İlham Mirzəyevin vəkili cinayət təqibinə xitam verilməsini xahiş edib

Dələduzluqda ittiham olunaraq həbs olunan aparıcı İlham Mirzəyevin vəkili Xanlar Bayramzadə İttiham Aktında qeyd edilən epizodlar üzrə müdafiə etdiyi şəxsin əməlində cinayət işinin olmadığını və bu səbəbdən cinayət təqibinə xitam verilməsini xahiş edib. 

Ölkə.Az bildirir ki, qafqazinfo-ya müraciət edən vəkilin sözlərinə görə, birinci epizod üzrə İttiham Aktında adı keçən R.D ilə İ.Mirzəyev arasında evin həyətində təmir işlərinin aparılması üçün heç bir müqavilə imzalanmayıb. R.Daşdəmirov və digər ustalara həyətdə abadlıq işləri aparılması üçün otuz min manata yaxın pul ödənilib. Lakin ustalar tərəfindən iş keyfiyyətsiz görülüb və R.Daşdəmirov işləri tamamlamadığı üçün onlara iki min manat borc qalıb. Vəkil iddia edir ki, həmin ustaların əmlakını ələ keçirmək niyyəti olmadığı üçün, bu epizodla cinayət işinin icraatına xitam verilməli və bu məsələ mülki qanunvericilik əsassında tənzimlənməli idi. 

X.Bayramzadə ikinci epizod üzrə İttiham Aktında adı keçən Ə.Z-nin oğluna “İlhamMed” tibb mərkəzində başqa həkimlər tərəfindən müalicələr yazıldığını , uzi və digər laboratoriyalarda analizlər alındığını və bunun müqabilində pul ödənildiyini bildirib. Vəkilin sözlərinə görə, müalicəsini tam başa çatdırmamış şikayət etməsi cinayət tərkibi yaratmır: “Ə.İ-in malicəsi başqa həkimlər tərəfindən aparılıb, ona İ.Mirzəyev tərəfindən qabaqcadan heç bir yalan vəd verilməyib, ödənilən pul psixoloji yardıma xərclənib, əmlakının ələ keçirmək niyyətinin olmamasını nəzərə alıb, bu epizodla işin icraatına xitam verilməsini istəyirik”. 

Üçüncü epizod üzrə vəkil bildirib ki, digər zərərçəkən Ə.A pasient kimi “İlhamMed” klinikasında olub və 50 manat psixoloji yardıma görə xidmət haqqı ödəyib və ona məsləhət görülüb ki, qapanma və intihara meyllilik diaqnozunu aradan qaldırma üçün 30 günlük psixoloji seans keçsin. Lakin Ə.A heç bir müalicə kursu keçmədən  10 aprel 2014 tarixində 1400 avro pulu İ.Mirzəyevin stolunun üstünə qoyub tələsik çıxıb gedib. Ə.A-nın hərəkətləri göstərir ki, o, qəsdən kimlərinsə sifarişini həyata keçirib. Ona psixoloji yardım göstərilərkən, qulluq mövqeyindən istifadə etməyib və onun əmlakını ələ keçirmək niyyəti olmayıb. Heç bir müalicə kursu almadan Baş Mütəşəkkil Cinayətkarlıqla Mübarizə İdarəsinə müraciət etməsi şübhə doğurur: “Təqsirləndiirlən şəxsin təqsirliliyinə dair aradan qaldırıla bilməyən şübhələr onun xeyrinə  şərh verilməsini İ.Mirzəyein əməlində cinayət tərkibinin olmamasını nəzərə alıb, mövcud qanunvericiliyə uyğun başlayan cinayət təqibinə xitam verilməsini xahiş edirəm”.

Vəkil həmçinin İlham Mirzəyevin səhhətində problemlər olduğunu qeyd edib. Onun sözlərinə görə, müdafiə etdiyi şəxs Bakı İstintaq Təcridxanasında saxlanmazdan əvvəl də müəyyən xəstəliklərdən əziyyət çəkirdi. Təcridxanada isə xəstəliyi daha da intensivləşib və hazırda müalicəyə ehtiyacı var. 

X.Bayramzadə İ.Mirzəyevin adından prezident Ilham Əliyevı, xanımı Mehriban Əliyevaya, Baş prokurorluğa, Daxili İşlər Nazirliyinə, hüquq-mühafizə orqanlarına, ədalət mühakiməsini həyata keçirən insanlara minnətdarlığını bildirib və bundan sonra da qanunvericiliyə uyğun məsələnin həllini tapmasına yardımçı olmalarını xahiş edib. O bildirib ki, İ.Mirzəyevin indiyə qədər yardım etdiyi 100-ə qədər şəhid ailəsi məktublar yazaraq Mütəşəkkil Cinayətkarlıqla Mübarizə İdarəsindən onun işinə qanunvericiliyə uyğun baxılmasını xahiş ediblər  və bu, Cinayət işinin materiallarında da əksini tapıb. Vəkil həmçinin İttiham Aktında zərərçəkən kimi göstərilən şəxslərin İlham Mirzəyevdən heç bir maddi və mənəvi şikayətləri olmadığını da əlavə edib.

Ölkə.Az