Qonaqlar Aysel və Raminin toyu haqqında danışdılar

Dünən gənc publisist-şairə Aysel Əlizadə və ölkədə kifayət qədər tanınan fəal gənc Ramin Hacılının hamı tərəfindən maraqla gözlənilən toy mərasimi baş tutdu. Olduqca maraqlı, fərqli keçən toy yaddaşlarda maraqlı xatirə olaraq hələ çox qalacaq

Ölkə.az olaraq toyda iştirak edən qonaqların bir qisminin fikirlərini öyrənməyə çalışdıq. Demək olar ki, qonaqların hər biri toyun orjinal tərzdə keçməsindən məmnun idilər. 

İqbal Ağazadə: “Yeni ailə quran gənclər mənə belə gəlir ki, heç kimə oxşamaq istəmədilər. Yeni yanaşmaydı. Yeni geyim tərzi, istər qonaqları qarşılamaq, istər toyun içərisində əhval ruhiyyə hamı üçün xoş idi. Ona görə də hesab edirəm ki, indiyə qədər daşlaşmış qəlibləri dağıtmaq üçün gəncləri daha sərbəst buraxmaq lazımdır ki, insanlar ən xoş günlərini necə istəyirlərsə, elə də qeyd edə bilsinlər. Ortada sevgi, sevgidən doğan nikah var idi. Onlara xoşbəxtlik arzu edirəm”.

Gunay Arda: “Aysel Əlizadə ilə mənim heç bir yaradıcılıq, və yaxud da dünya görüşü məsələləri birləşdirmir. Bizi birləşdirən bir-birimizə qarşı böyük sevgimizdir. Ramin Hacılı ilə biz “Dalğa”dan bir yerdə başlamışıq. Ramin mənim demək olar ki, əsgər yoldaşımdır. Toy həqiqətən də möhtəşəm idi. Gəlin ağ göyərçinə bənzəyirdi. Standartları qıra bilmişdilər. Yaxşı əyləndik. Yaxşı ifaçılar var idi. Ölkənin özünə güvənən nə yazarı var idisə, hamısı da orda idi. Təşkilatçılıq o qədər yüksək şəkildə olmuşdu ki, bir nəfər yox idi bir-biri ilə problemli adam olsun”. 

Qubad İbadoğlu: “Yeni bir üslubda, yeni bir tərzdə toy mərasimində iştirak etdik. Yaxşı istirahət etmiş olduq. Hər iki gənc ictimai nüfuzlu gənclərdir. Hesab edirəm ki, bu ailə də ictimai nüfuzlu bir ailə olacaq. Şərəfli bir qərar veriblər, hesab edirəm ki, şərəfli də davam edəcəklər. Onlar Azərbaycan cəmiyyətinə nümunə ailə olacaqlar”.

Cəlil Cavanşir: “Çox gözəl toy idi milli və müasirliyin sintezi. Eyni zamanda israfçılıq, səs-küyün az olması, qonaqların toyda yüksək mədəniyyətli iştirakı olması, belə deyim də, bir yazar olaraq mənim ürəyimcə oldu. Xeyli əyləndik və şəkillər çəkdirdik”.

Tural Abbaslı: “Toy ümumiyyətlə sevindirici haldır. İki gəncin ailə qurması, yeni həyata başlamaları istənilən halda toyun ssenarisi, təşkilindən asılı olmayaraq sevindirici haldır. Odur ki,  istər-istəməz müsbət emosiyalar oldu. Ramin bəy hər zaman ictimai həyatda həmişə qeyri-adiliyi ilə fərqlənib. Toyda da çalışmışdı o ampulasını qoruyub saxlasın. Məncə, bəlli bir dərəcədə buna nail də oldu. Hər halda çox maraqlı, rəngarəng toy idi. Elə bəylə gəlinin geyiminin özü fərqlilik yaratmışdı. Digər maraqlı hadisə isə o idi ki, adətən toy edənlərə hədiyələr olur, bu dəfə isə toy edənlər qonaqlara hədiyə verdilər. Hətta hədiyənin müəllifin özünün yazdığı bir kitab olması maraqlı bir nüans idi. Gənclərin sayı çox olması toyu canlı etdi. Sevinc əhval ruhiyyəsi duyulurdu. Yəni bizim öyrəşdiyimiz standart insanlar, standart çıxışlardan əlamət belə yox idi. Dəvətlilərin özü də çox maraqlı seçim idi. Ümumilikdə məndə xoş təsüratlar yaratdı. Sizin vasitənizlə hər ikisinə xoşbəxtlik arzulayıram”.

Ölkə.az