Deputatdan \"döy, amma öyrət\" açıqlaması: məktəblərdəki biabırçılıqlar nədən qaynaqlanır...

“20-30 il bundan əvvəl müəllimlər tərbiyə funksiyasını yerinə yetirirdilər. İndi çox təəssüf ki, müəllimlərin böyük kəsimi bu funksiyanı öz üzərlərindən atıblar”.

Bu sözləri Ölkə.Az-a açıqlamasında millət vəkili Etibar Əliyev deyib. 165 nömrəli məktəbin bir neçə şagirdinin uyğun olmayan hərəkətlərinə görə müəllimin töhmət almasından danışan deputat söyləyib ki, dərs deməklə iş bitmir:

“O vaxtlar müəllim təhsil verməklə yanaşı, həm də tərbiyəçi funksiyasını yerinə yetirirdi. İndi repetitor xidmətinin genişlənməsi, uşaqların kütləvi şəkildə dərsdən yayınması hallarının müşahidə olunması, məktəbdə nizam-intizam, tərbiyə qaydalarını pozur. Əgər müəllim, direktor və valideyn arasında uşağın dərsdən yayınması üçün müəyyən sövdələşmə olursa, məktəbdə lazımlı olmayan məsələlərdə vəsait yığılırsa, bu məktəbin ciddiliyini azaldır. Ona görə də mən bunu pisləyirəm və düşünürəm ki, məktəblərdə psixoloqlar, məktəb müəllimləri tərbiyə funksiyasını öz üzərlərinə götürməlidirlər. 

Bu gün gəldim, dərsimi dedim sonra bir qrup uşağı da hazırladım deməklə iş bitmir. Müəllim öz funksiyasını yerinə yetirməlidir. Müəllimin və ya şagirdin cəzalandırılması effekt verirmi? Əsas sual budur. Elə etmək lazımdır ki, bu hadisələr baş verməsin. 

Ən böyük məsuliyyəti isə məktəbin direktoru və onun müavinləri daşıyır. Onlar məktəbə ciddi nəzarət etməlidirlər. Onlar şagirdlərin məktəbdən yayınmasına şərait yaratmamalıdırlar. Bu gün direktorlar ya yaş ucbatından, ya da təcrübəsizlikdən bu missiyanı davam etdirə bilmirlər”.

E.Əliyevin sözlərinə görə indiki dövrdə müəllimin üzərinə düşən tərbiyə və tədris məsuliyyəti əvvəlki dövrlərdən ağır və çətindir:

“Bizim oxuduğumuz dövrdə cəmiyyət məktəbin və müəllimin tərəfində dayanırdı. O vaxt valideynlərimiz deyirdi ki, “döy, amma öyrət”. Ola bilsin ki, bunu fiziki güc tətbiq etmək mənasında demirdilər. Yəni o mənada işlənirdi ki, əgər öz axarı ilə öyrədə bilmirsənsə, hətta döyüb öyrədə bilərsən. İndi hər şey dəyişib, biz o cəmiyyətdə yaşamırıq. Bu gün bu hallara ən çox neqativ təsir göstərən amillərdən biri smartfonlar və televiziyadır. Televiziyalarda olduqca şit, bayağı verilişlər gedir. Uşaqların böyük kəsimi özünü aktyor kimi aparmağa çalışırlar, bayağı hərəkət edirlər.  

“Döy, öyrət” dedikləri vaxtlarda bu qədər KİV və sosial şəbəkə yox idi. Bir qəzet, bir də ağ-qara televiziya var idi. İndi bu hadisələrlə bağlı məlumatlar ildırım süərti ilə yayılır. Şagirdin və müəllimin adı tez bir zamanda cəmiyyətə bəlli olur. İndiki dövrdə müəllimin üzərinə düşən tərbiyə və tədris məsuliyyəti o dövrdən ağır və çətindir. Bunu müəllimlər və direktorlar da başa düşməlidirlər. İndi məktəb gözdən düşür. Çalışmalıyıq ki, buna yol verməyək”.

Qeyd edək ki, 165 nömrəli məktəbdə nizam-intizam qaydalarını pozaraq uyğunsuz hərəkətlər edən şagirdlərin və valideynlərinin izahatları alınıb, fənn müəlliminə isə töhmət verilib.

Billurə Yunus