İlhamə Quliyeva: \"Məşəli daşımağa möhtəşəm hazırlaşıram\"

Bakı 2015 Avropa Oyunları Əməliyyat Komitəsinin baş icraçı direktoru, gənclər və idman naziri Azad Rəhimovun “İlhamə xanım məşəli Bakıda daşıyacaq 150 məşaldardan biridir. Qaça bilməsə də, hərəkət edəcək. Ola bilər ki, primadonna 20-30 metr məşəli daşıdıqdan sonra estafeti digər məşəldara verəcək” fikrinə xalq artistindən cavab gəlib.

İlhamə Quliyeva Ölkə.Az-a açıqlamasında bildirib ki, məşəldar olacağı üçün özünü xoşbəxt hiss edir:

"Əvvəla xoşbəxt sənətkaram ki, dövlətim məni belə möhtəşəm bir tədbirin məşəlini daşımağa layiq görüb. Gənclər və idman nazirimiz, mədəniyyət və turizm nazirimiz incəsənət nümayəndələrini xüsusi görüşə dəvət etmişdilər. Təbii ki, küçədə qaçmaq mənim yaşıma yaraşmaz. Amma məşəli daşımaq iqtidarındayam. Heç kim narahat olmasın, ayaqlarım da sağlamdır, özüm də. Ayaqlarım lap sağlam olsa belə, qaçmaq söhbəti yoxdur. Sadəcə, məşəli yandırıb şəhərimizin ən mərkəzi yerindən aparacağam. Bu, böyük şərəfdir. Qurdlu, paxıl insanlar bu yaxşı məqamları həzm edə bilmirlər. Yəqin ki, onların heç biri bu mərasimə dəvət olunmayıb. Çünki kimlərin dəvət oldunduğunu gördüm, o iclasda dəvətlilərlə iştirak etdim. Mənə göstərdikləri etimada görə cənab prezidentə, digər rəsmilərə, nazirlərə təşəkkürümü bildirirəm. Sağ olsunlar ki, hər zaman mənə sayğıyla yanaşırlar. Kimin gözü götürmürsə, Allah onlara insaf versin, hər şeyi ürəyincə versin. Bu gün çox xoşbəxtəm və o günə çox möhtəşəm hazırlaşıram. Birinci Avropa Oyunlarına klip həsr etdim. İyunun 4-də bu klipin böyük təqdimatı keçiriləcək. Tahir Əkbərin Baba Vəziroğlunu sözlərinə yazdığı bəstədir. Mən oturmamışam və gözləmirəm kimsə mənə nəsə desin. Özüm iş başındayam. Çünki vətənimi, dövlətimi, bayrağımı sevən sənətkaram. Ömrüm boyu ölkəmə sadiq olmuşam, heç vaxt buqələmun olmamışam, xalqıma, millətimə xəyanət etməmişəm. Ona görə məşəli daşımağa məhz məni layiq görüblər".

Qeyd edək ki, sənətkarın Bakıda keçiriləcək Birinci Avropa Oyunlarının məşəldarı olması xəbəri mətbuatda və sosial şəbəkələrdə müzakirə mövzusuna çevrilib.

İntiqam VALEHOĞLU
Ölkə.az