Həftənin icmalı
Böyük Qurtuluşun yaddaşı
15.06.2015
1993-cü ilin yazında beynəlxalq güclər Azərbaycanı parçalayaraq 11 subyektdən ibarət federativ dövlətə çevirmək üçün fəaliyyətə başlamışdılar. Məqsəd Türkiyə prezidenti Turqut Ozalın qurmaq istədiyi Böyük Türk Birliyi ideyasını beşiyində boğmaq idi. Bu plana görə, Azərbaycanın o vaxtkı prezidenti Əbülfəz Elçibəy istefaya göndərilməli, Orta Asiya türk cümhüriyyətləri ilə Türkiyə arasında körpü rolunu Azərbaycan demək olar ki, tam müstəqil kiçik dövlətlərə parçalanmalı idi.
Bu faktları Bütöv Azərbaycan Birliyinin (BAB ) 2000-ci ildə keçirilən iclasında mərhum Əbülfəz Elçibəy demişdi. Bu sətirlərin müəllifi olan ANS PRESS əməkdaşının da jurnalist kimi qatıldığı həmin iclasda Əbülfəz Elçibəy son dəfə sədrlik edirdi. Ağır xəstə olduğunu bilən və Ankaraya səfərə hazırlaşan Elçibəy “Bəlkə də geri dönmədim, istəmirəm ki, bəzi sirlər açılmamış qalsın” demişdi.
Naxçıvana uçan təyyarə təcili eniş etdi
15.06.2015
Bu gün Bakı-Naxçıvan marşrutu üzrə AHY-255 reysini həyata keçirən "Boeing-757" təyyarəsi avialaynerin mühərriklərinin birində yaranan nasazlıq səbəbindən Heydər Əliyev Beynəlxalq Hava Limanına qayıdıb.
"Azərbaycan Hava Yolları" QSC-nin mətbuat xidmətində daxil olan məlumata görə, eniş yerli vaxtla saat 19:21-də ştat rejimində başa çatıb.
Qayıdan təyyarənin sərnişinləri yaxın vaxtlarda ehtiyat təyyarə ilə Naxçıvana yola salınacaq.
Azərbaycanda intizamsız sürücülərlə yeni mübarizə üsulu
16.06.2015
Azərbaycanın yol polisi qarşı hərəkət zolağına çıxmaqla nəqliyyatın sərbəst hərəkətinə mane olan, yolayrıclarında digər hərəkət iştirakçılarına qəza şəraiti yaradan, cəmiyyətə açıqca hörmətsizlik ifadə edən intizamsız sürücülərlə mübarizənin daha effektli olması üçün onların törətdikləri əməllərinin ictimailəşdiriləcəyi barədə xəbərdarlıq edib.
Ölkə.Az xəbər verir ki, Daxili İşlər Nazirliyi (DİN) Respublika Baş Dövlət Yol Polisi İdarəsinin (BDYPİ) İctimaiyyətlə əlaqələr şöbəsinin rəisi, polis polkovniki Kamran Əliyev Trend-ə açıqlamasında deyib ki, son vaxtlar qarşı hərəkət zolağına çıxmaqla nəqliyyatın sərbəst hərəkətinə mane olan, yolayrıclarında digər hərəkət iştirakçılarına qəza şəraiti yaradan sürücülərə tez-tez rast gəlinir:
“Görünür, bəzi intzamsız sürücülər elə düşünürlər ki, yol polisi əməkdaşlarının diqqəti yalnız ölkəmizdə keçirilən ilk Avropa Oyunları ərəfəsində nəqliyyatın hərəkətinin tənzimlənməsinə və tədbir iştirakçılarının təhlükəsizliyinin təmin olunmasına yönəlib. Lakin bu cür fikirləşənlər yanılırlar.
Azərbaycanda 6 mindən çox şagird ana dilini bilmədi
16.06.2015
Tələbə Qəbulu üzrə Dövlət Komissiyası iyunun 11-də orta ümumtəhsil müəssisələrinin 9 və 11-ci sinif şagirdləri üçün keçirdiyi növbəti buraxılış imtahanlarının nəticələrini açıqlayıb.
Ölkə.Az qurumun saytına istinadən xəbər verir ki, imtahanlar Naxçıvan, Qobustan, Ağcabədi, Ağdam, Zərdab, Bərdə, Tərtər, Göyçay, Ucar, Kürdəmir, Ağdaş, Yevlax, Ağsu, İsmayıllı, Şamaxı, Quba, Şabran, Qusar, Xaçmaz, Xızı, Siyəzəndə, həmçinin Naxçıvan Muxtar Respublikasının Kəngərli, Babək, Ordubad, Sədərək, Culfa, Şərur və Şahbuz rayonlarında yerləşən orta ümumtəhsil müəssisələrinin buraxılış siniflərində mərkəzləşdirilmiş qaydada aparılıb.
İmtahanda iştirakı nəzərdə tutulan 20865 şagirddən 449 nəfəri imtahana gəlməyib, 3 nəfər qaydaları pozduğu üçün nəticələri ləğv olunub. TQDK-nın internet saytında 20 413 şagirdin imtahan nəticələri yerləşdirilib. İştirakçılardan 39 nəfəri maksimum nəticə göstərərək 90 bal toplayıb. Ana dili imtahanından 4 520 nəfər iki, 3336 nəfər isə beş qiyməti alıb.
Şamaxı rəsədxanası — Təşvişə səbəb yoxdur
16.06.2015
““İkar” asteroidinin Yer kürəsinə yaxınlaşmasının və keçib getməsinin heç bir təhlükəsi yoxdur, narahat olmağa dəyməz”.
Bunu açıqlamasında Azərbaycan Milli Elmlər Akademiyasının (AMEA) N.Tusi adına Şamaxı Astrofizika Rəsədxanasının aparıcı elmi işçisi, fizika üzrə fəlsəfə doktoru Ədalət Ətai deyib.
Onun sözlərinə görə, “İkar” kiçik cisimlərdən hesab olunur, onlar az müşahidə olunurlar: “Dünən də Yer kürəsindən 26 mln. km məsafədə kiçik cisimlərdən biri keçib. Məsafə o qədər böyükdür ki, onun Yerə yaxınlaşması mümkün deyil. “İkar”ın diametri 1 kilometrə, kütləsi isə 100 min tona yaxındır. Onun yerlə məsafəsi Ayla Yer arasındakı məsafədən 21 dəfə çoxdur. Təqribən 10 milyon kilometr aralıdan keçib gedəcək. Ona görə də narahat olma dəyməz”.
Avropa Məhkəməsinin Azərbaycanla bağlı qərarı
16.06.2015
Bu gün Avropa İnsan Haqları Məhkəməsinin Böyük Palatası (AİHM) “Çıraqov və başqaları Ermənistana qarşı” şikayət ərizəsi üzrə qərar çıxarıb.
Məhkəmə prosesinə AİHM sədri Din Şpilman sədirlik edib. Azərbaycandan Xanlar Hacıyev, Ermənistandan isə Alvina Gülümyanın da qatıldığı məhkəmədə 17 hakim iştirak edib.
Azərbaycanın Laçın rayonunun bir qrup sakini 1992-ci il mayın 17-də zorla evlərindən qovulduqlarını, onların mülkiyyətini ermənilərin ələ keçdiyi bildirərək, 2005-ci ildə AİHM-ə şikayət ərizəsi ilə müraciət etmişdilər. Strasburq Məhkəməsi on ildən sonra çıxartdığı qərarında şikayətçilərə qarşı Avropa İnsan Haqları Konvensiyasının 1-ci Protokolunun 1-ci maddəsi (mülkiyyətin toxunulmazlığı), Konvensiyanın 8-ci (şəxsi həyatın toxunulmazlığı), 13-cü (ədalətli mühakimə hüququ) maddələrinin davamlı pozulduğunu bildirib.
Şikayətçilərin ərizəsi ilə bağlı məhkəmə Ermənistanın Dağlıq Qarabağ və ona birləşik ərazilərə effektiv nəzarət etdiyini və nəticədə Laçın rayonunun Ermənistan yurisdiksiyası altında olduğunu təsdiq edib.
İlham Əliyevin oğlu əlaçı oldu
17.06.2015
Prezident İlham Əliyevin oğlu Heydər Əliyev təhsil aldığı Azərbaycan Diplomatiya Akademiyasında yay imtahan sessiyasını uğurla başa vurub.
Ölkə.Az xəbər verir ki, bu barədə AzVision.az-a onun qrup yoldaşları məlumat verib.
Bildirilib ki, H. Əliyev imtahanlar zamanı çox yüksək nəticə göstərib.
“İmtahanlarımız artıq başa çatıb. Heydər Əliyev dərslərini çox yaxşı oxuyurdu. O, bütün imtahanlarda yüksək nəticə göstərib və əlaçı olub”.
Avtomobillər İçərişəhərə buraxılmayacaq
17.06.2015
I Avropa Oyunlarının velosiped yarışları ilə əlaqədar İçərişəhərdə nəqliyyat hərəkəti məhdudlaşdırılacaq.
“İçərişəhər” Dövlət Tarix-Memarlıq Qoruğu İdarəsindən Ölkə.Az-a verilən məlumata görə, Bakı 2015 I Avropa Oyunlarının kişilər və qadınlar arasında fərdi ötüşmə velosiped yarışının marşrutunun bir hissəsinin “İçərişəhər” Dövlət Tarix-Memarlıq Qoruğu ərazisindən keçməsi ilə əlaqədar olaraq 18 iyun axşam saatlarından başlayaraq 19-21 iyun tarixlərində İçərişəhərə avtomobillərin girişi və hərəkəti müvəqqəti olaraq məhdudlaşdırılacaq.
Yarışla əlaqədar İçərişəhərin sakinləri və qonaqları üçün yarana biləcək müvəqqəti narahatçılığın minimuma endirilməsi məqsədi ilə “İçərişəhər” Dövlət Tarix-Memarlıq Qoruğu İdarəsi tərəfindən bütün lazımi tədbirlər görüləcək.
XİN Avropa Məhkəməsinin qərarı ilə bağlı bəyanat yaydı
17.06.2015
Azərbaycan Respublikası Xarici İşlər NazirliyiAvropa İnsan Haqları Məhkəməsi Böyük Palatasının “Çıraqov və digərləri Ermənistana qarşı” işi üzrə çıxardığı qərarla bağlı bəyanat yayıb.
XİN-in mətbuat xidmətindən Ölkə.Az-a daxil olan bəyanatda deyilir:
“16 iyun 2015-ci il tarixində Avropa İnsan Hüquqları Məhkəməsinin Böyük Palatası “Çıraqov və digərləri Ermənistana qarşı” işi ilə bağlı qərarını elan edib. Sözügedən iş erməni təcavüzü dövründə Azərbaycanın Laçın rayonu ərazisindən qovulmuş altı Azərbaycan vətəndaşının Ermənistan Respublikasına qarşı 6 aprel 2005-ci il tarixli iddia müraciətinə əsaslanır.
Mikayıl Cabbarov federasiyaya prezident seçildi
17.06.2015
Təhsil naziri Mikayıl Cabbarov Azərbaycan Badminton Federasiyasına prezident seçilib.
“Azərbaycanda idmana xüsusi diqqət yetirilir, bizim idmançılarımız isə bir çox idman növlərində öz məharətlərini nümayiş etdirirlər. Bu idman növü üzrə yüksək nailiyyətlərin əldə edilməsi üçün badmintonun ölkəmizdə populyarlaşdırılması üzrə iş aparılacaq.
Məktəblilərin badmintona cəlb edilməsinə gəldikdə isə, heç kəs heç kəsi məcbur etməyəcək. Sadəcə bütün məktəblərdə digər idman növləri ilə yanaşı badminton üçün də texniki baza yaradılacaq”- yeni vəzifəyə seçilməsini şərh edən M.Cabbarov bildirib.
Cəbhə xəttində monitorinq baş tutdu
17.06.2015
ATƏT-in fəaliyyətdə olan sədrinin şəxsi nümayəndəsinin mandatına uyğun olaraq iyunun 17-də Göygöl rayonunun Ömər dağ keçidindəki qoşunların təmas xəttində keçirilən monitorinq insidentsiz başa çatıb.
Bu barədə Ölkə.Az Müdafiə Nazirliyinin məlumatına istinadla xəbər verir.
Qeyd edək ki, monitorinqi Azərbaycan tərəfdən ATƏT-in fəaliyyətdə olan sədrinin şəxsi nümayəndəsi Anjey Kasprşik, səhra köməkçisi Xristo Xristov və yüksək səviyyəli planlaşdırma qrupunun nümayəndəsi polkovnik Tuncay Sevim keçiriblər.
Şadlıq evlərinə bu qadağalar qoyuldu
17.06.2015
Azərbaycan Standartlaşdırma, Metrologiya və Patent üzrə Dövlət Komitəsinin əmri ilə AZS 746-2012 “Şadlıq saraylarının təsnifatı və ümumi qaydalar” dövlət standartına dəyişiklik edilib.
Komitədən Ölkə.Az-a verilən məlumata görə, dəyişikliyə əsasən mətbəxdə qabların yuyulması iki üsulla əl və qabyuyan maşınlar vasitəsilə aparılmalıdır. Qablar əl ilə yuyularkən müəssisə iri mətbəx qazanları və avadanlıqların yuyulması üçün üç bölümlü, şüşə qablar və mətbəx dəstlərinin yuyulması üçün iki bölümlü vannalarla təmin olunmalıdır.
Təmiz mətbəx qabları və avadanlıqların alt hissəsi döşəmədən ən azı 50-70 sm hündürdə olan rəflərdə, təmiz mətbəx dəstləri zalda xüsusi şkaflarda, təmiz boşqablar isə bağlı şkaflarda və ya rəflərdə saxlanmalıdır. Onların məcməyidə səpələnmiş vəziyyətdə saxlanmasına icazə verilmir.
Bakı dünyanın ən bahalı şəhərləri sırasında
17.06.2015
Bakı xaricilərin yaşaması üçün dünyanın ən bahalı şəhərləri sırasında 33-cü pillədədir.
Reytinqi Mercer şirkəti tərtib edib.
Moskva reytinqə görə 50-ci yerdədir. Almatı 94-cü yerdə, Riqa-11-ci yerdə, Aşqabad-127-ci yerdədir. Tallin 155-ci, Daşkənd 162-ci sırada yerləşib.
Vilnyus reytinqdə 171-ci mövqedə, Kiyev 184-cü pillədədir. İrəvan 192-ci, Tbilisi-198-ci, Minsk-200-cü pillədə qərarlaşıb. Bişkek xarici vətəndaş üçün ən ucuz şəhər kimi tanınıb.
İkinci ildir ki, reytinqin birinci pilləsini Luanda (Anqola) tutur.
Siyahıda ümumilikdə 207 şəhər təqdim edilib.
TQDK nəticələri açıqladı
17.06.2015
TQDK tərəfindən iyunun 16-da keçirilmiş buraxılış imtahanının (IX və XI siniflər üçün) nəticələri elan olunub.
İmtahanda iştirak etmiş şagirdlər öz nəticələri ilə TQDK-nın internet saytında və ya iş nömrəsini 7727 nömrəsinə göndərməklə tanış ola bilərlər.
Kolleclərə və V qrupa ərizə təqdim etmiş abituriyentlərin nəzərinə aşağıdakı məlumatı bir daha çatdırırıq:
Ümumi ( 9 illik) orta təhsil bazasında kolleclərin müsabiqəsində ümumi balı 16-dan, hər bin fənn üzrə minimal balı 8-dən az olmayan abituriyentlər iştirak edə bilərlər.İxtisas seçimi iyulun 8-dən 15-dək internet vasitəsilə aparılacaq. Qəbul aparılacaq ixtisaslar və digər məlumatlar 3 saylı "Abituriyent" jurnalında təqdim olunub.
Tam (11-illik) orta təhsil bazasında kolleclərin müsabiqəsində ümumi balı 16-dan və ana dili, riyaziyyat fənlərinin hər biri üzrə minimal balı 8-dən az olmayan ( xarici dil və ya kimya fənni üzrə nisbi bal məhdudiyyəti tətbiq edilmir) abituriyentlər iştirak edə bilərlər. İxtisas seçimi avqustun 14-dən 19-dək aparılacaq. Qəbul aparılacaq ixtisaslar və digər məlumatlar 5 saylı "Abituriyent" jurnalında təqdim olunacaq.
Ramazan ayının 1-ci gününün — DUASI
18.06.2015
Müqəddəs Ramazan ayının başlaması ilə əlaqədar bu ayın hər günü üçün nəzərdə tutulan duaları və gündəlik təqvimi təqdim edəcəyik.
01 ramazan 1436 – 18 iyun 2015
Qafqaz Müsəlmanları İdarəsinin təqviminə əsasən:
Sübh namazı - 04:39
Gün Çıxma - 06:10
Axşam namazı - 21:29
İmsaq: 04:39
İftar: 21:29
Bu günün duası:
Allahumməc-əl siyami fihi siyaməs-saiminə və qiyami fihi qiyaməl-qaimin. Və nəbbihni fihi ən növmətil-ğafilin. Vəhəb li cürmi fihi ya ilahəl-aləmin. Və-fu ənni ya afiyən ənil-mücrimin.
Tərcüməsi:
İlahi, bu ayda tutduğum orucu həqiqi oruc tutanların orucundan, gecələr oyaq qalmaqla etdiyim ibadətləri əsil gecə ibadətçilərinin ibadətindən qərar ver. Məni bu ayda qafillərin getdiyi yuxudan uzaq et. Bu ayda günahlarımdan keç, ey aləmlərin tanrısı. Məni bağışla, ey günahkarları bağışlayan!
Ramazan bayramında 2 gün iş olmayacaq
18.06.2015
Ramazan bayramında 2 gün qeyri-iş günü olacaq.
Nazirləri Kabinetinin qərarına əsasən, 2015-ci ildə Ramazan bayramı iyulun 17-si və 18-də qeyd olunacaq.
18 iyul şənbə gününə təsadüf etdiyindən Əmək Məcəlləsinə əsasən, iş və istirahət günlərinin yerləri dəyişdirilərək 20 iyul qeyri-iş günüdür.
Beləliklə, Ramazan bayramı münasibətilə ardıcıl 4 gün - iyulun 17-si, 18-i, 19-u (bazar) və 20-si qeyri-iş günü olacaq.
Səhiyyə Nazirliyi 52 sahibkarı cərimələdi
18.06.2015
Azərbaycanın sanitariya-epidemioloji xidmət orqanları bu ilin may ayı ərzində yeyinti sahəsində işləyən 52 sahibkarı inzibati qaydada cərimələyib.
Azərbaycan Səhiyyə Nazirliyi Respublika Gigiyena və Epidemiologiya Mərkəzindən (RGEM) Ölkə.Az-a verilən məlumata görə, sahibkarlar yeyinti məhsullarının istehsalı, satışı, saxlanması və daşınması zamanı sanitariya norma və qaydalarının tələblərini pozduqları, laboratoriya müayinələri gigiyenik normalara cavab verməyən məhsullar istehsal etdikləri üçün cərimələniblər. Bu müddətdə 20 obyektin istismarının dayandırılması barədə qərar qəbul edilib.
Ziya Məmmədovun qəbul vaxtı dəyişdi
18.06.2015
Nəqliyyat naziri Ziya Məmmədovun iyunun 19-da Şəmkir rayonunda keçirilməsi nəzərdə tutulan vətəndaşların qəbulunun vaxtı dəyişdirilib.
Bu barədə Ölkə.Az-a Nəqliyyat Nazirliyindən bildirilib.
Nazirlik bildirib ki, vətəndaşların qəbulunun vaxtı dəyişdirilərək iyul ayına keçirilib.
“Bu barədə əlavə məlumat veriləcək”- deyə, nazirlikdən bildiriblər.
Dəmirəlin dəfn mərasimində Azərbaycanı Oqtay Əsədov təmsil edəcək
18.06.2015
Milli Məclisin sədri Oqtay Əsədov Türkiyə Respublikasının 9-cu Prezidenti Süleyman Dəmirəlin dəfn mərasimində iştirak etmək üçün iyunun 18-də Ankaraya səfər edəcək.
Ölkə.Az Milli Məclisin mətbuat xidmətinin məlumatına istinadla xəbər verir ki, səfər çərçivəsində parlament sədrinin Türkiyə rəsmiləri və mərasimdə iştirak edən nümayəndə heyətlərinin başçıları ilə bir sıra görüşləri gözlənilir.
Tədbirlərdə Milli Məclis Aparatının rəhbəri Səfa Mirzəyev və digər rəsmi şəxslər iştirak edəcəklər.
Səfər iyunun 19-da başa çatacaq.
Müasir Azərbaycanımızın cəsurluq, qəhrəmanlıq və zəfər tarixi
18.06.2015
Milli Qəhrəman Mübariz İbrahimovun şəhid olmasından 5 il ötür. Göstərdiyi şücaətlə bir çox gənclərdə vətənpərvərlik hissini alovlandıran Mübariz İbrahimov bu gündə sevənləri, yaxınları və hərbiçi dostları tərəfindən anılır.
5 ildir ki, Azərbaycan xalqı 18 iyunu təkcə Milli Qəhrəmanın şəhadət günü kimi deyil, müasir Azərbaycan tarixinin cəsurluq, qəhrəmanlıq, zəfər tarixi kimi qeyd edir.
Mübariz İbrahimov 1988-ci ildə Biləsuvar rayonunun Əliabad kəndində anadan olub. Əsgəri xidmətini daxili qoşunların “N” saylı hərbi hissəsinin xüsusi təyinatlı bölüyündə keçirib. Hərbi xidmətini 2007-ci ildə çavuş kimi başa vuran Mübariz bir müddət mülki işlərdə çalışsa da, 2009-cu ilə avqust ayında yenidən gizir rütbəsində xidmətə başlayıb.
O, 2010-cu il iyunun 18-də gecə təkbaşına iki ordu arasındakı 1km-lik minalanmış sahəni keçərək Ermənistan Silahlı Qüvvələrinin çox sayda əsgər və zabitini məhv edib. 5 saatlıq təkbətək qeyri-bərabər döyüşdə özü də qəhrəmancasına şəhid olub.
Bakıda iftar çadırları qurulur
19.06.2015
Hər il olduğu kimi bu il də Azərbaycanın paytaxt və müxtəlif rayonlarında iftar çadırları qurulur.
Qafqaz Müsəlmanları İdarəsinin xarici əlaqələr şöbəsinin müdiri Müqəddəs Payızovun verdiyi məlumata görə, artıq Bakı kəndlərində belə çadırlar qurulub və iftar süfrələri verilir. Onun sözlərinə görə, Qaraçuxur və İlahiyyat məscidlərində 30 gün ərzində iftar verilməsilə bağlı idarəyə məlumat verilib.
Qeyd edək ki, Şəki və Qəbələ rayonlarında iftar çadırları açılacaq. Bu rayonlardakı iftar çadırları da əhalinin maliyyə dəstəyilə təşkil olunur. İftar çadırları Ramazan ayının sonuna qədər əhaliyə açıq olacaq.
Şəxsiyyət vəsiqəsi ilə ölkədən getmək olar — Prezidentdən sərəncam
19.06.2015
Prezident İlham Əliyev "Azərbaycan Respublikasının Miqrasiya Məcəlləsində dəyişikliklər edilməsi haqqında" Azərbaycan Respublikasının 2015-ci il 29 may tarixli 1295-IVQD nömrəli Qanununun tətbiqi barədə sərəncam imzalayıb.
Dəyişikliklərə əsasən, Məcəllənin 10.1-ci maddəsinə aşağıdakı məzmunda üçüncü cümlə əlavə edilir:
“Xarici dövlətlərlə müvafiq beynəlxalq müqavilə bağlanmış olduğu halda, Azərbaycan Respublikası vətəndaşının şəxsiyyət vəsiqəsindən də vətəndaşın ölkədən getmək və ölkəyə gəlmək hüququnun həyata keçirilməsi üçün nəzərdə tutulan sənəd kimi istifadə oluna bilər”.
Bakının bu yolları 2 gün bağlı olacaq
19.06.2015
İki gün ərzində paytaxtın bir çox küçə və prospektləri nəqliyyat vasitələrinin hərəkəti üçün bağlı olacaq. Çünki iyunun 20-si və 21-də Avropa Oyunları çərçivəsində kişilər və qadınlar arasında velosiped yarışları keçiriləcək. Bu isə o deməkdir ki, velosipedlərin keçdiyi küçələrdə digər nəqliyyat vasitələrinin hərəkətinə icazə verilməyəcək.
Şəhərin mərkəzi küçə və prospektləri sabah səhər 5:30-dan axşam 21:00-a, iyunun 21-də isə gecəyarısı 3:30-dan axşam saat 21:00-a qədər bağlı olacaq.
Avtomobillərin hərəkətinə məhdudiyyətlər qoyulacaq yollar - Neftçilər prospekti, Mehdi Hüseyn, Teymur Elçin, Lermantov küçələri, Parlament prospekti, Hüseyn Cavid, Üzeyir Hacıbəyli, Rixard Zorge, Rəşid Behbudov, Zərifə Əliyeva, Əziz Əliyev, Bakıxanov, Şəmsi Bədəlbəyli, Səməd Vurğun, Landau küşləri, Bülbül, İstiqlaliyyət, İnşaatçılar prospektidir.
Azərbaycan reytinqdə yerini bir az da möhkəmləndirdi
20.06.2015
Bu gün birinci Avropa Oyunlarında keçirilən yarışlarda Azərbaycan 13-ci qızıl medalını qazanıb.
Komandamız bu gün 1 qızıl medal əldə edib. Reytinq siyahısına Avropa Oyunlarının 4-cü günündən sonra Rusiya başçılıq edir.
Kişi idmançılar arasında olan reytinq cədvəlində də 1-ci yerdə Rusiya, 2-ci yerdə Azərbaycandır. Qadın idmançıların reytinq cədvəlində komandamız bir pillə geriləyərək 6-ci yerə düşüb.
Ümumilikdə, Azərbaycan birinci Avropa Oyunlarında 13 qızıl, 5 gümüş və 12 bürünc medal qazanıb. Rusiya idmançıları isə 27 qızıl, 12 gümüş, 10 bürünc medal qazanıb. Rusiya ümumilikdə 49, Azərbaycan isə 30 medala sahibdir.
Ölkə.az
