Artıq 13 internat məktəbi ləğv olunub

Təhsil Nazirliyi bir müddət əvvəl medianın gündəminə azyaşlı uşağın döyülməsi xəbəri ilə gələn 7 saylı internat məktəbinin bağlanması xəbərini təsdiqləyib

Ölkə.Az-ın verdiyi məlumata əsasən qafqazinfo-nun sorğusuna cavab olaraq Nazirlikdən bildirilib ki, 13 internat məktəbi artıq ləğv olunub.

Bununla yanaşı yerlərdə bu müəssisələrə alternativ olan xidmətlərin yaradılması ilə bağlı tədbirlər həyata keçirilir. Belə ki,  Bakı şəhərinin Xəzər  rayonunda  ailə tipli kiçik qrup evi yaradılıb  və hazırda fəaliyyət göstərir, digərinin isə Lənkəran şəhərində tikintisi davam etdirilir. Bu tədbirlər planına uyğun olaraq 2 günərzi qayğı və 4 reabilitasiya mərkəzi  də yaradılıb. 

Həyata keçirilən tədbirlər çərçivəsində Sağlamlıq imkanları məhdud uşaqlar üçün 7 nömrəli xüsusi internat məktəbi  ləğv olunub. Məktəbin 40 nəfər şagirdi  ailələrinin himayəsinə qaytarılıb, xüsusi siniflərdə təhsil alan şagirdlərin təhsillərini digər internat məktəbində davam etdirməsi təmin olunub. Tərbiyəçi-müəllimlərin  isə  həmin müəssisədə işlə təmin olunması nəzərdə tutulub.

Növbəti illər ərzində daha bir neçə bu tip müəssisənin fəaliyyətinə yenidən baxılması və onların sayının azaldılması üçün müvafiq tədbirlərin görülməsi planlaşdırılır.

Ölkə.Az