"Onların əsas istəyi bizi kiçik bir dövlət kimi cəzalandırmaqdır"

Milli Məclisin payız sessiyasının ilk iclasında Avropa parlamenti və digər beynəlxalq qurumların Azərbaycanla bağlı tutduqları qərəzli münasibət sərt tənqid olunub

Parlamentin sədr müavini Bahar Muradova çıxışı zamanı bu qurumaların fəaliyyətini təqid edib.

Bahar Muradova bildirib ki, 5-6 nəfərin məsələsində güzəştə gedilməsi ilə Avropa Parlamenti və digər beynəlxalq qurumların Azərbaycana qarşı təzyiqlərini dayandıracağı ilə bağlı fikirlərin səsləndirilməsi yanlışdır: “Orada qırmızı xəttlə keçən əsas fikir odur ki, Azərbaycan özündən razı siyasət yeridir. Bu fikirdə olanlar Azərbaycanın müstəqil siyasətini özündən razılıq kimi qəbul edirlər. Onların əsas istəyi bizi kiçik bir dövlət kimi cəzalandırmaqdır. Digər tərəfdən bu kimi addımların atılmasına səbəb ölkəmizin onların qarşısında alət olmamasıdır. Təbii ki, bu fərqi ayırd etmək elə də çətin deyil. Azərbaycan müstəqil ölkədir. Nə qədər ki, ölkəmizdə müxalifyönlü QHT-lər fəailiyyət göstərir, o zamana kimi belə siyahılar olub və bundan sonra da olacaq. Azərbaycanın tutduğu yola heç kimin şübhəsi olmamalıdır. Əgər şübhə olacaqsa, o zaman biz onların torlarına düşmüş olacağıq. Eyni zamanda beynəlxalq dairələrin və oradakı zərərli fəaliyyətlə məşğul olan bir sıra təşkilatların əlində alətə çevrilmiş olacağıq. Bunu da nə xalqımız, nə də ölkəmiz istəmir. Əsas istəyimiz odur ki, Azərbaycanda bu sahədə şəffalıq olsun. Hər kəsin maliyyə qaynaqları açıq şəkildə göstərilməlidir”.

Vitse-spiker qeyd edib ki, ölkədəki QHT-lərin fəaliyyətinə sərf etdiyi maliyyə barədə hesabat verməsi zəruridir: “Dövlət qurumlarının qrant alması ilə bağlı deyilən fikirlərlə razılaşmaq olmaz. Çünki hökumət qurumları qrantları açıq və şəffaf şəkildə alırlar. Hansısa maraqlara görə heç bir hökumət təşkilatlarımızın xarici dairələrin əlində siyasi və başqa alətə çevrilməsinə dözə bilmirik. Optimist siyasətimizi bizə qarşı təzyiqlərin əlinə vermək düzgün deyil. QHT-lərin qrant və maliyyə fəailiyyətini şəffaflığı təmin etmək məqsədi ilə mövcud qanunda dəyişikliklərin edilməsini dəstəkləyirəm. Hər birimizin məsuliyyət hissini artıra bilən dəyişiklikləri yazılı şəkildə həyata keçirməliyik. Çünki bu bizim müstəqil dövlətimizin qorunması üçün atılan addımlardan biridir”./Salamnews/

Ölkə.Az