Milli Şuranın mitinqi təxirə salınıb
Milli Şura Bakı Şəhər İcra Hakimiyyətinin (BŞİH) mitinqlə bağlı cavab məktubunu müzakirə edib.
Ölkə.Az Report-a istinadən xəbər verir ki, bu barədə qurumun Koordinasiya Şurasının üzvü Oqtay Gülalıyev məlumat verib.
O bildirib ki, bu gün Milli Şuranın Koordinasiya Şurasının toplantısı olub və növbəti mitinqin mayın 16-da keçirilməsi məqsədə uyğun sayılmayıb.
O.Gülalıyev bildirib ki, İcra Hakimiyyətinin cavabı qanunvericiliyə zidd olduğuna görə məhkəməyə müraciət edəcəklər:
“Bakı Şəhər İcra Hakimiyyəti Milli Şuranın mayın 3-nə təyin etdiyi mitinqə razılıq vermədiyi üçün məhkəməyə verilib. Onların mayın 17-nə təyin etdiyimiz aksiyaya da razılıq vermədiklərinə görə, məhkəməyə müraciət edəcəyik”.
Xatırladaq ki, Bakı Şəhər İcra Hakimiyyəti mitinqin Yasamal rayonu, M.Seyidov küçəsi, 3155-ci məhəllədə yerləşən Yasamal Rayon İdman-Sağlamlıq Kompleksinin stadionunda (keçmiş “Məhsul”) 16 may 2015-ci il tarixdə saat 15:00-dan 17:00-dək keçirilməsinə razılıq verib.
Milli Şura isə mitinqi mayın 17-də keçirməyi planlaşdırırdı.
12.05.2015
Bakı Şəhər İcra Hakimiyyəti (BŞİH) Demokratik Qüvvələrin Milli Şurasının mitinq keçirilməsi ilə bağlı məktuba müsbət cavablandırıb.
Oxu.Az xəbər verir ki, Bakı Şəhər İcra Hakimiyyətinin mətbuat xidmətindən APA-ya daxil olan məlumata görə, meriya “Sərbəst toplaşmaq azadlığı haqqında” qanunun müddəalarına riayət olunmaqla 16 may 2015-ci il tarixdə saat 15:00-dan 17:00-dək Bakı şəhəri, Yasamal rayonu, M.Seyidov küçəsi, 3155-ci məhəllədə yerləşən Yasamal Rayon İdman-Sağlamlıq Kompleksinin stadionunda (keçmiş ”Məhsul” stadionu) mitinqin keçirilməsini razılıq verib.
Toplantı təşkilatçılarından xahiş olunub ki, “Sərbəst toplaşmaq azadlığı haqqında” qanuna əsasən, ayrı-seçkiliyə, ədavətə və ya zorakılığa çağırışlarla müşayiət olunan, milli, irqi və ya dini ədavəti təbliğ edən və təhqiredici şüarlardan istifadə olunmamasına ciddi nəzarət etsinlər.
Bakı Şəhər İcra Hakimiyyəti gələcəkdə planlaşdırılan mitinqlərin şənbə günlərinə təyin olunmasını məqsədəuyğun hesab edib.
Ölkə.Az
