Azyaşlı qız uşağı əməliyyatla dünyaya gətiribmiş - RƏSMİ AÇIQLAMA
Ağcabədi Rayon İcra Hakimiyyətində Yetkinlik yaşına çatmayanların işləri və hüquqlarının müdafiəsi üzrə komissiyası həmin rayonda 15 yaşlı qızın ana olması ilə bağlı yayılan məlumatlara münasibət bildirib.
Komissiyasının məsul katibi Vüsalə Məmmədova “Ölkə.az”a açıqlamasında bildirib ki, 15 yaşlı qızla bağlı araşdırmalara başlanılıb.
“15 yaşlı qızın uşaq dünyaya gətirməsi ilə bağlı yayılan məlumatlara araşdırılıb və təsdiqini tapıb. Həmin qız xəstəxanada qeysəriyyə əməliyyatı ilə uşaq dünyaya gətirib. Ona görə də araşdırma gedir. Öncəliyimiz anadır. Məsələ artıq nəzarətimizdədir. Bu məsələdə təqsirkar olan hər bir kəs cinayət məsuliyyətinə cəlb olunacaq və cəzalandırılacaqlar”.
V.Məmmədova 15 yaşlı qızın qeyri-rəsmi nikaha girib-girməməsi ilə bağlı hər hansı bir məlumat verməyib:
“İş araşdırmada olduğu üçün daha artlıq məlumat verməyimiz düzgün olmaz. Bu hadisə pandemiya dövründə olub. Pandemiya dövründə təhsil müəssisələrinin distant təhsilə keçməsi dövründə olub. Daha geniş araşdırma aparılacaq. Hazırda rayon polis şöbəsində istintaq gedir. Qeyri-rəsmi nigaha daxil olan şəxs, onun valideyni qanunvericiliyin tələblərinə uyğun cəzalandırılacaq”.
Xatırladaq ki, hamilə vəziyyətdə Ağcabədi Rayon Mərkəzi Xəstəxanasına gətirilən 2006-cı il təvəllüdlü S.İ-nin övladı dünyaya gəlib.
Onu da qeyd edək ki, Azərbaycan qanunvericiliyinə görə 16 yaşdan aşağı şəxslə cinsi əlaqədə olmaq cinayət sayılır. Nikaha girməyə isə 18 yaşı tamam olmuş şəxslərə icazə verilir.
Billurə Yunus
