Goranboy qətliamı - "Adətən belə qətilləri psixopatlar törədir"

Bu gün ölkə gündəmi Goranboyda baş verən ağır cinayət hadisəsi ilə çalxalanır. 

Xatırladırıq ki, bu gün səhərəı yaxın Azərbaycanın Goranboy rayonunun Səfikürd kəndində baş verən qanlı cinayət hadisəsində demək olar ki, bir ailənin bütün üzvləri, 7 nəfər qətlə yetirilib. Ən acınacaqlısı isə odur ki, qatil elə ailənin üzvlərindən biri, kürəkən Rafiq Müzəffər oğlu Hüseynovdur.

Bəs bu cür kütləvi qətillər hansı insanlar tərəfindən törədilə bilər? Bu suala cavab tapmaq üçün tanınmış psixoloqlardan birinə müraciət etdik. Psixoloq Dəyanət Mustafayev kütləvi qətillər törədən insanların psixologiyası ilə bağlı bəzi məqamları Ölkə.az-la bölüşdü:

- Adətən belə qətillər bir neçə səbəblərdən ola bilər. İlk olaraq demək olar ki, bu insan ruhi xəstə olub. Əgər o, hər hansı dispanserdə qeydiyyatda olmayıbsa, bunu müəyyən etmək üçün onun yaxınlarına müraciət etmək lazımdır ki, indiyədək onda hər hansı bir qeyri-adi hərəkət hiss ediblərmi? Əminliklə demək olmaz ki, o, ruhi xəstədir, ancaq bu hadisə psixa ilə bağlıdır. Ola bilər ki, psixopat olub. Adətən belə qətilləri psixopatlar törədirlər. Ola bilər ki, anidən bir konflikt baş verib, o da özünü idarə edə bilməyib. Görünür, hadisəyə səbəb intiqamdır. Mütləq hadisəni törədən şəxslə psixiyatrlar arasında söhbət aparmalıdır.

- Ümumiyyətlə, bu cür qətillər törədən insanlar bundan sonra həyatlarına necə davam edirlər?

- Əgər bir insanın azacıq vicdanı varsa, özünü öldürür. Əgər yoxdursa, lap ömürlük həbs olunsa da, ora uyğunlaşıb həyatlarına olduğu yerdən davam edəcəklər. Qeyd üçün deyim ki, bəzi insanlar var ki, onlar anadangəlmə beyində müəyyən bir hissə olmur. Həmin hissə həm xoşbəxtliyə, həm də mənəviyyata aid olan bir hissədir. Bu hissəsi yarımçıq dünyaya gələn insanlar müəyyən qədər vaxt keçdikdən sonra mütləq bu cür qətillər törədir.

Fatimə İbrahimova

Ölkə.az