Zakir Həsənov veteranlara Qarabağdan qələbə müjdəsi arzu etdi

Azərbaycanın müdafiə naziri general-polkovnik Zakir Həsənov Qələbənin 70-ci ildönümü münasibətilə veteranları təbrik edib.

Ölkə.Az Müdafiə Nazirliyinin məlumatına istinadla xəbər verir ki, nazirin təbrik müraciətində deyilir:

“Sizi 1941-1945-ci illər Böyük Vətən müharibəsində faşizm üzərində Qələbənin 70-ci ildönümü münasibətilə ürəkdən təbrik edir, hər birinizə səmimi salamlarımı çatdırıram.

Siz Qafqaz dağlarının ətəklərindən Berlinədək şanlı döyüş yolu keçmiş, qələbə naminə şəxsi rəşadət və şücaət nümunələri göstərmisiniz. İndi sizin sinənizi ölkənin ən yüksək orden və medalları bəzəyir. Harada, hansı cəbhədə vuruşmağınızdan asılı olmayaraq azərbaycanlı olduğunuzu heç vaxt unutmamış, xalqımıza həmişə başucalığı gətirmisiniz”.

Zakir Həsənov Qələbənin 70 illiyi ərəfəsində ömrü yarıyolda qırılan, onların müharibədə həlak olan silahdaşlarını hörmət və ehtiramla yad etdiyini və onların müqəddəs ruhları qarşısında baş əydiyini bildirib:

“Əziz veteranlarımız, Siz Böyük Vətən müharibəsi veteranlarının sonuncu mogikanlarısınız və yaşınızın 90-ı çoxdan haqlamasına baxmayaraq, ixtiyar çağınızda da gənclərin vətənpərvərlik ruhunda tərbiyəsində səylərinizi əsirgəmirsiniz.

Xalqımızın ümummilli Lideri Heydər Əliyev Sizin xidmətlərinizi həmişə yüksək qiymətləndirmiş, Sizi xalqımızın qızıl fondu adlandırmışdır.

Siz daim ölkə rəhbərliyinin, möhtərəm Prezidentimiz, Silahlı Qüvvələrin Ali Baş Komandanı cənab İlham Əliyevin diqqət və qayğısı ilə əhatə olunmusunuz.

Arzu edirəm ki, bundan sonrakı ömür payınızı da nəvə-nəticələrinizlə birlikdə şad-firavan yaşayasınız.

Qələbə gününü gördüyünüz kimi, nəvə-nəticələrinizin Qarabağdan qələbə müjdəsi gətirəcəyi günü görmək də Sizlərə qismət olsun!”

Ölkə.Az