Həftənin icmalı
Azərbaycanda bəzi ali məktəblərə tələbə qəbulu aparılmayacaq
18.05.2015
Azərbaycan Respublikasının Prezidenti yanında Təhsil üzrə Komissiyanın qərarı ilə 2015-2016-cı tədris ili üçün Azərbaycan Respublikasının ali təhsil müəssisələrinin bakalavriat, magistratura, rezidentura səviyyələrinə və orta ixtisas təhsili müəssisələrinə tələbə qəbulu planları təsdiq edilib.
Ölkə.Az Təhsil Nazirliyinin məlumatına istinadla xəbər verir ki, ötən tədris ilinin faktiki qəbuluna nisbətən növbəti tədris ili üçün bakalavriat səviyyəsinə qəbul planı 4,6 faiz artırılaraq 39 497 yer (onlardan 11 799 dövlət sifarişli) müəyyən olunub. Qiyabi təhsil forması üzrə plan yerləri 77 faiz azaldılıb, bu yerlərin hesabına əyani təhsil üzrə tələbə qəbulu artırılıb. Müəllimlik ixtisasları üzrə qiyabi təhsil forması üzrə qəbul planlaşdırılmayıb.
Azərbaycanın Rusiya ilə sərhədində xüsusi əməliyyat keçirilir
18.05.2015
Azərbaycanın Rusiya ilə sərhəd rayonlarında genişmiqyaslı əməliyyatlara başlanıb.
Ölkə.Az xəbər verir ki, APA-nın məlumatına görə, əməliyyatlar Azərbaycanın şimal və şimal-qərb bölgəsini əhatə edir.
“Sərhəd-sipər” şərti adı altında keçirilən əməliyyatlarda Azərbaycanın daxili işlər orqanları ilə yanaşı, Rusiyanın hüquq-mühafizə orqanları da iştirak edir.
Yerli sakinlərin verdiyi məlumata görə, aparılan əməliyyatlara bağlı Balakən, Qax və Şəki rayonlarında xüsusi polis postları qurulub. Polis əməkdaşları tərəfindən rayona girən və çıxan avtomobillər yoxlanılır.
Azərbaycanda pilotsuz mini uçuş aparatı hazırlanıb
19.05.2015
Azərbaycan mühəndisləri “Smartplane” adlı pilotsuz mini uçuş aparatı hazırlayıb. Bu barədə Trend-ə ölkənin telekommunikasiya bazarındakı mənbə bildirib.
Mənbənin sözlərinə görə, layihə “Yüksək Texnologiyalar Parkı” MMC (YTP) tərəfindən dəstəklənib və bütün işlər orada aparılıb.
Azərbaycan mühəndislərinin hazırladığı yeni aparat ərazinin şəklinin çəkilməsində istifadə edilə bilər. Aparatı Android və iOS əməliyyat sistemli portativ kompüter, həmçinin smartfon və planşet kompüter vasitəsilə idarə edilə bilər.
Bakıda 16 mərtəbəli yaşayış binası yanır
Azadlıq prospektində baş vermiş yanğınla əlaqədar sürücülərə xəbərdarlıq
19.05.2015
Azadlıq prospektində yerləşən binada baş vermiş yanğın nəticəsində nəqliyyat vasitələrinin hərəkəti məhdudlaşdırılır.
Bu barədə Ölkə.Az-a Nəqliyyat Nazirliyi Nəqliyyatı İntellektual İdarəetmə Mərkəzindən (NİİM) məlumat verilib.
Sürücülərə alternativ olaraq Şövkət Məmmədova küçəsindən istifadə etmələri tövsiyə olunur.
Bakıda yanğın baş verən binanı üzləyən şirkətin rəhbəri həbs edildi
19.05.2015
Bakıda yaşayış binasında baş verən yanğınla bağlı həyata keçirilən istintaq və əməliyyat-axtarış tədbirləri Azərbaycan Respublikası Prezidentinin nəzarətindədir. Trend-in məlumatına görə, bu barədə Baş Prokurorluq, FHN və Daxili İşlər Nazirliyinin mətbuat xidmətlərinin yaydığı birgə məlumatda qeyd edilir.
Məlumatda deyilir ki, ki, 2015-ci il mayın 19-da, saat 11 radələrində Bakı şəhəri, Binəqədi rayonu, Azadlıq prospekti, 200/36 ünvanında yerləşən çoxmərtəbəli yaşayış binasında yanğın baş verib. Hadisə yerinə dərhal Fövqəladə Hallar Nazirliyinin Dövlət Yanğından Mühafizə Xidmətinin canlı qüvvəsi, texnikası, Səhiyyə Nazirliyinin Təcili Tibbi Yardım xidmətləri cəlb edilib. Hadisə yerinin mühafizəsi və xilasedicilərin maneəsiz fəaliyyəti Daxili İşlər Nazirliyinin Çevik Polis Alayının və paytaxtın polis orqanlarının əməkdaşları tərəfindən təmin edilib.
Mehriban Əliyeva: Hadisənin səbəbkarları cəzalarını alacaqlar
20.05.2015
Mayın 20-də Azərbaycanın birinci xanımı, Heydər Əliyev Fondunun prezidenti Mehriban Əliyeva 1 nömrəli Bakı Kliniki Tibbi Mərkəzinə gələrək Binəqədi rayonundakı çoxmərtəbəli yaşayış binasında baş vermiş yanğın nəticəsində xəsarət alanların vəziyyəti ilə maraqlanıb.
Ölkə.Az AzərTAc-a istinadən xəbər verir ki, səhiyyə naziri Oqtay Şirəliyev Azərbaycanın birinci xanımına burada müalicə alanların səhhəti barədə məlumat verdi.
Bildirildi ki, mayın 19-da paytaxtın Binəqədi rayonunda baş verən yanğın zamanı ümumilikdə 56 nəfər tibbi yardım üçün müraciət edib. Onlardan 15-nə yerindəcə tibbi yardım göstərilib, 41 nəfər isə xəstəxanalara yerləşdirilib. Xəstəxanalara yerləşdirilənlərdən 26-sı mayın 19-da buraxılıb. Bir nəfər isə həkimlərin səyinə baxmayaraq, dünən gecə dünyasını dəyişib. Beləliklə, yanğın zamanı ölənlərin sayı 15-ə çatıb. Hazırda 14 nəfərin xəstəxanalarda müalicəsi davam etdirilir. 1 nömrəli Bakı Kliniki Tibbi Mərkəzinin toksikologiya şöbəsində isə 12 xəstə müalicə alır. Xəsarət alanlardan üçü uşaqdır. Onlar üç, dörd və altı yaşlarındadırlar.
MTN-dən yanğınla bağlı — Açıqlama
20.05.2015
Mayın 19-da Binəqədi rayonu, Azadlıq prospektindəki binada baş verən yanğın hadisəsi bütün Azərbaycanı sarsıtdı.
Hadisə yerinə gələn Baş prokuror Zakir Qaralov ilkin ehtimal olaraq yanğına səbəb kimi binaya vurulan keyfiyyətsiz üzlüklərin olmasını göstərib.
Bir çoxları baş verən hadisədə Bakı şəhər İcra Hakimiyyətini, Fövqəladə Hallar Nazirliyini, Binəqədi rayonu İcra Hakimiyyətini günahlandırsa da, olayı iyunun 12-28-də tarixlərində Bakıda keçiriləcək 1-ci Avropa Oyunlarına qarşı təxribat kimi dəyərləndirənlər də var.
Modern.az saytı məsələylə bağlı Milli Təhlükəsizlik Nazirliyindən (MTN) mövqe öyrənməyə çalışıb.
Nazirliyin İctimai əlaqələr mərkəzinin rəhbəri Arif Babayev Modern.az saytına açıqlamasında bildirib ki, hadisənin təxribat olub-olmadığı barədə ictimaiyyətə məlumat veriləcək: “Yanğın hadisəsinin təxribat olub-olmaması barədə yanğınla əlaqədar yaranan dövlət komissiyasının sədri açıqlama verəcək”.
ABŞ Azərbaycan xalqına başsağlığı verdi
20.05.2015
ABŞ-ın Azərbaycandakı səfirliyi dünən Bakının Binəqədi rayonunda baş vermiş yanğının qurbanları ilə bağlı Azərbaycan xalqına başsağlığı verib.
Ölkə.Az xəbər verir ki, bu barədə səfirliyin Facebook səhifəsində məlumat verilib.
“Birləşmiş Ştatların xalqı və hökuməti yaşayış evində baş vermiş faciəli yanğınla bağlı dərin hüzn ilə başsağlığı verir və yanğın qurbanlarının ruhuna dualar diləyir. Həyatlarını itirənlərə Allahdan rəhmət, yaralananlara isə tezliklə sağalmağı diləyirik”, - başsağlığında qeyd olunub.
İcra başçısı: "Ekspert rəyindən sonra bütün binaların belə üzlükləri söküləcək"
21.05.2015
Binəqədi rayon İH başçısı Xaləddin İskəndərov bu gün yenə yanan binaya baş çəkib.
İcra başçısı hadisə yerində olan Ölkə.az müxbirinə verdiyi açıqlamasında bildirib ki, yanan binanın sakinlərinin hamısı müvəqqəti qalmaq üçün evlə təmin olunublar. Onların bir çoxu Abşerondakı sanatoriyalarda, bəziləri digər yaşayış masivvlərində yerləşdiriliblər və bütün şəraitlə təmin olunublar. Hökumətin verdiyi evlərdə qalmaq istəməyən vətəndaşlarımıza isə yardım göstərilib.
İcra başçısı hımçinin bildirib ki, hazırda inşaat sahəsi üzrə ekspertlər penoplast üzlüklü digər binalarda yoxlama aparırılar. Hazırda rayon ərazisindəki 30, 24, 18, 14 saylı yaşayış binalarının üzlüyü sökülür. Biz ekspertlərin rəyinə uyğun hərəkət edəcəyik. Onlar hansı binanın üzlüyünün sökülməsini vacib hesab etsələr, həmin binanın üzlüyü də söküləcək", deyə Xaləddin İskəndərov bildirib.
“Avropa Oyunları bu faciə qarşısında heçə bərabərdir”
20.05.2015
“İndi Avropa Oyunları, başqa tədbirlər bu faciə qarşısında heçə bərabərdir”.
Bunu bu gün Azərbaycan Prezidenti İlham Əliyev Binəqədi rayonu ərazisində çoxmərtəbəli binada baş vermiş yanğınla əlaqədar Dövlət Komissiyasının iclasında deyib.
Prezident bildirib ki, Nazirlər Kabineti tezliklə həm həlak olanların ailələrinə, həm də yaralılara göstəriləcək maddi köməyin həcmini müəyyən etməli və bununla bağlı təklif verməlidir: “Burada da yubanma olmamalıdır, bu iş çox vaxt aparmamalıdır. O vaxta qədər Bakı şəhər İcra Hakimiyyəti bütün qalan məsələləri öz üzərinə götürür”.
Yanğına səbəb olan üzlüklər hansı xəstəliklər yaradır? — Ekspertin açıqlaması
21.05.2015
"Binalara vurulan fasadlar təkcə yanan zaman təhlükəli olmur. Günəş təsirindən qızdıqda özündən ərafa zəhərli maddələr buraxır".
Bu fikirləri Ölkə.az- açıqlamasında tibb elmləri doktoru, professor Adil Qeybulla deyib. O bildirib ki, bu materialı ölkəyə gətirən insanlar genofondumuzu ciddi təhlükə qarşısında qoyduqlarını dərk eməlidirlər:
"Binaların bu cür materiallarla üzlənməsi dügün deyil. Onun tərkibində ekoloji cəhətdən təhlükəli və insanların sağlamlığına ziyan vuran maddələr var. Bunu ölkəyə gətirənlər bilməlidirlər ki, genofondumuzu təhlükə qarşısında qoyurlar:
"Urbanizasiyanın çox getdiyi yerlərdə xərçəng riskini 1 kubmetr havada konsilogen maddələrin olması, politik, aromatik karbohidratların miqdarı ilə müəyyən edirlər. Binalara vurulan üzlüklərin tərkibində isə bu maddələr həddən artıq çoxdur. Sübut olunub ki, 1 kubmetr havada 1 nanoqram benzokratilin maddəsi varsa, bu xərçəng təhlükəsi yaradır. Üzlükdə istifadə olunan material təkcə yananda yox, eyni zamanda günəş təsirindən qızdıqda ətrafa zəhərli maddələr buraxır ki, bu da ağciyər xərcənginin yaranmasında səbəb olur".
Ölkə.Az ilin ən yaxşı xəbər saytı seçildi
21.05.2015
Mükafatın qalibləri rəsmi mükafatlandırma mərasimində elan olunub.
Dünən "Park INN Radisson"da internet və informasiya texnologiyaları üzrə peşəkar "NETTY2015" müsabiqəsinin mükafatlandırma mərasimi keçirilib. Tədbirdə iri İT-şirkətlərinin nümayəndələri, mükafatın nominantları, KİV nümayəndələri və çoxsaylı qonaqlar iştirak ediblər.
Ölkə.Az informasiya portalı müsabiqənin "İnformasiya və xəbərlər" nominasiyasında "NETTY2015" Azərbaycan Milli İnternet Mükafatına layiq görülüb. Mükafat Ölkə.az xəbər saytının baş direktoru Məmməd Gülməmmədova təqdim olunub.
Virtual Jüri və Ekspert Şurasının səsverməsi nəticəsində iştirakçı-saytların ümumi sayından 40-dan çox resurs seçilib. Qaliblər akademiyanın üzvləri daxili səsvermə əsasında hər nominasiya üzrə müəyyən ediliblər.
Nazir: Azərbaycan əhalisinin sayı 11 milyona çatacaq
21.05.2015
“Proqnoza əsasən 2025-ci ildə doğulanların sayı 205 300 nəfərə çatacaq, əhalinin sayının isə 10 milyon 970 min 300 nəfər təşkil edəcəyi gözlənilir.
Bu sözləri əmək və əhalinin sosial müdafiəsi naziri Səlim Müslümov “Məlumat mübadiləsi saatı”nın növbəti iclasında bildirib.
Nazir əmək bazarındakı vəziyyətə də toxunub:
“Əmək bazarı ilə bağlı beynəlxalq göstəricilər əsasında aparılan təhlillər göstərir ki, hələ 2010-cü ildə Azərbaycanda məşğulluq səviyyəsi 61,2 % olmaqla Rusiyadakı 57,9 %, Türkiyədəki 43 %, Avropa Birliyinin üzvü olan Bolqarıstandakı 59,7 %, Latviyadakı 59,3 % və s. ölkələrdəki müvafiq göstəriciləri üstələyib.
Sonrakı illərdə ölkəmizdə bu göstərici daha da yüksəlmiş, halbuki digər dövlətlər haqqında bunu demək olmaz”.
Nazir ölkəmizdəki işsizlik səviyyəsinin 4,9 % olmaqla, Avropa məkanındakı 11,5 %-lik, Avropa Birliyindəki 10 %-lik göstəricidən aşağı olduğunu qeyd edib:
Putin Bülbüloğluna orden verdi
21.05.2015
Rusiya Prezidenti Vladimir Putin Azərbaycanın Rusiya Federasiyasındakı səfiri Polad Bülbüloğlunu “Şərəf” ordeni ilə təltif edib.
V.Putin bu gün Kremldə dövlət mükafatlarını təqdim edib. Ümumilikdə 40 nəfər mükafata layiq görülüb. Onların arasında elm və mədəniyyət xadimləri, kənd təsərrüfatı və digər sahələrin əməkdaşları, siyasətçilər, diplomatlar, dini təşkilatların nümayəndələri, ictimai xadimlər, idmançılar, kosmonavtlar və iş adamları var.
Azərbaycanda uşaqlarını evdə tək qoyanlar cərimə ödəyəcək
21.05.2015
Azərbaycanda yetkinlik yaşına çatmayan uşaqların təlim-tərbiyə vəzifələrini lazımınca yerinə yetirməyən valideynlərə və onları əvəz edən şəxslərə qarşı cəzalar sərtləşdirilir.
Milli Məclisdən verilən məlumata görə, "İnzibati Xətalar Məcəlləsində dəyişikliklər edilməsi haqqında" qanun layihəsinə əsasən, təlim-tərbiyə vəzifəsini lazımınca, eyni zamanda, üzrlü səbəblər olmadan yerinə yetirə bilməyən valideynlər və onları əvəz edən şəxslər yetkinlik yaşına çatmayanların baxımsız qalmasına görə də cərimə ediləcəklər. Bu cərimənin məbləği isə 60 manatdan 100 manata kimi olacaq.
Etibar Pirverdiyevin istintaqa cəlb olunması xəbəri ilə bağlı açıqlama — RƏSMİ
22.05.2015
“Azerenerji” Açıq Səhmdar Cəmiyyətinin sədri Etibar Pirverdiyevin mayın 19-da "Bank işi" ilə bağlı Baş Mütəşəkkil Cinayətkarlıqla Mübarizə İdarəsində bir neçə saat dindirilməsi barədə “Yeni Müsavat” qəzeti xəbər yayıb.
Qəzetin yazdığına görə, E.Pirverdiyevlə Beynəlxalq Bank arasında borca görə məhkəmə çəkişməsi də olub.
“Azərenerji” ASC-nin mətbuat xidməti rəhbərinin müavini Ələkbər Baxşəliyev Ölkə.az-a açıqlamasında bildirib ki, yayılan xəbər şaiyədir:
"Etibar Pirverdiyev hazırda iş başındadır. Heç bir yerə çağrılmayıb. Yayılan məlumatlar həqiqəti əks etdirmir".
Hacıbala Abutalıbov: O dünyada əzab çəkəcəm
22.05.2015
Əgər burada bir ailə bir itki veribsə, mənim 15 yaxınım ölüb.
Ölkə.Az xəbər verir ki, bunu Bakının Binəqədi rayonunda yanan 16 mərtəbəli binanın sakinləri ilə görüşündə Bakı Şəhər İcra Hakimiyyətinin rəhbəri Hacıbala Abutalıbov deyib.
"Siz ele bilirsiz mən əzab çəkmirəm? Mən 15 yaxınımı, əzizimi itirmişəm. Onlar mənim əzizlərim, övladlarım, bacı-qardaşımdır. Çox əzab çəkirəm. Hələ bu harasıdır, öləndən sonra o biri dünyada da əzab çəkəcəyəm".
Ramil Usubov qəhrəman polisi və fotoqrafı təltif etdi
22.05.2015
Azərbaycanın daxili işlər naziri, general-polkovnik Ramil Usubov paytaxtın Binəqədi rayonu ərazisində yerləşən çoxmərtəbəli yaşayış binasında baş vermiş yanğın zamanı cəsarət və fədakarlıq göstərərək tüstüdən boğulan körpəni alovların içindən sağ-salamat çıxardığına görə dünyanın nüfuzlu media orqanları tərəfindən "qəhrəman polis" adlandırılan polis əməkdaşı Elvin Abışovu və ekstremal şəraitdə peşə borcunu ləyaqətlə yerinə yetirərək əsl vətəndaşlıq mövqeyi nümayiş etdirən fotomüxbir Orxan Əzimovu qəbul edib.
Daxili İşlər Nazirliyinin mətbuat xidmətindən verilən Ölkə.Az-a məlumata görə, xidməti və vətəndaşlıq borclarını layiqincə yerinə yetirdiklərinə görə onlara təşəkkür edən nazir cənab Prezidentin tapşırığı ilə fərqlənmiş əməkdaşların dövlət təltiflərinə təqdim olunacaqlarını, eyni zamanda, onların mükafatlandırılması barədə müvafiq əmrlər imzaladığını bildirib.
Azərbaycan və Rusiya Xəzərdə birgə hərbi təlim keçirəcəklər
22.05.2015
Xəzər dənizində ilk dəfə Azərbaycan və Rusiya birgə hərbi təlimi keçiriləcək, bu təlimlərə ona yaxın gəmi cəlb ediləcək.
Bu barədə Cənub hərbi əyalətin mətbuat xidməti bildirib.
“Konsultasiyalar zamanı hərbi heyətlərin nümayəndələri Xəzər dənizinin orta hissəsində 2015-ci ilin sentyabr ayında “Xəzər Dənizində dəniz iqtisadi fəaliyyəti obyektlərinin müdafiəsi üzrə müştərək fəaliyyət” mövzusunda təlimin keçirilməsi barədə razılığa gəliblər”, - məlumatda deyilir.
Bakı rəsmən imtina etdi
22.05.2015
Avropa İttifaqı (Aİ) Riqada "Şərq Tərəfdaşlığı" sammitində də göstərdi ki, Azərbaycana qarşı ikili standartlara yol verir.
Bunu Milli Məclis sədrinin birinci vitse-spikeri Ziyafət Əsgərov jurnalistlərə açıqlamasında deyib.
Z.Əsgərov bildirib ki, Avropa İttifaqı Azərbaycanın ərazi bütövlüyünə hörmətsizlik edir: “Avropa İttifaqı Azərbaycanın ərazi bütövlüyünə hörmətsizlik nümayiş etdirir. Hesab edirik ki, bizim nümayəndə heyətimiz düzgün qərar qəbul etdi və xüsusi rəylə çıxış etdi".
Ölkə.az
