Qəbələ RLS-də 52 ədəd tank və piyada əleyhinə mina tapılıb

ANAMA işlərini başa çatdırdı

Azərbaycan Ərazilərinin Minalardan Təmizlənməsi üzrə Milli Agentlik (ANAMA) Qəbələ radiolokasiya stansiyası (RLS) ərazisinin mina və partlamamış hərbi sursatlardan təmizlənməsi işlərini başa çatdırıb.

Bu barədə açıqlamasında ANAMA-nın baş əməliyyat meneceri Samir Poladov məlumat verib.

S.Poladovun sözlərinə görə, işlər avqust ayında tam yekunlaşıb. ANAMA tərəfindən stansiyanın əhatə etdiyi 230 hektar ərazi yoxlanılıb.

Əməliyyatlar zamanı stansiyanın ərazisindən 36 ədəd tank əleyhinə, 16 ədəd piyada əleyhinə mina və 1 ədəd partlamamış hərbi sursat tapılıb.

Qeyd edək ki, 1984-cü ildə SSRİ-nin raket əleyhinə müdafiə sistemi kimi inşa edilmiş Qəbələ RLS 1985-ci ildə istifadəyə verilib, Azərbaycan müstəqilliyini elan etdikdən sonra Rusiyanın istifadəsində olub.

“Azərbaycan Respublikası hökuməti və Rusiya Federasiyası hökuməti arasında Qəbələ RLS-in statusu, istifadə prinsipləri və şərtləri haqqında Saziş” 2002-ci ildə imzalanıb.

Rusiya 2012-ci il dekabrın 10-dan stansiyanın istismarını dayandırıb, 2013-cü ilin yay aylarında isə stansiya tam olaraq Azərbaycan hökumətinə təhvil verilib.

Qəbələ RLS Hind okeanı regionunda - 6 min km radiusda ballistik raketlərin buraxılışını izləməyə imkan verib./Apa/

Ölkə.Az