Quba-Bakı yolu nə zaman düzələcək: \"Yenidən qurulmalıdır\" - VİDEO

Quba-Bakı yolunun asfalt örtüyünün bərbad vəziyyətdə olması, avtomobillərin hərəkətinə maneə yaradır.

“Ölkə.az” xəbər verir ki, tez-tez həmin yolla hərəkət edən sürücülər vəziyyətdən narazıdır.

Onların sözlərinə görə, asfalt örütüyündəki çatlamış və dağılmış hissələr avtomobilə zərər vurur. Bildirilir ki, son illər ümumiyyətlə ərazidə gediş-gəliş çətinləşib.

Azərbaycan Avtomobil Yolları Dövlət Agentliyinin mətbuat katibi Anar Nəcəfli "Ölkə.az" a açıqlamasında bildirib ki, həmin ərazidə əsaslı təmiş işləri aparılmalıdır:

“Nəqliyyatın hərəkətini normallaşdırmaq üçün sözügedən ərazidə təmir işləri aparılsa da, kifayət etmir. Həmin yol əsaslı şəkildə yenidən qurulmalıdır.  Hazırda biz həmin yolun Sumqayıt yoluna qədər olan hissəsində - 14 km-lik hissədə iş aparırıq. Bu işlər mərhələli şəkildə aparılır. Həmin yoldakı işlər yekunlaşdıqdan sonra Hacı Zeynalabdin Tağıyev qəsəbəsindən keçən hissədə işlər görüləcək. Təmir işlərinin mərhələli şəkildə davam etdirilməsi nəzərdə tutulub. Həmin yolda nə vaxt təmir işlərinin başlayacağı dəqiq məlum deyil. Çünki bunlar maliyyə vəsaitinə bağlı olan məsələlərdir. Maliyyə vəsaiti ayrıldıqca işlər həyata keçirilir”. 

Oxucumuzun sözügedən yolu çəkərək görüntüləri Ölkə.Az-a göndərib. Onun sözlərinə görə, asfalt örtüyünün videoda yer alan hissəsi hələ "ən yaxşı" hesab olunan yerləridir.

Billurə Yunus