Həftənin icmalı
Prezidentdən ordu ilə bağlı sərəncam
29.05.2015 21:34
Prezident İlham Əliyev Azərbaycan Respublikası vətəndaşlarının 2015-ci il iyulun 1-dən 30-dək müddətli həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında sərəncam imzalayıb.
Sərəncamda qeyd olunur ki, 1997-ci ildə doğulmuş və çağırış gününədək (həmin gün də daxil olmaqla) 18 yaşı tamam olmuş, habelə 1980-1996-cı illərdə doğulmuş, yaşı 35-dək olan, Azərbaycan Respublikasının Silahlı Qüvvələrində və Azərbaycan Respublikasının qanunvericiliyinə uyğun olaraq yaradılmış başqa silahlı birləşmələrdə müddətli həqiqi hərbi xidmət keçməmiş, müddətli həqiqi hərbi xidmətə çağırışdan möhlət hüququ olmayan və ya müddətli həqiqi hərbi xidmətə çağırışdan azad edilməmiş Azərbaycan Respublikasının vətəndaşları 2015-ci il iyulun 1-dən 30-dək müddətli həqiqi hərbi xidmətə çağırılsınlar.
Xaricdə təhsil alan tələbələrə əsgərlikdən möhlət hüququ verilməyəcək
29.05.2015 18:00
Milli Məclisdə “Hərbi vəzifə və hərbi xidmət haqqında” qanuna dəyişiklik edilməsi barədə qanun layihəsi müzakirəyə çıxarılıb.
Ölkə.Az APA-ya istinadən xəbər verir ki, qanun layihəsi barədə Milli Məclis sədrinin birinci müavini, Təhlükəsizlik və müdafiə komitəsinin sədri Ziyafət Əsgərov məlumat verib.
Qanuna əsasən, indiyə qədər xarici ölkələrdə əyani təhsil alanlara ali təhsil pilləsində (bakalavriat), tibb təhsili üçün ali baza tibb təhsili və rezidenturada (internaturada) təhsil alanlara müvafiq təhsilini bitirənədək təhsili davam etdirmək üçün bir dəfə möhlət verilib.
Dövlət büdcəsi ilə bağlı qanun qəbul edildi
29.05.2015 15:02
Bu gün Milli Məclisin plenar iclasında "Azərbaycan Respublikasının 2014-cü il dövlət büdcəsinin icrası haqqında” qanun layihəsi müzakirəyə çıxarılıb.
Ölkə.Az xəbər verir ki, APA-nın məlumatına görə, məsələ barədə çıxış edən İqtisadi siyasət komitəsinin sədr müavini Çingiz Əsədullayev deyib ki, dövlət və icmal büdcəsi ilə bağlı şəffaflığın təmin edilməsi 2014-cü ildə də davam etdirilib, dövlət başçısının müəyyən etdiyi inkişaf strategiyası uğurla yerinə yetirilib.
Ç.Əsədullayev dünyada iqtisadi böhran fonunda Azərbaycanın inkişaf etdiyini, bunun düşünülmüş siyasətin nəticəsi olduğunu qeyd edib.
Deputatlar tətilə çıxırlar
29.05.2015 12:18
Mayın 29-da Azərbaycanın Milli Məclisinin yay sessiyasının sonuncu iclası keçiriləcək və bundan sonra deputatlar məzuniyyətə çıxacaqlar.
Bu barədə Ölkə.Az-a parlamentin mətbuat xidmətindən bildiriblər.
Onu da qeyd edək ki, Avropa Oyunları ilə əlaqədar Milli Məclis növbədənkənar iclaslar keçirməyəcək.
Məzunlarının builki sayı məlum oldu
28.05.2015 11:00
2014-2015-ci tədris ilində Azərbaycanın ümumi təhsil müəssisələrinin IX siniflərini 111 839, XI siniflərini 90 557 nəfər, qiyabi və axşam məktəblərinin XII siniflərini isə 820 nəfər şagird bitirəcək.
Ölkə.Az Təhsil Nazirliyinin mətbuat xidmətinə istinadən xəbər verir ki, xatırladaq ki, ötən tədris ilində respublikanın ümumi təhsil müəssisələrinin IX siniflərindən 118 206, XI siniflərindən 86 797, qiyabi və axşam məktəblərinin XII siniflərindən isə 754 şagird məzun olub.
Azərbaycan Respublika Gününü qeyd edir
28.05.2015 00:33
Bu gün Azərbaycanda 28 May - Respublika Günü qeyd olunur.
Azərbaycan Xalq Cümhuriyyətinin (AXC) qurulması 28 may 1918-ci ildə Tiflis şəhərində Qafqaz canişininin binasında Məhəmməd Əmin Rəsulzadənin sədri olduğu Azərbaycan Milli Şurası tərəfindən bəyan edilib.
AXC təkcə Azərbaycanda deyil, bütün Şərqdə ilk demokratik respublika idi. Bu, respublika parlamentli dövlət idi. Onun dövlət atributları - bayrağı, himni, gerbi qəbul edildi. Üçrəngli bayraqda türkçülük, islamçılıq və avropalaşmaq bir vəhdətdə idi. Ancaq AXC cəmi 23 ay yaşaya bildi. 1920-ci il aprelin 28-də bolşeviklərin 11-ci ordusu Azərbaycanı işğal etdi və respublika süquta uğradı.
Respublika Günü 1990-cı ildən dövlət bayramı kimi qeyd olunur. Əmək Məcəlləsinə görə, 28 may qeyri-iş günü elan edilib.
Azərbaycanın ən yaşlı vətəndaşının yaşı və adı açıqlandı
27.05.2015 19:30
Azərbaycanda 5 milyon 93 min 289 nəfər seçicinin 2 milyon 632 min 961 nəfəri qadın, 2 milyon 460 min 328 nəfəri kişidir.
Ölkə.Az APA-ya istinadən xəbər verir ki, bunu bu gün Mərkəzi Seçki Komissiyasının (MSK) Azərbaycan üzrə seçicilərin daimi siyahısının tərtibinə dair keçirilən iclasında MSK sədri Məzahir Pənahov söyləyib.
Onun sözlərinə görə, yaş qrupları üzrə ən çox seçici 27-35 və 46-55 yaş qruplarındadır. Müvafiq olaraq bu seçici qruplarında 1 milyon 59 min 738 nəfər və 1 milyon 39 min 868 nəfər seçici var.
M.Pənahov bildirib ki, ölkədə yaşı 100 yaş və yuxarı olan 701 nəfər (0,01%) seçici var. Ən yaşlı seçici Zərdab rayon sakini, 1888-ci ildə anadan olmuş 127 yaşlı Bayramova Süfü Mikayıl qızıdır.
Bakıda hərbi yürüş keçiriləcək
27.05.2015 16:45
Nazirlik məlumat yaydı.
Mayın 28-də Respublika Günü münasibətilə Bakı Qarnizonu qoşunlarının iştirakı ilə saat 12.00-dan etibarən şəhərin müxtəlif istiqamətlərində 10 marşrut üzrə hərbi qulluqçuların nizami yürüşü keçiriləcəkdir.
Azərbaycanın Müdafiə Nazirliyindən Ölkə.Az-a verilən məlumata görə, həmin gün Naxçıvan, Gəncə, Şəmkir, Sumqayıt, Bərdə, Beyləqan, Lənkəran, Horadiz və Qusar şəhərlərində yerləşən hərbi hissələrin şəxsi heyətinin də nizami keçidi təşkil ediləcəkdir.
Bakıda yanan binanı təmir edəcək deputat danışdı
27.05.2015 10:38
Binəqədi rayonunda yanan binanın təmiri “Azəraqrartikinti” ASC-yə həvalə olunub.
Ölkə.Az xəbər verir ki, bununla bağlı ASC-nin rəhbəri, Milli Məclisin deputatı Ağalar Vəliyev “Yeni Müsavat”a açıqlama verib:
“Binanın təmiri bizə həvalə olunub. Hazırda binanın üzlük konstruksiyasının söküntüsü ilə məşğuluq. Alt konstruksiyanın söküntüsünü 3 gün müddətinə yekunlaşdıracağıq. Fövqəladə Hallar Nazirliyinin Dövlət Layihə İnstitutu tərəfindən həmin binanın layihə-smeta sənədləri hazırlanır, bina Fövqəladə Hallar Nazirliyinin mütəxəssisləri tərəfindən müayinə olunur, binanın dayanıqlığı normal şəkildədir.
Ancaq bəzi düyünlərdə bərpa-gücləndirmə tədbirlərinin keçirilməsinə də çox güman ki, ehtiyac olacaq. Layihə-smeta sənədləri bizə verildikdən sonra binanın hansı müddətə təmir olunacağını deyə bilərik. Hesab edirəm ki, binanı 4-5 aya tam təmir edib, təhvil vermək mümkün olacaq”.
Azərbaycana yay istiləri gəlir
26.05.2015 14:40
Mayın 27-də Bakı və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Ölkə.Az Ekologiya və Təbii Sərvətlər Nazirliyi Milli Hidrometeorologiya Departamentinin məlumatına istinadla xəbər verir ki, səhər bəzi yerlərdə zəif duman olacaq. Cənub küləyi əsəcək.
Havanın temperaturu gecə 14-18, gündüz 25-30 dərəcə isti olacaq.
Azərbaycanda kolleclərə qəbul qaydaları dəyişdi
26.05.2015 12:33
Tələbə Qəbulu üzrə Dövlət Komissiyası kolleclərə qəbul olmaq istəyən abituriyentlərə müraciət edib.
Komissiyadan Ölkə.Az-a verilən məlumata görə, bu ildən etibarən əvvəlki illərdə olduğu kimi I, II, III və IV ixtisas qruplarının hər hansı biri üzrə imtahanda iştirak edib toplanılan bala əsasən orta ixtisas təhsili müəssisələrinin (kolleclərin) müsabiqəsində iştirak etmək mümkün olmayacaq.
Prezident fərman imzaladı
25.05.2015 21:19
Azərbaycan Prezident İlham Əliyev “Hərbi qulluqçuların statusu haqqında” qanuna edilən dəyişikliklərlə bağlı “Hərbi xidmətkeçmə haqqında Əsasnamə”də edilən dəyişikliklərin təsdiq edilməsi barədə fərman imzalayıb.
Fərmana əsasən, Azərbaycan Respublikasının Silahlı Qüvvələrində və Azərbaycan Respublikasının qanunvericiliyinə uyğun olaraq yaradılmış başqa silahlı birləşmələrdə qulluq edən hərbi qulluqçular (hərbi attaşelər, hərbi nümayəndələr və onların köməkçiləri istisna olmaqla), habelə Azərbaycan Respublikasının hüdudlarından kənarda beynəlxalq hərbi təlimlərə, antiterror, xilasetmə və xidməti zərurətlə bağlı digər tədbir və ya əməliyyatlara cəlb olunan müddətli həqiqi hərbi xidmət keçən hərbi qulluqçular müvafiq icra hakimiyyəti orqanlarının rəsmiləşdirilmiş icazəsi olduqda Azərbaycan Respublikasından gedə biləcəklər.
Yol polisindən "son zəng" xəbərdarlığı
25.05.2015 19:15
"Son zəng"lə əlaqədar Bakının yol polisi 2 günlük gücləndirilmiş iş rejiminə keçir.
Bu barədə açıqlamasında Daxili İşlər Nazirliyi (DİN) Bakı şəhər Baş Polis İdarəsi Dövlət Yol Polisi İdarəsinin İctimai qurumlarla əlaqə bölməsinin rəisi, polis polkovniki Vaqif Əsədov məlumat verib.
Onun sözlərinə görə, Bakıda orta məktəblərdə keçiriləcək "Son zəng" tədbirləri ilə əlaqədar Bakı şəhər Dövlət Yol Polisi İdarəsi mayın 29-u və 30-da gücləndirilmiş iş rejimində çalışacaq
Yanan binanın sakinlərinə yeni şəxsiyyət vəsiqələri verildi
25.05.2015 18:58
Daxili İşlər Nazirliyinin Baş Pasport, Qeydiyyat və Miqrasiya İdarəsinin və Binəqədi rayon Polis İdarəsinin Qeydiyyat və şəxsiyyət vəsiqəsi şöbəsinin əməkdaşları tərəfindən cari il mayın 19-da baş vermiş yanğın nəticəsində şəxsiyyəti təsdiq edən sənədləri məhv olmuş vətəndaşlara yeni vəsiqələrin verilməsi ilə bağlı səyyar xidmət keçirilib.
Daxili İşlər Nazirliyinin mətbuat xidmətindən Ölkə.Az-a daxil olan məlumata görə, səyyar xidmət zamanı müraciət etmiş 25 nəfər şəxsiyyət vəsiqələri ilə təmin olunub.
Bu istiqamətdə tədbirlər davam etdirilir.
“Oyunlar zolağı” ilə hərəkət edən sürücülər cərimələnəcək — RƏSMİ
25.05.2015 18:00
Baş Dövlət Yol Polisi İdarəsi Avropa Oyunları ilə əlaqədar nəqliyyatın hərəkəti üçün nəzərdə tutulan xüsusi zolaqların tələblərini pozan sürücülərə hansı cəza verilməsinə dair açıqlama verib.
Daxili İşlər Nazirliyi (DİN) Respublika Baş Dövlət Yol Polisi İdarəsinin (BDYPİ) İctimaiyyətlə əlaqələr şöbəsinin rəisi, polis polkovniki Kamran Əliyev bildirib ki, şənbə günündən etibarən artıq həmin zolaqlar üzrə 3.2 hərəkəti qadağan edən nişanların qoyulması prosesinə start verilib.
Kamran Əliyev qeyd edib ki, Bakıda müəyyən edilən yollarda “Avropa Oyunları” zolaqları artıq çəkilib, eyni zamanda həmin zolaqlar üzrə hərəkəti qadağan edən müvafiq yol nişanları qoyulub.
Yanğında zərərçəkən jurnalistə yardım edildi
25.05.2015 16:38
Mayın 19-da Binəqədi rayonunda baş verən yanğın zamanı zərərçəkən jurnalist Sevinc Fədaiyə 7500 manat ödənilib.
Ölkə.Az xəbər verir ki, bunu Modern.az saytına Bakı şəhər icra hakimiyyətinin başçısı Hacıbala Abutalıbov deyib.
O bildirib ki, bu gün ev sahibinin və jurnalistin razılığı əsasında belə bir qərara gəlinib:
“Mənə bildirdilər ki, jurnalist Sevinc Fədai bu gün öz razılığı ilə 7500 manat alıb”.
Jurnalist Sevinc Fədai sözügedən binada kirayədə yaşayırdı.
Ali məktəblərə qəbulun müsabiqə şərtləri açıqlandı
25.05.2015 14:45
Tələbə Qəbulu üzrə Dövlət Komissiyası (TQDK) bu il Azərbaycanda ali məktəblərə qəbul zamanı tələb olunacaq müsabiqə şərtlərini açıqlayıb.
TQDK-nın mətbuat xidmətindən Ölkə.Az-a verilən xəbərə görə, ali təhsil müəssisələrinə ixtisas seçimi iyulun 30-dan avqustun 11-dək aparılacaq.
Müsabiqə şərtlərinə əsasən I, II, III və IV ixtisas qrupları üzrə ixtisas seçiminə ümumi balı 200-dən və hər bir fənn üzrə ayrılıqda topladığı nisbi balı 10-dan az olmayan abituriyentlər buraxılırlar. Ümumi balı 350 və daha çox olan abituriyentlərin ixtisas seçiminə buraxılmaları üçün onların fənlər üzrə cavablarına nisbi bal məhdudiyyəti tətbiq olunmur. Müsabiqə şərtlərində hər hansı dəyişiklik olarsa, bu haqda məlumat veriləcək.
lhamə Quliyeva Avropa oyunlarının məşəlçisi olacaq
25.05.2015 11:51
Xalq artisti İlhamə Quliyeva Birinci Avropa Oyunlarının məşəlçilərindən biri olacaq.
Bu barədə Ölkə.Az-a sənətkar özü eksklüziv açıqlamasında bildirib.
İlhamə Quliyeva Avropa Oyunlarının əməliyyat komitəsin baş icraçı direktoru, gənclər və idman nazirin Azad Rəhimovun imzasıyla olan bildirişin fotosunu da redaksiyamıza göndərib . Sözügedən sənədin fotosunu təqdim edirik.
Yeni xəbər saytı fəaliyyətə başladı — 7NEWS.az
25.05.2015 10:55
7NEWS.az internet xəbər portalı 2014-cü ilin may ayından fəaliyyətə başlayıb və müstəqil informasiya siyasəti həyata kecirən media qurumudur. 7NEWS MMC nəzdində fəaliyyət göstərən www.7NEWS.az saytında Azərbaycanın ictimai, siyasi, sosial və mədəni həyatında olan yeniliklərlə bərabər, digər Qafqaz ölkələrində, habelə dünyada baş verən maraqlı xəbərlər oxuculara çatdırılır. Bundan basqa, internet saytda müxtəlif sahələrdən bəhs edən müsahibələr, təhlillər, reportajlar, müəllif yazıları işıqlandırılır.
Ölkə.az
