İdmana ayrılan milyionlar və "saunaya" çevrilmiş idman kompleksləri

Son 20 ildə ölkə rəhbərliyinin idman hərəkatının inkişafına yönəltdiyi diqqət və bu sahəyə ayrılan vəsaitlərin həcminə görə, Azərbaycan dünyada liderdir.

Bütün beynəlxalq idman federasiyaları və assossiasiyalarının rəsmi hesabatlarında Azərbaycanda bu sahəyə ayrılan diqqət öz əksini tapıb. Tikilən idman-sağlamlıq komplekslərinin, idman komandalarının saxlanmasına, onların bütün beynəlxalaq yarışlarda iştirakının təmin edilməsinə hər il büdcədən on milyonlarla manat vəsait ayrılır. Amma yenə müxtəlif idman federasiyaları və komandalar yarışlara getmək üçün maliyyə problemləri ilə üzləşir, idman komplekslərində yaranan kommunal və ya texniki problemlərə görə məşqlərini davam etdirə bilmirlər.

İdman kompleksləri yoxsa ucuz sauna?

Ölkəmizin bütün bölgələrində tikilmiş nəhəng idman olimpiya komplekslərinin tikintisindən çox, dövlət bu idman arenalarının saxlanmasına vəsait xərcləyir. Apardığımız bir araşdırmanın nəticələrinə görə, hər idman kompleksinin saxlanması, işlək vəziyyətdə olması üçün ən az 20-30 işçiyə ehtiyac duyulur. (bura məşqçilər, təsərrüfat işçiləri, rəhbərlik, dəftərxana işçiləri daxildir). Araşdırmalarımız nətincəsində məlum oldu ki, baxımı Gənclər və İdman nazirliyinə tapşırılmış bu komplekslərdə 50-60 və daha çox adamın adları işçi kimi qeydlidir. 200-400 manat arası maaş yazılmış bu əməkdaşların adları lazım olmayan sahələrə işçi kimi qeydə alınıb və o adamları da bu komplekslərdə həqiqətən işləyən işçilərin heç biri tanımır. Təxmini hesablamalarımıza görə, Gənclər və İdman nazirliyinin mühasibatı hər ay "saxta işçilərin" adına hər kompleksdən təxminən 5000 -10000 manat arası pulu birbaşa dövlət büdcəsindən mıənimsəyir. Bundan başqa idman tədbirlərinin keçirilməsi üçün arenanın, zalın icarəsi, habelə komplekslərdəki hovuz və saunaya kənardan müştərilərin buraxılması ilə birlikdə hər kompleks təxminən 30 000 - 40 000 manat əlavə gəlir gətirir ki, bu da nazirliyin rəhbərliyi tərəfindən mənimsənilir. Araşdırmalarımızdan məlum oldu ki, idman komplekslərindəki saunaların müştəriləri adi saunalardakından daha çoxdur. Buna səbəb isə buradakı qiymətlərin nisbətən ucuz olmasıdır. Bundan başqa gələnlərin əksəriyyətinin saunaya "tək gəlmədiyini" nəzərə alsaq, komplekslərin polis reydlərindən "sığortalı" olmasına görə sauna intim massaj həvəskarları eyş-işrət məclislərini idman komplekslərində keçirməyi tərcih edirlər.

Araşdırmalarımız zamanı məlum oldu ki, hətta bir çox idman komplekslərinin idmançılar üçün nəzərdə tutulmuş sauna-hovuz hissəsi ümumiyyətlə bağlıdır və ancaq gecələr "pullu müştərilər" üçün açılır. Bu isə getdikcə idmançı yetişdirmək üçün nəzərdə tutulmuş, dövlət büdcəsinə milyonlarla vəsaitə başa gəlmiş müasir komplekslərin Gənclər və İdman nazirliyinin rəhbərliyindəki bəzi işbazların gəlir mənbəyinə çevrilməsi deməkdir...  (ardı var)

Bu istiqamətdəki araşdırmalarımızı davam etdiririk və gələcək materiallarımızda oxucularımıza bu sahədə baş verən qanun pozuntuları haqqında daha ətraflı məlumat verəcəyik.

Ölkə.az, Monitorinq şöbəsi