Baş nazirin sabiq müavinindən Abid Şərifov

"Mən özüm baş nazirin müavini olmuşam. Belə davranışlara pis baxıram. İnsanlara yuxarıdan aşağı baxmaq olmaz".

Bu fikirləri Ölkə.az-a baş nazirin sabiq müavini, millət vəkili Vahid Əhmədov Abid Şərifovun jurnalistə kobud cavab verməsinə münasibət bildirərkən deyib. O prezident İlham Əliyevin dövlət məmurları ilə bağlı səsləndirdiyi fikirlərə diqqət çəkərək qeyd edib ki, vəzifəsindən asılı olmayaraq hər bir dövlət məmuru sadə olmalı, xalqa xidmət etməlidir:

"Ölkə başçısı çıxışlarında dəfələrlə bu mövzuya yer ayırıb. Yanğınla bağlı yaradılan Dövlət Komissiyasının bir neçə gün əvvəl keçirilən iclasında da bir daha vurğuldı ki, dövlət məmuru xalqın xidmətçisidir. Hansı vəzifədə işləməsindən asılı olmayaraq məmur insanlarla davranışına, çıxışına, hərəkətinə fikir verməlidir. Müəyyən problemlər ola bilər, əsəbi ola bilər, amma bu vəziyyətdə də o özünü cilovlamağı bacarmalıdır.
Mən özüm bu vəzifədə çalışmışam. İnsnaların hamısı ilə eyni səviyyədə danışıq aparmaq lazımdır. Onlara yuxarıdan aşağı baxmağı, harda olmağımdan asılı olmayaraq qəbul etməmişəm. Bu gün də belə davranışlara pis baxıram".

Xatırladaq ki, A.Şərifov jurnalist Amid İsbəndərovun “Tikinti işlərini hansı şirkət həyata keçirəcək" sualına
“Nə dəxli var sənə?! Nə üçün bilməlisən kimdi?!-deyə cavab vermişdi.

Həsən ELBRUSOĞLU
Ölkə.az