Vərəm dispanserində ölüm saçan mənzərə

Suraxanı rayonu Zığ qəsəbəsindəki 6 saylı xüsusiləşdirilmiş vərəm xəstəxanasında antisanitar vəziyyət hökm sürür.

Buradakı xəstələrin Ölkə.az-a verdiyi məlumata görə, xəstəxanada su problemi var:

"Çox xahiş edirik ki, adımızı yazmayasınız. Çünki bilsələr, bizi burdan qovarlar. Bura elə xəstəxanadır ki, mikrob yayılmamalıdır. Amma fotolardan gördüyünüz kimi natəmizlikdi. Gündə bir dəfə "şlanq"la su verirlər, onu da da tualetə. Suyu maşınlar gətirir çənə doldurur, oradan götürürük. Hər yeri tarakanlar basıb, iydən oturmaq mümkün deyil".

Xəstələr deyir ki, dəfələrlə baş həkim İlhamə Cabbarova ilə görüşüb dərdlərini demək istəsələr də, mümkün olmayıb. Hətta Cabbarovanın əlaqə nömrəsini belə öyrənə bilməyiblər:

"Ötən il burada piket elədik. Efirdən gəlib çəkdilər, "Azərsu"nun nümayəndələri də var idi. Dedilər ki, hər gün iki dəfə su veriləcək. Amma bir müddət sonra yenə eyni vəziyyətdir. Şənbə və bazar günləri isə ümumiyyətlə su verilmir. Deyirlər ki, bu, "Azərsu"nun problemidir və Zığ qəsəbəsinə suyun verilməsində problem var. Amma qarşıdakı çayxanaya gedib baxın, su necə təzyiqlə gəlir".

Məsələ ilə bağlı adı çəkilən bütün tərəflərin mövqeyini dərc etməyə hazırıq.

Xatırladırıq ki, bir müddət öncə haqqında söhbət gedən vərəm dispanserindəki problem haqqında ans telekanalı süjet də hazırlamışdı. Həmin verlişin videosunu sizə təqdim edirik:

İntiqam VALEHOĞLU
Ölkə.az