İstanbulda bir gecəsi 100 dollara olan azərbaycanlı qadın

Əfsələddin Ağalarov İstanbuldan yazır

İstanbulda bir gecəsi 100 dollara olan azərbaycanlı qadın.

Qadınlığını unudan o qadınla bir yerdə bir neçə saat yol getdim. “Boğaz”ı, “Kız kulesi”ni, “Taksim”i , “Sultan Ahmed”i görmək üçün alışıb-yanan və artıq öz alçalan qadınlığını ucuz içki məclislərində 100 dollara satmağa hazırlaşan həmin qadınla. İlk baxışdan mənə elə gəlirdi ki, bədəninin bütün gözəlliyini türk kişilərinə göstərmək üçün dəridən-qabıqdan çıxan o qadının İstanbula ayaq basdıqdan sonra ilk işi seriallardakı həmin yaraşıqlı aktyorların prototipini tapmaq olacaqdı. Amma, deyəsən, onun məqsədi tamam başqa idi.

Elə Bakıda - hava limanında ilk gözümə sataşan kimi gözlərim dəqiqəbədəqiqə onu izləyirdi.

İlk dəfə hava limanında hamı kimi sıraya düzülən zaman göz-gözə gəlmişdik onunla. Cılız bədəni ilə heç də cəlbedici görümürdü kənardan. Saralmış dişlərindən hər gün bir qutudan çox siqaret çəkdiyi dərhal anlaşılırdı. Bütün imkanlarını sanki bədəninin cazibədarlığını ortaya qoymaq üçün xərcləmişdi. Sarı saçlarını arxadan yığmış, qısa ətəyini geyinmiş və aşırı makiyajı ilə elə ilk baxışda özü haqqında təəssürat yaratmışdı ətrafdakılara. Dərin sinə dekoltesi isə tamamilə ürəyincə idi.

Elə hey ora-bura vurnuxur, təyyarənin qalxacağı saatı səbirsizliklə gözləyirdi. Sanki kimsə onun arxasınca qaçıb təyyarədən endirəcək və əlindən gözlədiyi azadlığını alacaqmış kimi. Heç kəsə baxmamağa çalışırdı. Xüsusilə də, əks cinsin nümayəndələrinə. Amma hava limanında təyyarəyə minəcəyi anı gözləyən həmcinslərinin tənqidedici baxışlarına daha çox məruz qalırdı. Qadınların ona olan baxışları kişilərin baxışlarından daha çox narahat edirdi onu. Sanki əlində imkan olsa elə həmin an oturduğu oturacağın üstünə qalxar və ona gözləri ilə “fahişə” deyən qadınların gözünə baxıb “fahişə özünüzsüz” deyə qışqırmaq istəyirdi. Amma rəqiblərinin sayının çoxluğu onun qəlbində qorxu yaradırdı.

İstanbul sərnişinlərindən olan orta yaşlı bir qadın ərinin bu cılız, amma hər bir kişini yoldan çıxarmaq iqtidarında olan qadına baxdığını görüb tədirginliyini gizlədə bilmədi. O, qarnı qabağa doğru əyilən balacaboy dazbaş həyat yoldaşının hər an rəqibi ola biləcək qadına baxdığını görən kimi kişinin sol qolunu möhkəmcə çimdiklədi. Kişi gözləmədiyi bu hücumdan sonra yerindən durub arvadının gözünə tərs-tərs baxdı. Ancaq dazbaş kişi evli bir kişinin arvadı yanında ola-ola başqa bir qadına baxmasının səhv olduğunu başa düşürdü. O, haqsız olduğunu anlayıb arvadının bu həmləsi qarşısında kirimişcə yerinə oturdu. Və həmin an üçün bütün imkanlarını bir də o qadına baxmamağa sərf etdi.

Bu qadın İstanbula oxumağa gedən universitet tələbələrinin də diqqətindən kənarda qalmamışdı. Hələ bığ yeri təzəcə tərləyən, dodağının altında bir barmaqlıq saqqal saxlayan tələbələr də şəhvət hisslərini bu qadının yanında boğa bilmirdilər. Əyninə geyindiyi dar köynəklə bütün əzələlərini nümayiş etdirməyə can atan həmin tələbələrdən biri qadının gözü qarşısında nə qədər güclü olduğunu nümayiş etdirmək üçün dəridən-qabıqdan çıxırdı. Tək istəyi bu qadınla tanış olmaq, onun nömrəsini öyrənmək və İstanbulda kişilik ehtiyaclarını havayı ödəmək idi. Oğlanın bütün bu hərəkətləri isə qadının vecinə də deyildi.

Bir neçə saat sonra biz artıq İstanbulda idik. Kimiləri üçün xəyalların şəhəri, kimiləri üçün azadlıqların şəhəri, kimiləri üçün isə əvəzolunmaz gəlir mənbəyi. Bir sözlə, 16 milyon insanı qoynuna alan həmin şəhərə qədəmlərimizi qoyduq.

Təyyarə İstanbula endikdən sonra çantaları götürmək üçün sıramı gözlədiyim zaman yenə həmin qadın gözümə dəydi. Bakıdakından fərqli olaraq bu dəfə üzü gülürdü. Çamadanlarını aldıqdan sonra o məndə olimpiya oyunlarından bir gün qabaq azadlıq məşəlini əlinə alıb dairəvi stadionun ətafında qaçan idmançıları xatırlatdı. Səbirsizliyi üzündən görünürdü. Ona elə gəlirdi ki, sonsuzluğa qədər azadlıq şərbətininin ləzzətini damağında hiss edəcək.

Amma fərqli bir azadlığı yox idi onun da.

İstanbula ayaq basdıqdan bir neçə gün sonra dostlardan birinin göstərdiyi şəkil onun azadlığının hara qədər olduğunu mənə göstərdi. Elə həmin qadının rəsmini qürbətə getdikdən bir neçə gün sonra “İnstagram”da gördüm. Bu dəfə cılız bədənini örtmək üçün əynində heç bir libas yox idi. Anadangəlmə necə var, elə də poz vermişdi telefonun fotokamerasına. Bir xeyli lüt bədəni ilə “selfi” də çəkdirmişdi. Nömrəsini altına “Her tür hizmet gösteriyorum” deyə, bir mesaj da qeyd etmişdi.

Deməli, biz yanılmadıq. Nə mən yanıldım, nə balacaboy-dazbaş kişinin arvadı, nə də İstanbula oxumağa gələn, dar köynəkdə bütün əzələsini nümayiş etdirməyə çalışan həmin tələbə. Deməli, biz hamımız düz gözlə baxmışıq ona. Bir gecəsi 100 dollara olan azərbaycanlı fahişə kimi.../Azxəbər.com/

Ölkə.Az