Bina yanğını kimin təxribatıdır?
Binəqədi rayonu ərazisində bina yandı, insanlar həlak oldu, uşaqların fəryadına tamaşaçı qaldıq...
Fransa mütəfəkkirlərindən birinin dediyi kimi; “susanlar fiziki yanır, danışanlar isə mənəvi”.
Deyirlər ki, bu binanın yanması Prezidentə təxribatdır. Düzdür, ola bilər. Dünyanın heç bir prezidenti təxribatdan sığortalanmayıb, hər bir ölkədə bu və buna bənzər hadisə ola bilər. Amma....
İllərdir deyilir ki, binaları iç-içə tikməyin, səkilərin üzərini satmayın, yaşıllığı məhv etməyin, pula satmayın hər şeyinizi. Qanunlar da bunu tələb edir. Hüquq da.
Mənzərə isə budur; Yanğınsöndürən maşınlar hərəkət edə bilmir, çünki binalar yaxın tikilib, texnika və peşəkar kadrlar defisiti var, fövqəladə hala hazır deyil dövlət, binalarda yanğın əleyhinə sistem quraşdırılmayıb, içi daxmaya oxşayan binaların üzü tez alışan materialdan üzlənib. Bu pozuntuların da əksəriyyəti Fövqəladə Hallar Nazirliyinin sahəsidir. Bakı Şəhər İcra Hakimiyyəti də az günahkar deyil. Yeri gəlmişkən, məsuliyyəti üzərinə götürən qurum olmayacaq, hər kəs başqasını ittiham edəcək, çünki havayı gələn neft pulu dövlət idarələrinin çoxalmasına və məsuliyyətin bölüşməsinə səbəb olub. Ancaq tam əmin deyirəm ki, binalara tikilmə yerini, təhlükəsizlik sistemini və s... “təmin etməyə” borclu qurum Kamaləddin Heydərovun naziri olduğu qurumdur.
Nədir, mətbuata pul verib susdurmusunuz və istədiyiniz kimi bazar quracaqsınız? Danışanda da adımızı müxalifətçi qoyub həbs etdirəcəksiniz? Bu qapalı cəmiyyyət təfəkkürü ilə idarə olunan SSRİ gözünüzün önündə dağılmadımı?!
Qardaş, qərar verin, biznesmensiniz ya dövlət məmuru?
Tamam hamımız susaq, heç kimin xətrinə dəyməyək... Nəticə belə olacaq, gördüyünüz kimi...
Xoşqədəm Hidayətqızına 80 mindən çox müraciət daxil olub, Zaur Baxşəliyevə 100 mindən çox. Deməli, bu verilişləri bağlayıb, vəziyyəti ört-basdır etməkmi çıxış yoludur, ya problemləri həll etməkmi? Xalqı başa düşdük, Prezidenti aldadacaq qədər cəsarətlimi olmusunuz? Qanunu başa düşdük, öz gələcəyinizi dəmi düşünəcək ağlınız qalmayıb?
Ard-arda binalar yanacaq, yox yerdən problem olacaq, xalq da deyəcək, hansısa məmur pul qazansın deyə keyfiyyətsiz iş görür və s... Vətəndaşlar da qeyri-müəyyən danışığı ilə siyasətçidən çox siyasi xadim olub, elə bil...
Yeri gəlmişkən, oliqarxları niyə həbs edirlər məmurları yox? Axı məmur iştirakı olmadan onlar dövlət büdcəsindən 4 milyarddan çox ABŞ dolları oğurlaya bilməzdilər. Axı hamısı DÖVLƏT məmurları ilə əlbir olub, onların “haqqı”nı verib, öz payını mənimsəyib.
Bu gün Azərbaycanda əzab çəkənlər bizim millətdən deyilmi, niyə susur millətçilər? Yalnız kimisə “razborkaya” çağırmaq, boz qurdu qorumaqdımı işiniz?!
İnsanları banklar müflis edir, solçular da başqa fazada, heç kimi bəyənməyən, beyin əzələsinin nümayişi ilə məşğuldurlar. Kimə lazımdır sizin “Ezop diliniz”?!
Sanki, ölkə əhalisi xristiandır, müsəlmanlar ancaq, Allahı qorumağa, peyğəmbərə mühafizəçi olmağa çalışır, sanki, müsəlman qardaşının dərdi onun deyil. Sanki, düşmənə qarşı savaşdan keçir cənnətə yol.
Zülm çəkənlər kölələrdirmi yalnız, yoxsa kasıblardır ancaq? Liberal adına iddia edən “mütəfəkkir”lər dahiyanə statuslar yazır, durmadan. Eyib deyilmi, ağılvermə pozası ilə ittihamedicilik?!
Bir məsələni aydın, dəqiq və birmənalı bilmək lazımdır problemin həlli üçün öncə onu dilə gətirmək, etiraf etmək, sonra mütəxəssis diaqnozu əsasında həll etmək lazımdır. Necə ki, bir xəstəliyin müalicəsi xəstənin həkimə müraciətindən və öz xəstəliyini etiraf etməsindən keçir.
Sosialogiyanın girişində ilk gözə sataşan da budur; “Cəmiyyət orqanizm kimidir...”
Sonda... Prezidentini, dövlətini, vətənini qorumaq istəyən səmimi başbilənlərimiz gərək peşəkar kadrlara, şərəfli insanlara və qanunların aliliyinə üstünlük versin.
Ramin Hacılı
