Hacı İbrahimin xanımı "Avesta"nın işçiləri ilə görüşüb

Ölkə.Az "Avesta" konserninin prezidenti, hazırda Baş Mütəşəkkil Cinayətkarlıqla Mübarizə İdarəsində saxlanılan tanınmış iş adamı Hacı İbrahim Nehrəmli ilə bağlı yeni məlumatlar əldə edib.

Məlum olub ki, dünən iş adamının həyat yoldaşı konsernə gələrək işçilərlə görüşüb. Görüş zamanı o, həyat yoldaşının bir neçə mesajını işçilərə çatdırıb:

"Hacı İbrahimin xanımı işçilərə bildirdi ki, hacı deyir vəziyyət çox pisdir, "Xəzər adaları" klubunu buraxıram. Klubun oyunçularına cəmi üç ayın məvacib və mükafatları verilməyib. Bütün əmlaka həbs qoyulduğu üçün oyunçular heç bir iddia qaldıra bilməzlər", deyə konserndəki məlumatlı mənbə Ölkə.az-a bildirib.

Mənbə bildirir ki, xanımın işçilərlə görüşü zamanı daha bir maraqlı detal ortaya çıxıb. Belə ki, "Xəzər adaları" futzal klubunda oynayan bir neçə əcnəbi futbolçu ölkədən deportasiya edilib:

"Sən demə bu oyunçular nəinki klubda qanunsuz oynayırmışlar, hətta ölkədə qanunsuz yaşayırmışlar. Yəni onların Azərbaycanda yaşamasıyla bağlı xüsusi icazələri yox imiş" - mənbə məlumat verib.

İntiqam VALEHOĞLU
Ölkə.Az