Ankarada müalicə alan yaralı əsgərimiz ziyarət edildi
"Ermənistan layiq olduğu cəzanı mütləq alacaq"
Azərbaycanlı millət vəkili Qənirə Paşayeva Ankarada müalicə alan yaralı əsgərimizi ziyarət edib.
Ölkə.Az xəbər verir ki, bu barədə deputat öz Facebook səhifəsində yazıb.
"Qardaşımız Elvini ziyarət etdik və nigah şahidi olacağıma söz verdim.
Ankarada xəstəxanada Ermənistan silahlı qüvvələrinin təxribatının qarşısını alarkən yaralanan qardaşlarımızda olan Elvini ilk dəfə Bakıda Hərbi qospitalda reanimasiya şöbəsində ziyarət edəndə çox ağır vəziyyətdə idi. Reanimasiyadan çıxanda qapıda xəbər gözləyən əzizlərinə vəziyyətin nə qədər ağır olduğunu bildiyimiz halda həkimlərlə birlikdə yaxşı olacaq dedik. Elvin çox şükr ki, ağır vəziyyətdən çıxıb və inşallah getdikcə daha da yaxşılaşacaq və qısa zamanda sağalaraq əzizlərini, hamımızı, özəlliklə yolunu gözləyən nişanlısını sevindirəcək. Elvin toya hazırlaşırmış və çox şükr ki, Allah onun arzularını yarımçıq qalmasına imkan vermədi. Sağ olsun həkimlər Elvinin sağalması üçün əllərindən gələni edirlər. Geniş söhbət etdik və Elvinin tezliklə sağalıb evinə dönə bilməsi üçün əllərindən gələni etdiklərini dedilər və biz də hamımız adından təşəkkürümüzü bildirdik.
Öz istəyi ilə ön cəbhədə qulluq edən Elvinin sağalan kimi yenidən ön cəbhəyə qayıtmaq istəyi isə bir çox gənclərimiz üçün örnək olmalıdır.
Elvinlə toydan, nişanlısından da danışdıq. Toyumda mütləq sizi gözləyəcəm dedi. Mən də inşallah mütləq gəlib sizi təbrik edəcəm dedim. Sonra nigah şahidliyi dəvəti gəldi və mən də sevərək qəbul etdim. Elvin artıq qardaş Türkiyədə onu müalicə edən həkimləri də dəvət edib və onlar da mütləq həmin xoş gündə iştirak edəcəklərini bildirdilər. Xeyli söhbət etdik. Üzündə təbəssüm görməkdən çox məmun idik. İnşallah onu narahat edən qızdırma və iştahsızlıq problemləri də yaxın günlərdə keçib gedər. Dualarınızı Elvin qardaşımız üçün əksik etməyin. İnanıram ki, inşallah bizə bu böyük ağrıları yaşadan Ermənistan layiq olduğu cəzanı mütləq alacaq".
Müalicə alan hərbçi də dövlət, xalq, qardaş Türkiyənin onlara diqqətindən razılığını bildirib.
Görüşdən sonra millət vəkili ona musiqi albomları və kitablarını da hədiyyə edib.
"Çıxanda Elvin toyda sizi gözləyəcəm dedi və dəyərli dostlar Səidə xanım, Anar bəy və digərləri ilə birlikdə mütləq gələcəyik, dualarımız səninlə tez sağal, bu gündən hamımız artıq toyda iştiraka hazırlaşmağa başlayırıq dedik".
Xatırladaq ki, Q.Paşayeva bir necə gün öncə Ankrada xəstəxanada müalicə olunan və ayaqları amputasiya edilən digər əsgər Sərxan Tahirzadənin doğum gününü onunla birgə qeyd etmişdi.
Ölkə.Az
