kalsium xlorid" 5%-li 100 ml məhlul dərman vasitəsinin istifadəsi zamanı ölüm hallarının baş verməsi barədə yazılan məlumatlarla bağlı aparılan araşdırmanın nəticəsini açıqlayıb.
Səhiyyə Nazirliyinin mətbuat katibi Anar Qədirli açıqlamasında istehsal olunmuş bu preparatın hər hansı bir ölüm halına və ya başqa neqativ bir hala səbəb olması haqda məlumatların əsassız olduğunu deyib. Bununla yanaşı A. Qədirli bildirib ki, "AzərFarm" Ltd şirkəti tərəfindən Səhiyyə Nazirliyinin Analitik Ekspertiza Mərkəzinə daxil olan məktubda şirkətin istehsal etdiyi 036 seriyalı istifadə müddəti 01.2017-ci ilədək olan "Kalsium xlorid" 5% 100 ml məhlul dərman vasitəsinin istehsalı zamanı bəzi texniki problemlərin olması ilə bağlı həmin seriyanın satışının dayandırılması və 036 seriyalı "Kalsium xlorid" 5% 100 ml məhlul dərman vasitəsinin aptek şəbəkəsindən geri qaytarılmasına köməklik göstərilməsi barədə müraciət olunduğunu qeyd edib.
Azərbaycanda ilk dəfə bitkilərin genetik xəritələnməsi üçün tədqiqatlara başlanılıb
28.04.2015
Azərbaycanda ilk dəfə olaraq, bitki genetik müxtəlifliyinin sekvens əsasında genotipləşdirilməsi, mühüm əhəmiyyət daşıyan bitkilərin de-novo və re-sekvensi, kəmiyyət və keyfiyyət əlamətlərini idarə edən genlərin identifikasiyası, asossiativ və genetik xəritələnməsi, ekzom və transkriptom səviyyəsində tədqiqatlar aparılmasına başlanılıb.
Azərbaycan Milli Elmlər Akademiyasının (AMEA) Genetik Ehtiyatlar İnstitutundan (GEİ) Trend-ə verilən məlumata görə, bu barədə GEİ-nin direktoru, AMEA-nın müxbir üzvü Zeynal Əkpərov institutda qonaq olan akademiya prezidenti, akademik Akif Əlizadə və vitse-prezident, akademik İbrahim Quliyevə məlumat verib.
Bakıda Qlobal Açıq Cəmiyyətlər Forumu başladı
28.04.2015
“Yeni dünya düzənində etimadın bərpa olunması”.
Bu gün Diasporla İş üzrə Dövlət Komitəsinin dəstəyi və Nizami Gəncəvi Beynəlxalq Mərkəzinin təşkilatçılığı ilə Bakıda III Qlobal Açıq Cəmiyyətlər Forumu başlayıb.
Ölkə.Az APA-ya istinadən xəbər verir ki, Forumun açılışında Azərbaycan prezidenti İlham Əliyev də iştirak edir.
Forumda iki ölkənin prezidenti, 4 ölkənin baş nazir və xarici işlər naziri, 41 ölkənin sabiq prezidenti olmaqla ümumilikdə 72 ölkənin rəsmiləri iştirak edir.
Zərifə Əliyeva — 92
28.04.2015
150-yə yaxın elmi işin, 1 ixtira və 12 səmərələşdirici təklifin müəllifidir.
Əməkdar elm xadimi, tibb elmləri doktoru, Azərbaycan Milli Elmlər Akademiyasının akademiki Zərifə Əliyevanın anadan olmasından 92 il ötür.
Zərifə Əziz qızı Əliyeva 28 aprel 1923-cü ildə Naxçıvan Muxtar Respublikasında anadan olub.
1947-ci ildə N.Nərimanov adına Azərbaycan Dövlət Tibb İnstitutunu bitirib. Azərbaycan Elmi-Tədqiqat Oftalmologiya İnstitutunda elmi işçi, 1969-cu ildən isə Ə.Əliyev adına Azərbaycan Həkimləri Təkmilləşdirmə İnstitutunda göz xəstəlikləri kafedrasının dosenti, professor, görmə orqanlarının peşə patologiyası laboratoriyasının müdiri, oftalmologiya kafedrasının müdiri (1982-1985) vəzifələrində çalışıb.
Z.Əliyevanın Azərbaycanda oftalmologiya elminin inkişafında müstəsna xidmətləri var. O, vaxtilə Azərbaycanda geniş yayılmış traxomanın, dünya təcrübəsində birincilər sırasında peşə, xüsusilə kimya və elektron sənayelərində peşə fəaliyyəti ilə bağlı göz xəstəliklərinin öyrənilməsi, profilaktikası və müalicəsinə, habelə oftalmologiyanın müasir problemlərinə dair bir çox sanballı tədqiqatların, o cümlədən “Terapevtik oftalmologiya”, “İridodiaqnostikanın əsasları” kimi nadir elmi əsərlərin müəlliflərindən biri, 12 monoqrafiya, dərslik və dərs vəsaitinin, 150-yə yaxın elmi işin, 1 ixtira və 12 səmərələşdirici təklifin müəllifidir. Z.Əliyeva yüksək ixtisaslı səhiyyə kadrları hazırlanmasına böyük əmək sərf edib.
Gürcüstandan avtomobil gətirənlərin nəzərinə
28.04.2015
2015-ci ilin yanvar-mart aylarında Gürcüstandan Azərbaycana 1356 minik avtomobili ixrac olunub ki, bu da ötən ilin müvafiq dövrünün göstəricisindən 7 dəfə azdır.
Bu barədə Gürcüstan Milli Statistika Xidmətinin 2015-cü ilin I rübün yekunları üzrə hesabatında deyilir.
Hesabata əsasən, qeyd edilən dövrdə Gürcüstandan Azərbaycana ümumi dəyəri 24,85 milyon dollar olan avtomobillər ixrac edilib.
Göstərilən dövrdə Gürcüstandan Azərbaycana ixrac olunan malların ümumi həcmində bu kateqoriyanın xüsusi çəkisi 39,1 faiz təşkil edib. Xidmətin məlumatına əsasən, ölkənin bu kateqoriyadan olan ümumi ixracında isə Azərbaycanın xüsusi çəkisi 43,1 faiz təşkil edib.
Azərbaycanda çoxdilli məlumat-sorğu mərkəzi yaradılır
27.04.2015
Azərbaycanda Birinci Avropa Oyunları zamanı xarici qonaqlar və iştirakçılara xidmət məqsədilə xüsusi məlumat-sorğu mərkəzi yaradılacaq.
Bunu Trend-ə Azərbaycanın telekommunikasiya bazarındakı məlumatlı mənbə bildirib.
Onun sözlərinə görə, Bakının infrastrukturuna (mədəniyyət mərkəzləri, nəqliyyat, hotel və s.) dair bütün məlumatları bir neçə dildə (ingilis, rus, fransız və başqa dillərdə) 109 nömrəsinə zəng etməklə almaq mümkün olacaq.
“Azərbaycanın daxili işlərinə qarışan xarici qüvvələrin qarşısı vaxtında alınır”
27.04.2015
“Müxtəlif vaxtlarda Azərbaycanın daxili işlərinə qarışan, təzyiq göstərən xarici qüvvələr olur, amma biz onların qarşısını vaxtında ala bilirik”.
Bunu Qafqaz Müsəlmanları İdarəsinin (QMİ) sədri Allahşükür Paşazadə Fransanın Yəhudi İnstitutlarının Təmsilçilik Şurasının (CRİF) keçmiş rəhbəri Rişar Praskyenin rəhbərlik etdiyi nümayəndə heyəti ilə görüşündə bildirib.
Bakıda məktəblərin I sinfinə şagirdlərin qəbulu başlayır
27.04.2015
Şagirdlər I sinfə işçi qrupunun keçirdiyi müsahibə nəticəsində qəbul olunacaq
Mayın 1-dən etibarən Bakı məktəblərinin I sinfinə şagirdlərin qəbulu başlayır.
Azərbaycan təhsil nazirinin "2015/2016-cı tədris ili üçün I sinfə şagird qəbulunun elektron sistem vasitəsilə həyata keçirilməsi barədə” əmrinə əsasən, martın 5-dən ərizələrin elektron qeydiyyatı keçirilir. Ərizəsi elektron qeydiyyatdan keçmiş vətəndaşların övladlarının sənədləri mayın 1-dən başlayaraq, hər bir müəssisədə təmsil olunacaq işçi qrup tərəfindən qəbul ediləcək.
Bakı Aeroportunda yanğın təlimi keçiriləcək
27.04.2015
Aprelin 28–də Heydər Əliyev Beynəlxalq Aeroportunda Fövqəladə Hallar Nazirliyinin (FHN) və “Azərbaycan Hava Yolları” Qapalı Səhmdar Cəmiyyətinin qüvvə və vasitələri cəlb olunmaqla yanğın-taktiki təlim keçiriləcək.
Ölkə.Az-ın FHN-in mətbuat xidmətinə istinadən məlumatına görə, təlimin keçirilməsində əsas məqsəd aeroport ərazisində təhlükəsizliyin qorunması üçün aidiyyəti qurumların qarşılıqlı fəaliyyətinin gücləndirilməsi, mümkün fövqəladə halların, o cümlədən yanğınların qarşısının vaxtında alınması və nəticələrinin çevik şəkildə aradan qaldırılması üçün şəxsi heyətin peşəkarlığının daha da artırılmasından ibarətdir.
BDU-da “İlk Avropa Oyunları”nın təbliğatı davam edir
27.04.2015
Bakı Dövlət Universitetində "İlk Avropa Oyunları” ilə bağlı növbəti təbliğat görüşü keçirilib.
Ölkə.Az xəbər verir ki, Bakı Dövlət Universitetində Azərbaycan Respublikası Prezidenti yanında Gənclər Fondunun maliyyələşdirdiyi "İlk Avropa Oyunlarına Sən də qoşul” layihəsinin növbəti təqdimatı baş tutub.
100-dən artıq fəal tələbələrin iştirakı ilə keçirilən tədbirdə çıxış edən layihə rəhbəri Ağayeva Mədinə Zabir qızı "İlk Avropa Oyunları”nın əhəmiyyətindən bəhs edərək gəncləri bu oyunlarda yaxından iştirak etməyə dəvət edib.
Təqdimat zamanı BDU tələbələrin yeni ideyaları dinlənilib və onların həyata keçirilmə üçün müxtəlif fikirlər irəli sürülüb.
Jurnalistlərin binası gələn ilə hazır olacaq
27.04.2015
“Jurnalistlər üçün tikilən binanın təhvil verilməsi növbəti il üçün nəzərdə tutulur”.
Bu sözləri Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli musavat.com-a açıqlamasında bildirib.
V.Səfərli vurğulayıb ki, hazırda tikinti işləri davam edir: “Jurnalistlər üçün tikilən binada işlər dayandırılmayıb, davam edir. Ancaq onu demək çətindir ki, bina bu ilin sonuna qədər təhvil veriləcək, ya yox... İş gedir. Binanın təhvil verilməsi növbəti il üçün nəzərdə tutulur. Biz istəyirdik ki, ilin sonuna qədər yekunlaşsın, görək necə olacaq”.
Ölkə.az
