Ekspertlərdən Konstitusiya Məhkəməsinin qərarına

Məhkəmə Plenumu Mülki Məcəllənin maddələrinin Konstitusiya ilə ziddiyyət təşkil etmədiyi qənaətinə gəlib. 

Kostitusiya Məhkəməsinin sədri Fərhad Abdullayevin sədrliyi ilə keçirilən iclasda Mülki Məcəllənin 439.1, 439.2 və 439.7-ci maddələrinin Konstitusiyaya uyğunluğunun yoxlanılması və həmin maddələrin bəzi müddəalarının şərh edilməsinə dair müzakirə aparılıb və qərar qəbul edilib.

Hüquqşünas Ələsgər Məmmədli Ölkə.az-a açıqlamasında bildirib ki, bu Mərkəzi Bankın iqtisadi qayğılarından doğan mülahizədir:

"Çox aydın şəkildə görünür ki, qərar müəyyən mülahizələrlə bankların xeyrinə qəbul olunub. Qərarda göstərilən son mülahizələr də birmənalı olaraq heç bir hüquqi aspektə hüquqa sığmır. Konstitusiya Məhkəməsinin belə bir tövsiyyə vermə səlahiyyəti yoxdur. Sadəcə olaraq Konstitusyaya uyğun olub olmadığı barədə qərar verə bilər. Mərkəzi Bankın qeyri-hüquqi, ancaq iqtisadi qayğılarından doğan mülahizədir. Konstitusiya Məhkəməsi bunu sənəd halına slaıb. Hüquqda hökmən əsaslılıq, məntiq onun yaranma səbəbi önəmlidir. Məhkəmə nədən belə qərar verdiyini son cümlələrdə göstərir. Sonda Mərkəzi Bankın bankarın müflis olma qorxusunun qayğıları əks ounub. Konstitusiya Məhkəməsi nəyi necə edəcəyi barədə banklara göstəriş verə bilməz".

İqtisadçı ekspert Samir Əliyev isə Konstitusiya Məhkəməsinin qərarına iqtisadi qiymət verərək münasibıətini belə ifadə edib:

"Konstitutsiya Məhkəməsinin qərarı gözlənilən idi. Qərar hüquqi olsa da iqtisadi mahiyyət daşıyırdı. İqtisadi amillər hüquqi qərara təsir göstərdi. Məqsəd hazırda təhlükə altında olan bank sektorunu qorumaq idi. Çünki bank sektorunun çökməsi ümumilikdə ölkə iqtisadiyyatını çökdürə bilərdi. Və bunun zərəri əhali indikindən dəfələrlə çox olardı. Ancaq bank sektorunun problemi bununla həll olunmayacaq. Hazırda bankların qarşısında daha çətin problemlər durur. Bank sektoru bu dəfə əhalinin hesabına xilas oldu. Ancaq gələn dəfə əhali də kömək edə bilməyəcək. Hökumətin dəstəyi çox vacibdir".

Qeyd edək ki, Konstitusiya Məhkəməsi əhalinin maraqlarını nəzərə alaraq, xarici valyutada verilmiş kreditlər üzrə kredit müddətinin uzadılması, faiz dərəcələrinin aşağı salınması və digər güzəştli şərtlərin tətbiqi üzrə tədbirlərin bankların maliyyə imkanlarından asılı olaraq həyata keçirilməsi məqsədəmüvafiq hesab edib.

Həsən
Ölkə.az