Rusiyanın məşhur jurnalistləri BDU-da
Rusiyalı jurnalistlər azərbaycanlı tələbə jurnalistlərlə görüş keçirib.
Ölkə.Az xəbər verir ki, “TEFİ-Sodrujestvo” IV Beynəlxalq Televiziya Festivalı çərçivəsində Bakıya təşrif buyuran məşhur Rusiyalı jurnalistlər, “Rusiya Televiziya Akademiyası”-nın üzvləri Svetlana Sorokina, Kiril Nabutov, Leonid Mleçin, Kira Poruşutinskaya və RTA -nın Baş Direktoru Eteriya Leviyeva BDU-da qonaq olublar.
Bakı Dövlət Universitetinin Jurnalistika fakültəsinin tələbələri ilə görüşən peşəkarlar jurnalistikanın aktual problemləri haqqında danışaraq, gələcək həmkarlarının çox saylı suallarını cavablandırıblar. Qazet, jurnal və digər nəşr olunan KİV gələcəyi, sosial şəbəkələrinin jurnalistikaya təsiri, jurnalist vətənpərvərliyi və s. mövzularda müzakirələr aparılıb.
Görüşdə Bakı Dövlət Universitetinin Tədrisin təşkili və təlim texnologiyaları üzrə prorektoru İradə Əliyeva, xarici tələbələrlə iş üzrə dekan Gülheyran Rəhimova və Jurnalistika fakültəsinin dekanı professor Şamil Vəliyev iştirak edib.
Xatırladaq ki, bu ayın 27-nə kimi davam edəcək “TEFİ-Sodrujestvo” IV Beynəlxalq Televiziya Festivalında MDB və yaxın xarici ölkələrin 11 aparıcı televiziya şirkəti iştirak edir. Telefestivalın əsas təşkilatçıları “Rusiya Televiziya Akademiyası” və MDB ölkələri iştirakçılarının humanitar əməkdaşlığı üzrə Dövlətlərarası Fondları, Azərbaycan tərəfindən isə “Azərbaycan Televiziya və Radio Verilişləri” QSC-dir.
Rəşid Mustafazadə
Fotoların müəllifləri:
Kamil Əmirli, Məhəmməd Novruzlu
Ölkə.Az
