Həftənin icmalı
Böyük qələbədən 70 il keçir
09.05.2015
Faşistlər qələbə çalsa idi, dünyanı hansı tale gözləyərdi?
Dünya xalqlarının faşizm üzərində qələbənin 70 illiyini bayram etdiyi bu günlərdə bunu düşünmək belə çətindir. Xəyali də olsa, anlamaq olur ki, hitlerçilər Avropa irqinə aid bir çox xalqlara - azərbayсanlılar qarışıq bütün türklərə, fin-uqorlara, şərqi slavyanlara, sami xalqlarına, qafqazlılara böyük soyqırım fəlakəti hazırlayırdılar.
Bunu Adolf Hitlerin “Mayn Kampf” əsərindən bir-iki сümləni oxumaqla da anlamaq olur: “Biz beynəlmiləlçi deyilik. Bizim sosializm millidir”. Yaxud: “Sosializm qədim ari, german adətidir”.
Hitlerçilər bir sıra darvinist nəzəriyyələrə əsaslanaraq ari adlandırdıqları hind-Avropa xalqlarının digər xalqlar üzərində ağalığına haqq qazandırırdılar. Amma burda şərqi slavyanlar (ruslar, belaruslar, ukraynalılar) istisna idi. Adolf Hitler onların tatarlarla qarışaraq arilikdən çıxdığını iddia edirdi. Hitler Avropanı və Ön Asiyanı “təmizləyərək” ari zonasına çevirməyə çalışırdı. Təbii ki, türklər və qafqazlılar Orta Asiyaya, şərq slavyanları Sibirə, ərəblər Afrikaya köçürüləсəkdi.
Azərbaycanın BMT-nin Cenevrə ofisindəki daimi nümayəndəliyi bəyanat yaydı
08.05.2015
Ermənistan Silahlı Qüvvələrinin işğal olunmuş ərazilərdə mövcudluğu və qanunsuz fəaliyyəti ilə əlaqədar Azərbaycanın beynəlxalq səviyyədə tanınan sərhədləri çərçivəsində öz ərazi bütövlüyü və suverenliyi uğrunda həyata keçirməyə vadar ola biləcəyi istənilən fəaliyyətin məsuliyyəti tamamilə Ermənistan Respublikasının üzərinə düşür.
Ölkə.Az APA-ya istinadən xəbər verir ki, bu barədə Azərbaycanın BMT-nin Cenevrə bölməsi və digər beynəlxalq təşkilatlar yanında daimi nümayəndəliyinin Şuşanın işğalının 23-cü ildönümü ilə bağlı yaydığı mətbuat açıqlamasında deyilir.
Açıqlamada bildirilir ki, işğaldan 23 il keçməsinə baxmayaraq, BMT-nin Ermənistan Silahlı Qüvvələrinin Azərbaycan torpaqlarını tərk etməsi tələbinin əks olunduğu qətnamələri yerinə yetirilməyib.
"Heydər Əliyev siyasəti: Tolerantlıq" kitabının təqdimat mərasimi keçirilib
08.05.2015
Dini Qurumlarla İş üzrə Dövlət Komitəsinin (DQİDK) təşkilatçılığı ilə ulu öndər Heydər Əliyevin anadan olmasının 92-ci ildönümü münasibətilə "Heydər Əliyev siyasəti: Tolerantlıq" kitabının təqdimat mərasimi keçirilib.
Təqdimat mərasimində DQİDK sədri Mübariz Qurbanlı bildirib ki, bu gün Heydər Əliyevin tolerantlıq siyasəti nümunəvi siyasət kimi dünyada öyrənilir.
Dövlət Komitəsinin sədri qeyd edib ki, Azərbaycanın milli müstəqilliyini əldə etməsi şərəfli dövrü əhatə edir: "Lakin bu dövr çox keşməkeşli keçib. Ölkəmiz erməni işğalı ilə üz-üzə qalıb. Torpaqlarımızı - Şuşanı, Laçını, Ağdamı itirdik. Ölkədə hərc-mərclik hökm sürürdü. Lakin məhz ulu öndər Heydər Əliyevin hakimiyyətə gəlişi ilə Azərbaycan inkişaf yoluna qədəm qoydu, gücləndi. Həmçinin Heydər Əliyevin sayəsində Azərbaycanda dövlət-din münasibətləri tənzimləndi. Milli-mənəvi sahədə irəliləyişlər əldə edildi. Dini abidələr təmir edildi, yeniləri inşa edildi. Əgər Sovet hakimiyyəti illərində Azərbaycanda cəmi 17 məscid fəaliyyət göstərirdisə, indi onların sayı 2050-yə yaxındır. Onlardan 1600-dən çoxu daimi fəaliyyət göstərir. Bu gün isə Heydər Əliyev irsinin davamçısı, Prezident İlham Əliyev milii-mənəvi dəyərləri, o cümlədən islami dəyərlərə yüksək qiymət verir. Bu yaxınlarda Heydər Məscidinin inşa edilməsi, orada insanların ibadət etməsinə şərait yaradılması buna kiçik nümunələrdən biridir".
Putin Azərbaycanın televiziya kanalının rəhbərini təltif etdi
08.05.2015
Rusiya prezidenti Vladimir Putin azərbaycanlı kinorejissor, “Space” telekanalının direktoru Vaqif Mustafayevi “Dostluq” medalı ilə təltif edib.
Ölkə.Az xəbər verir ki, prezidentin fərmanı dünən imzalanıb.
Vaqif Mustafayev medalla Rusiya Federasiyası ilə dostluq və əməkdaşlığın möhkəmləndirilməsində böyük töhvələrinə görə təltif olunub.
İTV-də yeni təyinat
08.05.2015
Tanınmış jurnalist Anar Yusifoğluna çalışdığı İctimai Televiziyada (İTV) vəzifə verilib.
O, televiziyanın İctimai-siyasi proqramlar departamentinin direktoru təyin olunub.
Məsələ ilə bağlı Anar Yusifoğlu ilə əlaqə yaratmaq cəhdimiz baş tutmasa da, İTV-nin mətbuat xidmətindən faktı təsdiq ediblər.
Qeyd edək ki, Anar Yusifoğlu İTV yaranandan orada çalışıb, televiziyanın qurulmasında yaxından iştirak edib.
23 illik yaranın qaysağı — ŞUŞA
08.05.2015
Şuşanın işğalında iştirak etmiş erməni komandirlərdən biri Jirayr Sefilyan hazırda həbsxanadadır. Livandan gələrək uydurma Böyük Ermənistan ideyasına qoşulmuş peşəkar terrorçu 33 yaşında peşman oldu və 2000-ci ildə hakimiyyətdə olan “Qarabağ” klanına qarşı sərt müxalifətə keçdi. Həmin vaxtdan bu yana Jirayr Sefilyan bir neçə dəfə həbsə girib. Axırıncı dəfə o, erməni xalqını kütləvi itaətsizliyi çağırırdı.
Baş prokuror vətəndaşları onlayn qəbul edəcək
07.05.2015
Azərbaycan Respublikasının Prezidenti cənab İlham Əliyevin tapşırıq və tövsiyələrinə uyğun olaraq prokurorluq orqanlarında vətəndaşların qəbulu məsələlərinə xüsusi diqqət göstərilməklə əhalinin müraciətlərinə qayğı ilə yanaşılması, ərizə və şikayətlərə tam, hərtərəfli və obyektiv baxılması işinin daha da təkmilləşdirilməsi və bu sahədə müasir informasiya-kommunikasiya texnologiyalarının imkanlarından daha geniş istifadə edilməsi üzrə ardıcıl və sistemli tədbirlərin görülməsi davam etdirilir.
Azərbaycan Respublikasının Baş prokuroru Zakir Qaralov mayın 15-də saat 10:00-da canlı bağlantı ilə Quba, Qusar və Xaçmaz rayonlarında yaşayan vətəndaşların Quba rayon prokurorluğunun inzibati binasında video konfrans rejimində qəbulunu keçirəcəkdir.
Erməni nazir Bakıya gəlir
07.05.2015
Bu il Ermənistan şagirdləri Bakıda keçiriləcək kimya üzrə 47-ci beynəlxalq olimpiadada iştirak edəcəklər.
Bu barədə “Novosti-Armeniya” ya Ermənistanın Təhsil və Elm Nazirliyindən məlumat verilib.
“Erməni şagirdlərinin olimpiadada iştirakının vacibliyini nəzərə alaraq, Ermənistanın milli olimpiya komandasının 20-29 iyul tarixində Bakıda keçiriləcək kimya üzrə 47-ci beynəlxalq olimpiadada iştirakı barədə qərar qəbul olunub”, - məlumatda deyilir.
Azərbaycanda bədəninə döymə etdirən çağırışçılar psixiatra göndərilir
07.05.2015
Azərbaycanda hərbi xidmətə çağırış yaşı çatmış gənclərlə bağlı maraqlı fakt ortaya çıxıb. Məlum olub ki, bədəninin müxtəlif nahiyələrində tatuaj etdirən hərbi xidmətə çağırış yaşlı gənclər məhz buna görə Psixiatriya Xəstəxanasında məcburi müayinəyə cəlb olunurlar.
Ölkə.Az xəbər verir ki, məsələylə bağlı araşdırma aparan Modern.az saytına çağırışçılarla bağlı bu faktı rəsmi qurumlardan da təsdiqləyiblər.
Rəsmi məlumata əsasən, çağırış zamanı hərbi komissiyanın həkim mütəxəssisi ehtiyac olduğu təqdirdə bədənində tatuajı olan çağırışçını müayinəyə göndərir.
2 mindən çox əcnəbi Azərbaycandan çıxarıldı
07.05.2015
2015-ci ilin aprel ayında 2243 nəfər əcnəbi Azərbaycandan çıxarılıb.
Bu barədəÖlkə.Az-a Dövlət Miqrasiya Xidmətindən (DMX) məlumat verilib.
DMX-nın məlumatına görə, onlardan 16-nın Azərbaycan Respublikası ərazisində müvəqqəti və ya daimi yaşamaq üçün əsas verən sənədləri itirildiyindən yenisi ilə əvəz olunub, 163 nəfərinə cərimə tətbiq edilməklə ölkə ərazisində yaşamaları leqallaşdırılıb.
Bundan əlavə, 1781 əcnəbinin Azərbaycan Respublikası ərazisini 48 saat ərzində tərketmələri, 462 əcnəbinin isə inzibati qaydada ölkə hüdudlarından kənara çıxarılmaları barədə qərarlar qəbul edilib.
Mübariz Qurbanlı: Azərbaycanda dini baxımdan sabitlik mövcuddur
07.05.2015
Azərbaycanda dini baxımdan sabitlik mövcuddur, ona görə də qarşıdan gələn I Avropa Oyunları ilə əlaqədar dini baxımdan hansısa bir qrupun, cərəyanın bu Oyunlara xələl gətirmə ehtimalı sıfıra bərabərdir.
Bunu Dini Qurumlarla İş üzrə Dövlət Komitəsinin sədri Mübariz Qurbanlı jurnalistlərə bildirib.
Komitə sədri qeyd edib ki, bununla bağlı görülən işlər, hüquq-mühafizə orqanlarının apardığı tədbirlər ölkədə bu sahədə sabitliyin tam şəkildə bərqərar olmasına gətirib çıxarıb: "Azərbaycanda dini radikalizmin ayrı-ayrı elementləri olsa da, bu, ictimai siyasətə təsir etmək imkanında deyil".
“Polis kütləvi hərəkətə imkan verməyəcək” — General
07.05.2015
Bakıda keçiriləcək Birinci Avropa Oyunları zamanı sıxlıq yaranmasın deyə polis gücləndirilmiş iş rejimində çalışacaq.
Bu barədə Bakı şəhər Baş Polis İdarəsinin rəis müavini, polis general-mayoru Səhlab Bağırov Bakı 2015 Avropa Oyunları Əməliyyat Komitəsinin iclasında bildirib.
Onun sözlərinə görə, ictimai nəqliyyatda, əsasən də metroda sıxlığın qarşısını almaq üçün polis əməkdaşları növbə çəkəcəklər.
“Bakı Olimpiya Stadionundan “Koroğu” metrostansiyası arasında təxmini 1200 metrə qədər məsafə var. Bu məsafəyə yol boyu polis nəzarət edəcək. Əgər sərnişin axını çox olarsa sərnişinlər müəyyən yerlərdə saxlanılacaq. Metroya qədər insanların kütləvi şəkildə getməsinə imkan verilməyəcək”, - deyə Səhlab Bağırov bildirib.
Bakıda metro pulsuz olacaq
07.05.2015
“Onlar bileti göstərməlidirlər”.
Bakıda ilk Avropa Oyunlarının açılış və bağlanış mərasimlərinə gedən insanlar üçün metro pulsuz olacaq.
Ölkə.Az Oxu.az-a istinadən xəbər verir ki, bunu “Bakı Metropoliteni” QSC-nin mətbuat xidmətinin rəhbəri Nəsimi Paşayev deyib.
N.Paşayevin sözlərinə görə, tamaşaçılar yalnız Avropa Oyunlarının açılış və bağlanış günləri biletlərini göstərməklə metrodan pulsuz istifadə edə biləcəklər.
Rauf Mirqədirovun həbs müddəti növbəti dəfə uzadılıb
06.05.2015
Həbsdə olan jurnalist Rauf Mirqədirovun barəsində olan həbs qətimkan tədbirinin müddəti uzadılıb.
Bu barədə APA-ya R. Mirqədirovun vəkili Elmar Süleymanov məlumat verib. Vəkil bildirib ki, Nəsimi Rayon Məhkəməsində keçirilən proses zamanı istintaq orqanın nümayəndəsi R. Mirqədirov barəsində seçilmiş həbs qətimkan tədbirinin müddətinin 6 ay uzadılmasını istəyib. Lakin məhkəmə həbs qətimkan tədbirinin müddətini 4 ay uzadıb .
Azərbaycan əhalisinin yarısından çoxunun evində kompüter var
06.05.2015
Azərbaycan əhalisinin yarısından çoxunun evində kompüter var.
Rabitə və yüksək texnologiyalar naziri Əli Abbasov Yeni Azərbaycan Partiyasının saytına müsahibəsində bildirib ki, Azərbaycanın bütün ev təsərrüfatlarının 53,2%-nin kompüteri, 71,6%-nin isə internetə çıxışı mövcuddur.
Nazirin sözlərinə görə, son 10 il ərzində sektorun həcmi təqribən 20-25% orta illik artım tempi ilə artaraq 2.0 milyard ABŞ dollarını ötüb.
Bu müddətdə sektora 3.0 milyard ABŞ dolları investisiya qoyuluşu həyata keçirilib və bunun da 80%-ə yaxını yerli və xarici biznes strukturları tərəfindən yatırılıb.
Azərbaycanda kolleclər ali məktəblərin nəzdinə keçiriləcək
06.05.2015
Azərbaycanda kolleclərin ali məktəblərin nəzdinə keçirilməsi prosesinə başlanacaq.
Bunu Azərbaycanın təhsil naziri Mikayıl Cabbarov Xəzər Avropa Klubunun üzvləri ilə görüşündə deyib.
Nazirin sözlərinə görə, orta ixtisas təhsili müəssisələrinin kifayət qədər böyük hissəsi kollec adlandırılır: "Onların ali təhsil müəssisələrinin nəzdinə keçirilməsi prosesinə başlanacaq. Fikrimizcə, bu, bir tərəfdən resurslardan daha faydalı istifadəni təmin edə bilər. Digər tərəfdən, subbakalavriat dərəcəsini təklif etməklə, həmin orta ixtisas təhsili müəssisələrinin verdiyi təhsilin keyfiyyətinin və onlara marağın artırılmasına xidmət edə bilər. Təbii ki, biz burada ixtisaslara baxacağıq".
900 azərbaycanlı xarici şirkəti məhkəməyə verdi
06.05.2015
“Swift” xarici şirkəti 900 yerli neftçi tərəfindən məhkəməyə verilib.
Ölkə.Az xəbər verir ki, bu barədə virtualaz.org saytına Neftçilərin Hüquqlarını Müdafiə Təşkilatının hüquqşünası Azər Quliyev məlumat verib. Vəkilin sözlərinə görə, şirkət indiyədək tabeliyində çalışan neftçilərə əlavə ödəniş - dəniz əmsalını ödəməyb: “Dəniz əmsalının ödənişi Nazirlər Kabinetinin müvafiq qərarı ilə tənzimlənir. Yalnız dənizdə çalışanlara verilən əlavə ödənişin məbləği minimum əməkhaqqının 75 faizi qədərdir. Şirkət əlavə ödənişləri ödəməkdən imtina etdiyinə görə məhkəmədə cavab verəcək”.
I Avropa Oyunlarında tətbiq ediləcək nəqliyyat planı haqqında məlumat verilib
06.05.2015
Bakı 2015 I Avropa Oyunları Əməliyyat Komitəsi (BAOƏK) tərəfdaş şirkətləri, nazirlikləri və digər müvafiq hökumət qurumlarını iyunun 12-də başlayacaq Oyunlar zamanı tətbiq olunacaq nəqliyyat planı ilə yaxından tanış etmək məqsədilə konfrans təşkil edib.
Əməliyyat Komitəsindən Ölkə.Az-a verilən məlumata görə, Bakı Şəhər İcra Hakimiyyəti, Bakı Metropoliteni, Nəqliyyat Nazirliyi, NİİM və Baş Dövlət Yol Polisi İdarəsi ilə birgə təşkil olunan konfrans BAOƏK-in Bakı şəhərinin nəqliyyat sisteminə məsul qurumlarla əməkdaşlığını inkişaf etdirmək və paytaxt əhalisinin, fəaliyyət göstərən şirkətlərin Oyunlar zamanı tətbiq ediləcək nəqliyyat planı haqqında məlumatlandırılmasını təmin etmək məqsədi daşıyırdı.
Anar Qədirli vəzifəsindən azad edildi
06.05.2015
Səhiyyə Nazirliyinin mətbuat xidmətinin rəhbəri Anar Qədirli tutuduğu vəzifədən azad olunub.
Ölkə.Az xəbər verir ki, “AZERFAX”ın əldə etdiyi məlumata görə, A.Qədirli işdən getmək barədə bu gün ərizə yazıb. Səhiyyə naziri Oqtay Şirəliyev onun ərizəsini qəbul edib.
A.Qədirli sayta açıqlamasında işdən getdiyini təsdiqləyib.
Məlumata görə, Səhiyyə Nazirliyinin mətbuat xidmətinin rəhbəri vəzifəsinə yeni təyinat da olub.
Lent.az-ın verdiyi məlumata görə, bu, jurnalist Liya Bayramovadır.
Bakıda sürücülərin yolla gedərkən məlumat alması asanlaşdı
05.05.2015
Bakının bir neçə yerində yeni tipli məlumat informasiya tabloları quraşdırılıb.
Bunu Nəqliyyat Nazirliyinin Nəqliyyatı İntellektual İdarəetmə Mərkəzinin (NİİM) ictimai əlaqələr üzrə mütəxəssisi Şəfa Mehmanqızı deyib.
Onun sözlərinə görə, I Avropa Oyunları ərəfəsində gücləndirilmiş iş rejimində fəaliyyət göstərən NİİM tərəfindən yollarda 48 ədəd məlumat informasiya tablosundan (VMS) əlavə, paytaxtın 8 nöqtəsində yeni tipli tablolar quraşdırılıb: “Ziya Bünyadov prospektində 8, Bakı Dairəvi yolunda 4, Abdulvahab Salamzadə küçəsində 2 ədəd yeni tipli və ikitərəfli məlumat informasiya tablosu quraşdırılıb. Bu tablolar əvvəlkilərdən fərqli olaraq, məlumatları yolun hər iki istiqamətində göstərməklə yanaşı, istənilən növ nəqliyyat məlumatını daha dəqiq görüntülərlə əks etdirir. Yeni tipli məlumat informasiya tabloları daha kompakt formada hazırlanıb və eyni vaxtda təqvimi, saatı, küləyin sürətini, hava temperaturunu, yoldakı sürət həddini və sxemlər vasitəsilə yolda nəqliyyat hərəkətinin intensivliyini göstərir”.
Ş.Mehmanqızı qeyd edib ki, hazırda yeni quraşdırılan bu tablolar test rejimindədir və yaxın müddətdə tam istifadəyə veriləcək.
Məktəbi vaxtından əvvəl bitirilmə qaydaları açıqlandı
05.05.2015
Azərbaycanda orta məktəbi eksternat təhsilalma formasında vaxtından əvvəl bitirilməsi qaydaları təsdiqlənib.
Təhsil Nazirliyindən Ölkə.az-a verilən məlumata görə, Azərbaycan təhsil naziri Mikayıl Cabbarov tərəfindən təsdiqlənən “Ümumi təhsil pilləsinin ibtidai, ümumi orta və tam orta təhsil səviyyələrinin eksternat təhsilalma formasında vaxtından əvvəl bitirilməsi Qaydaları”na zəsasən, ümumi təhsil üzrə təhsil səviyyələrini vaxtından əvvəl bitirmə yalnız ibtidai təhsildə III, ümumi orta təhsildə VIII, tam orta təhsildə X sinif şagirdlərinə şamil olunur. Hər hansı bir şagird ümumi təhsil pilləsində oxuduğu müddətdə təhsil səviyyələrindən yalnız birini vaxtından əvvəl bitirə bilər.
Təfəkkür Universitetinin filial rektoru “İnterpol”a verildi
05.05.2015
Təfəkkür Universitetinin Kiyev filialının rektoru Riyad Əliyev beynəlxalq axtarışa verilib.
Ölkə.Az xəbər verir ki, APA-nın məlumatına görə, bu barədə İnterpolun saytında məlumat yerləşdirilib.
Məlumatda qeyd olunur ki, 40 yaşlı Riyad Əliyev dələduzluqda təqsirli bilinir. Azərbaycan hüquq-mühafizə orqanları ölkədən qaçdığı üçün onun barəsində dövlətlərarası axtarış elan edib və saxlanılması üçün İnterpola müraciət olunub.
Hazırda R. Əliyevin tutulması istiqamətində əməliyyat-axtarış tədbirləri davam etdirilir.
Qeyd edək ki, R. Əliyev Təfəkkür Universitetinin təsisçilərindən biridir. O, universitetin Kiyev filialının rektoru olub.
Bağlanan avtobusların tam siyahısı
05.05.2015
Dünəndən etibarən bir neçə marşrut avtobuslarının hərəkət istiqamətində dəyişiklik edildiyi barədə ictimaiyyətə məlumat verilib.
Baş verən dəyişikliklərlə bağlı “Qafqazinfo”ya açıqlama verən Bakı Sərnişinnəqliyyat Məhdud Məsuliyyəti Cəmiyyətinin rəsmisi Vüqar İbrahimli deyib ki, 70 nömrəli marşrut xəttinin də istiqaməti dəyişdirilib: “Həmin marşrutun sonuncu dayanacağı Neftçilər metrosu olacaq. Bundan əlavə, 124 saylı avtobusun hərəkət istiqaməti də 20-ci sahəyə qədər uzadılıb. Bəzi marşrutların xəttən yığışdırılmasının səbəbi onların təkrarlanan istiqamətlərdə hərəkət etməsi ilə bağlı idi. Bu səbəbdən də onların xəttən çıxarılması məsələsi zəruri idi. Hazırda sərnişinlər bu məsələ ilə bağlı narahatdırlar. Onlar dəyişiklikliyə gec alışırlar. Amma bilməlidirlər ki, həyata keçirilən işlər onların rahatlığı üçündür.
Bundan əlavə, şəhərdaxili avtobuslar da açılacaq. Bunlar yeni alınan qırmızı rəngli avtobuslardır. Onu da qeyd edim ki, xətdən çıxarılan avtobusların sürücüləri də işsiz qalmayacaq. Onlar əvəzlənən marşrutlarda işlərini davam etdirəcəklər”.
Erməni diversanta hökm oxundu: 15 il
05.05.2015
Bu gün Gəncə Ağır Cinayətlər Məhkəməsində erməni kəşfiyyatçı Arsen Baqdasaryanın cinayət işi üzrə məhkəmə prosesinə yekun vurulub. Prosesdə erməni kəşfiyyatçıya hökm oxunub. Hökmə əsasən, erməni kəşfiyyatçı 15 il müddətinə azadlıqdan məhrum edilib.
Hakim Elbəy Allahverdiyevin sədrliyi ilə keçən proses saat 11:15 radələrində start götürdü. Hakimlər Zabil Qasımov və Elmin Rüstəmovun da iştirakı ilə - eyni heyətlə davam etdirilən məhkəmə prosesində Arsen Baqdasaryanın cinayət işi üzrə hökm oxunub. Hökmdə qeyd olunub ki, 2014-cü il dekabrın 26-da cəbhənin Ağdam rayonu istiqamətində qoşunların təmas xəttini keçən ermənilərin kəşfiyyat-təxribat qrupunun üzvü olan peşəkar hərbi qulluqçu Baqdasaryan Arsen Eduardoviç Azərbaycan Respublikası Cinayət Məcəlləsinin 12 maddəsi ilə ittiham edilib.
Quş qripi ilə bağlı növbəti monitorinq başladı
04.05.2015
Quş qripinin Azərbaycana köçəri quşlarla keçmə ehtimalını diqqət mərkəzində saxlayan Kənd Təsərrüfatı Nazirliyi yanında Dövlət Baytarlıq Nəzarəti Xidməti (DBNX) ölkə miqyasında ardıcıl monitorinqləri davam etdirir.
Dövlət Xidmətinin mətbuat mərkəzindən Ölkə.Az-a verilən məlumata görə, köçəri quşların yaz miqrasiyası nəzərə alınaraq mayın 4-dən növbəti monitorinq başlayıb. Monitorinq DBNX-nin, Səhiyyə, Ekologiya və Təbii Sərvətlər nazirliklərinin mütəxəssis və əməkdaşlarının iştirakı ilə aparılır.
Nəzarət tədbirinin köçəri quşların müvəqqəti məskunlaşdığı Abşeron yarımadası, Şabran, Salyan, Ağcabədi və Lənkəran rayonlarındakı milli qoruq və parklarda, həmçinin ölkənin dəniz sahili zonalarında və digər ərazilərdə həyata keçirilməsi nəzərdə tutulur. Bundan əlavə, monitorinq aparılan müddətdə quşçuluq və şəxsi təsərrüfatlardan da nümunələrin götürülməsi planlaşdırılır.
Bakıdakı 3 qapılı avtobuslar yığışdırılır
04.05.2015
Bakıda sərnişinnəqliyyatda böyük dəyişikliklər edilir.
Bakı Sərnişinnəqliyyat Məhdud Məsuliyyəti Cəmiyyətinin rəsmisi Vüqar İbrahimlinin verdiyi məlumata görə, paytaxtda xidmət göstərən iritutumlu avtobuslar yığışdırılır.
Onun sözlərinə görə, 3 qapılı “Daewoo” markalı avtobuslar yavaş-yavaş paytaxtdan yığışdırılacaq. Onların əvəzinə 2 qapılı orta və iritutumlu avtobuslar gətiriləcək.
İlham Əliyev sərəncam verdi — İdarə rəisi işdən çıxarıldı
04.05.2015
Rəşad Məmmədov Nazirlər Kabineti yanında Dövlət Bayrağı Meydanı Kompleksi İdarəsinin rəisi vəzifəsindən azad edilib.
Ölkə.Az-ın Apa-ya istinadən məlumatına görə, Azərbaycan prezidenti İlham Əliyev müvafiq sərəncam imzalayıb.
Qeyd edək ki, R. Məmmədov 2011-ci ilin aprelində Dövlət Bayrağı Meydanı Kompleksi İdarəsinin rəisi təyin edilib.
90 minə yaxın abituriyent tələbə olmaq istəyir
04.05.2015
Bu il Azərbaycanda ali məktəblərə qəbul olmaq üçün I-IV ixtisas qrupları üzrə 87932 nəfər abituriyent sənəd verib.
Ölkə.Az APA-ya istinadla xəbər verir ki, Tələbə Qəbulu üzrə Dövlət Komissiyasının (TQDK) sədri Məleykə Abbaszadə bu gün keçirilən mətbuat konfransında bildirib ki, onlardan 54 475-i bu ilin, 33457 nəfər əvvəlki illərin məzunlarıdır.
TQDK sədrinin sözlərinə görə, imtahanlarda iştirak edəcək qızların və oğlanların sayı da fərqlidir. Ali məktəblərə sənəd verənlərin 38 810 qız, 41 552 nəfəri isə oğlan abituriyentlərdir. Cari ilin məzunları arasında oğlanlar Azərbaycan bölməsi üzrə 25 871 nəfər, rus bölməsi üzrə 2 901 nəfərdir. Əvvəlki illərin məzunları arasında Azərbaycan bölməsi üzrə oğlanların sayı 15 681 nəfər, rus bölməsi üzə 679 nəfərdir.
Ölkə.az
