Dələduzluğun yeni növü: vətəndaşlar bu cür aldadılır
Son vaxtlar hüquq-mühafizə orqanları və digər aidiyyəti qurumlar, eləcə də banklar tərəfindən dələduzluq halları ilə bağlı dəfələrlə xəbərdarlıq edilib. Bu dəfə isə dələduzlar yeni üsula əl atıb.
Ölkə.Az xəbər verir ki, bu barədə sosial şəbəkələrdə məlumat yayılıb.
Bildirilib ki, bu dəfə də özünü “makler” kimi təqdim edən şəxslər vətəndaşları aldatmaqla onların pulunu mənimsəyib.
Sosial şəbəkə istifadəçilərinin sözlərinə görə, belə dələduzluq hallarından biri də Suraxanı rayonu, Günəşli qəsəbəsində baş verib.
Belə ki, 4 dost kirayə mənzil tutmaq üçün "Neftçilər" metro stansiyası ərazisində “makler bağı” deyilən əraziyə gediblər. Orada özünü vətəndaşlara makler kimi təqdim edən şəxs Günəşli qəsəbəsində 9 mərtəbəli binada aylığı 320 manata olan mənzili təklif edib.
O, müştəriləri inandırmaq üçün onları guya ev sahibi olan bir qadınla da danışdırıb.
Daha sonra müştəriləri 9-cu mərtəbədəki mənzillə tanış edən şəxs onların hər birindən 50 manat beh və makler pulu kimi də 60 manat götürüb. Evin açarını daha sonra təqdim edəcəyini vəd verən işbazla əlaqə saxlamaq mümkün olmayıb. Belə ki, 260 manatı götürən “makler” yoxa çıxıb.
Müştərilər vəziyyətdən şübhələnərək, baxdıqların evə yollanıb. Qapını açan şəxs isə ev yiyəsi olduğunu və belə bir elandan məlumatsız olduğunu deyərək kirayənişinləri evinə icazəsiz girdikləri üçün polisə verməklə hədələyib.
Qeyd olunub ki, zərərçəkən şəxslər vəziyyətlə bağlı hüquq-mühafizə orqanlarına müraciət ediblər.
Həmçinin oxu: DİN mənzil kirayələmək istəyən şəxslərə xəbərdarlıq etdi
Billurə Yunus
