Baykerlərimiz Azərbaycan bayrağını San-Tropedə dalğalandırdılar
Onlar Avropa Oyunlarının təbliğatını aparıblar.
Bakı 2015 Avropa Oyunlarını təbliğ etmək məqsədi ilə moto-yürüşə başlayan azərbaycanlı baykerlər artıq Bakıya dönürlər.
Ölkə.Az xəbər verir ki, azərbaycanlı baykerlər komandası “Land of Fire”, Bakıdan Fransaya yürüş edərək, yolboyu Avropa Oyunları ilə bağlı təbliğat aparıblar və 7-10 may tarixində Grimo şəhərinin San-Trope buxtasında Avropa Motofestivalında ölkəmizi təmsil ediblər.
Komandamız əlavə olaraq, Avropa Motofestivalında Avropa Oyunları ilə bağlı təbliğat aparıblar, motofestival bitəndən sonra isə geriyə dönüblər.
Qeyd edək ki, aprelin 28-də azərbaycanlı baykerlər Bakı 2015 Avropa Oyunlarını təbliğ etmək məqsədi ilə moto-yürüşə başlayıblar.
Onlar iki qrupdan ibarət olublar. Birinci qrup Gürcüstandan keçərək Ukraynaya daxil olub, Macarıstan, Slovakiya ölkələrindən keçərək İtaliyada ikinci qrupun üzvləri ilə görüşüblər. İkinci qrup isə Gürcüstandan Türkiyəyə daxil olub, Bolqarıstan, Serbiya, Sloveniyadan keçdikdən sonra birinci qrup ilə birləşib Fransaya daxil olublar.
6 000 kilometr qət edib Fransanın San-Trope buxtasında Avropa Motofestivalına qatılan baykerlərimiz, mayın 11-dən sonra daha 6 000 kilometr yürüş edib Bakıya qayıtmağa başlayıblar. Ümumilikdə azərbaycanlı baykerlər komandası “Land of Fire” 12 ölkənin ərazisində, 12 000 kilometr yürüş edəcəklər.