Azərbaycanda tikintisinə 90 min dollar ayrılan tualetin \"yubileyidir\"

5 il öncə Beyləqan rayonunda sanitar qovşağın təntənəli açılışı oldu.

"Ölkə.Az" xəbər verir ki, layihənin başa çatması münasibətilə Beyləqan şəhər 1 nömrəli tam orta məktəbdə mərasim keçirildi. Mərasimdə hətta Yaponiyanın ölkəmizdəki o dövrdəki səfiri Tsuquo Takahaşi də iştirak etdi.

Layihənin ümumi məbləğinin 90 min 300 ABŞ dollar olduğu açıqlandı.

Sanitar qovşaq adlandırılan tualetin açılışında o vaxtın icra başçısı Vaqif Abdullayev iştirak edib. Lakin o, 2018-ci il oktyabrın 5-i vəzifəsindən azad edilib. Onun yerinə isə rayonun hazırkı icra başçısı Asif Ağayev təyin olunub.

Ölkə.Az 90 min ABŞ dollarının ayrılan layihənin hazırda yararlı olub-olmamasını öyrənmək üçün icra hakimiyyətinin bütün müvafiq nömrələrinə zəng vursa da, dəstəyi açan olmadı. Həmçinin sayt məktəblə əlaqə saxlamağa çalışsa da, bütün cəhdlərə rəğmən sual ünvanına çatmadı.

Qeyd edək ki, yerli mətbuatda 5 il öncə mayın 4-ü sanitar qovşağın təntənəli açılışı ilə bağlı xəbərlər yayılmışdı.