Ramil Usubov polis veteranlarını nümunə göstərdi

Faşizm üzərində qələbənin 70 illik yubileyi ərəfəsində daxili işlər naziri, general-polkovnik Ramil Usubov 1941-1945-ci illər müharibəsinin iştirakçıları olan polis veteranları ilə görüşüb.

Ölkə.Az DİN-in saytına istinadən xəbər verir ki, nazir bu əlamətdar tarixin hər yerdə yüksək səviyyədə qeyd olunduğunu bildirib, müharibə illərində həmvətənlərimizin ön və arxa cəbhədəki böyük fədakarlığından və qəhrəmanlığından danışıb, məhz Heydər Əliyevin ali hakimiyyətə tarixi qayıdışından sonra 9 Mayın müstəqil Azərbaycanda dövlət səviyyəsində keçirilən bayramlar sırasına daxil edildiyini, cəmiyyətin ən dəyərli üzvləri kimi veteranlarımıza hər cür diqqət və qayğı göstərildiyini vurğulayib.

Prezident İlham Əliyevin də müharibə iştirakçılarına hər zaman həssas və qayğıkeş münasibətini qeyd edən cənab Ramil Usubov DİN rəhbərliyinin polis veteranlarının ehtiyacları ilə daim maraqlandığını, problemlərinin həllinə yardımçı olmağa çalışdığını diqqətə çatdırıb.

Daxili işlər naziri əlamətdar bayram münasibətilə veteranları ürəkdən təbrik edib, onlara cansağlığı arzulayıb, ən xoş arzularını bildirib. O, müharibə veteranlarının mənalı həyat yolunun və zəngin təcrübəsinin yetişməkdə olan nəslə, həmçinin daxili işlər orqanlarının gənc əməkdaşlarına örnək olduğunu, onların vətənə sonsuz məhəbbət, anda, dövlətə sədaqət rəmzinə çevrilmiş qəhrəmanlığının, əzmkarlığının unudulmayacağını qeyd edib.

İstefada olan milis polkovniki Müseyib İlyasov iştirakçılar adından çıxış edərək bu görüşə və ümumilikdə veteranlara göstərilən diqqət və qayğıya görə ölkə və DİN rəhbərliyinə minnətdarlığını bildirib.

Ölkə.Az