“National Geographic Kids” may buraxılışının qalibini təbrik etdi!

“National Geographic Kids” jurnalının may buraxılışında tanınmış şahmatçı, qrossmeyster Şəhriyar Məmmədyarovun təqdim etdiyi “Biliyinlə Qazan!” rubrikasının qalibi müəyyən edildi!

2015-ci ilin fevral ayından etibarən Garant Media Holding tərəfindən Azərbaycanda dərc olunan və qısa müddətdə həm uşaqlar, həm də valideynlər tərəfindən böyük maraqla qarşılanan “National Geographic Kids” jurnalının “Biliyinlə Qazan!” rubrikası artıq bir neçə aydır ki, məktəblilərin diqqət mərkəzindədir. Çünki onlar burada təqdim olunan sualları cavablandırmaqla yalnız hədiyyə qazanmır, eyni zamanda rubrikanı təqdim edən məşhur şəxslə görüşərək onunla yaxından tanış olmaq və söhbət etmək imkanı əldə edirlər.

“National Geographic Kids” jurnalının dördüncü, yəni may buraxılışındakı “Biliyinlə Qazan!” rubrikasının qalibi Bakı şəhəri 111 saylı orta məktəbin 3-ci sinif şagirdi, 8 yaşlı Ömər Süleymanov oldu.

Ömər redaksiyaya dəvət olundu və rubrikanı təqdim edən Şəhriyar Məmmədyarovla və redaksiya heyəti ilə görüşərək söhbət etdi. Jurnal barəsində fikirlərini bildirən Ömər “National Geographic Kids” jurnalının onun stolüstü vəsaitlərindən birinə çevrildiyini söylədi.

Şəhriyar Məmmədyarov qalibə “National Geogrphic Kids” jurnalı adından mükafat təqdim etdi.

Ölkə.Az