"Onun heç 2 min biti yoxdur..." - rüşvət və zorakılıq iddiası
Bu gün Ölkə.Az-a Allahverən Şərifovun Cəlilabad sakinindən 2 min manat rüşvət istəməsi və onu döyməsi haqda məlumat daxil olub. Məlumatı redaksiyamıza videogörüntü şəklində təqdim edən vətəndaş hüquqlarının kobud surətdə pozulduğunu iddia edir.
Xatırladırıq ki, Əmək və Əhalinin Sosial Müdafiəsi Nazirliyi, 30 saylı Tibbi-Sosial Ekspert Komissiyasının (TSEK) sədri Xoşbəxt Ağayevanın həbsindən sonra Cəlibadda yerləşən bu mərkəzə Allahverən Şərifov müvəqqəti sədr təyin edilib.
Videoda adı çəkilən idarənin müvəqqəti sədri, vətəndaşın hüquqlarını kobud surətdə pozduğu iddia edilən Allahverən Şərifovla əlaqə saxladıq.
Allahverən Şərifov yarızarafat yarıciddi dedi ki, nə yaxşı hələ az deməyib, yoxsa 5-10 manat deyib adamı lap biabır edərdi.
Allahverən Şərifov: "Siz o kişinin başdan ayağa görkəmini görsəniz, deyərsiniz bunun heç 2 min biti, 2 min tükü yoxdur. Siz onu görsəniz bilərsiniz və əmin olarsınız ki, mən ondan 2 min manat istiyərəm, yoxsa yox. Burada nazirliyin nümayəndəsiyəm, müvəqqəti əvəzediciyəm. Biz buranın işçiləri deyilik, həbslərdən sonra göndərilmişik bura, 1 həftədir buradayıq, 1-2 həftədən sonra buraya yeni sədr təyin ediləndən sonra gedəcəyik. Bizi bura göndəriblər ki, camatın arayışlarını verək, onları yola salaq. Heç bir şey demirəm, gəlin burada camaatı danışdırım, görək o adam kimdi, necə biridir. O, gəldi girdi bura, nəvəsini atdı yerə, başladı söyüş söyməyə. Salamsız-kəlamsız təhqirə keçdi. Niyə təhqir etdiyini də deyim, ona görə təhqir edir ki, bizi hövsələdən çıxarsın, biz ona ya cavab verək, ya da əl qaldıraq. Mən bura nazirliyin adını qorumaq üçün gəlmişəm, pul yığmağa yox. O kişinin dedikləri başdan başa yalandır, istəyirsiz gəlin öz gözünüzlə hər şeyi görün".
Səxavət Məmməd
Ölkə.Az