\"Dindən bixəbərdirlər, meyit götürməyə hüquqları yoxdur\" - QMİ əməkdaşı

Lerikdə 3 uşaq anasının həmkəndlisi molla tərəfindən qətlə yetirməsi ilə bağlı məlumatlar son günlər din xadimləri ilə bağlı bir sıra məsələləri gündəmə gətirib.

Parlamentin bugünkü iclasında deputat Məlahət İbrahimqızı da bu məsələyə toxunub. O bildirib ki, din xadimlərinin seçilməsinə xüsusi diqqət yetirilməli, proses ictimaiyyətin, tanınmış adamların iştirakı ilə baş tutmalıdır.

Mövzu ilə bağlı “Ölkə.az”a danışan Qafqaz Müsəlmanları İdarəsinin əməkdaşı, ilahiyyatçı-alim Samid Quliyev bildirib ki, din xadimləri deyəndə rəsmi din xadimlərindən söhbət gedir:

“Din xadimləri Qafqaz Müsəlmanları İdarəsində imtahan komissiyasından keçdikdən sonra onlara rəsmiyyət verilir. 

Düzdür, mətbuat yazır ki, qətli törədən şəxs tanınmış din xadimi olub, amma onun bizdə rəsmiyyəti yoxdur. Sadəcə, kəndin meyit götürməyə belə hüququ olmayan ruhanisidir, yasin oxuyur. 

Rəsmiyyət verilən din xadimləri isə əvvəlcə rəsmi qaydada imtahan verirlər, daha sonra isə hər imtahandan keçən şəxs haqqında müvafiq qurumlara sorğu göndərilir. Əgər sorğunun nəticəsi müsbət olarsa, o, məscidə təyinat alır”. 

S.Quliyev yas məclislərində dindən bixəbər məsələlərdən danışan şəxslərin rəsmi din xadimləri olmadığını söyləyib:

“Yəni onlar savadsız olduqlarına görə rəsmiyyətə düşmək istəmirlər. İmtahandan keçə bilmədikləri üçün qeyri-rəsmi olaraq fəaliyyət göstərirlər. 

Bölgələrdə əksəriyyət insanlar tanışlıqla hərəkət edir. Bakı kimi böyük şəhərlərdə kiminsə yaxını rəhmətə gedəndə o məscidə müraciət edir. Amma kənd yerlərində birbaşa kənd mollasının yanına gedirlər. Bu da öz növbəsində müəyyən problemlərə yol açır. İnşallah, gələcəkdə qeyri-rəsmi fəaliyyət göstərən din xadimləri haqqında da qanunlar tətbiq olunacaq. Bunun qarşısını ancaq qanunvericiliklə almaq olar”.

 

Billurə Yunus