Peşə Bayramı Azərbaycan Səfirliyində qeyd olundu

Cənəb səfir xatirə hədiyyələrini təqdim etdi.

Ölkə.Az xəbər verir ki, dövlət qulluqçularının peşə bayramı münasibətiylə Moskva şəhərində fəaliyyət göstərən Azərbaycan-Rusiya Mədəniyyət və Həmrəylik mərkəzinin “MAYAK” həftəsonu məktəbinin şagirdləri və idarə heyətinin üzvləri , Azərbaycan Səfirliyinin qonağı oldular.

Azərbaycan Səfirliyinin humanitar məsələlər üzrə müşaviri Nigar Axundova şagirdləri ana nəvazişiylə qarşılayaraq “Azərbaycana xoş gəlmisiniz” deyə salamladı. Daha sonra səfirliyin fəaliyyəti haqqında məlumat verildi və 1990-ci il 20 Yanvar hadisəsindən sonra bütün dünyaya bəyanat verdiyi qonaq otağında Ulu Öndər Heydər Əliyevin əziz xatirəsi yad edildi. Qonaqlar səfirliyin Azərbaycan güşəsi və kitabxanasıyla tanış oldular. Nəfis tərtibiylə şagirdlərin diqqətini çəkən Azərbaycan güşəsi haqqında təhsil məsələləri üzrə müşavir Arif Babayev geniş məlumat verdi. Azərbaycanın Rusiya Federasiyası Fövqalada və Salahiyyətli Səfiri cənab Polad Bülbül oğlu qonaqları qəbul edərək onları çay süfrəsinə dəvət etdi.Şagirdlərlə səmimi söhbət edən cənab səfir harada yaşamağından asılı olmayaraq öz Ana dilimizi sevməyi və qorumağı, Azərbaycan bayrağını daim zirvələrə yüksəltməyi arzuladı. İdarə heyətinin üzvü Naməddin Qurbanov “MAYAK” həftəsonu məktəbi haqqında məlumat verərək bildirdi ki, bu məktəbdə Moskvada yaşayan azərbaycanlıların övladları Ana dili və ədəbiyyatını, Azərbaycan tarixi və Azərbaycanın mədəni dəyərlərini öyrənirlər. Şagirdlər isə öz növbəsində cənəb səfiri və səfirliyin bütün əməkdaşlarını peşə bayramı münasibətiylə təbrik edərək onlara “Azərbaycan şeirini” ərmağan etdilər.

Azərbaycan-Rusiya Mədəniyyəti və Həmrəylik mərkəzinin icracı direktoru Mehman Şükürov, Rəyasət heyəti adından Cənəb Polad Bülbül öğlunu və bütün əməkdaşları təbrik edərək xatirə hədiyyəsini təqdim etdi.

Cənəb səfir onları təbrik edən şagirdlərə və idarə heyətinin üzvlərinə öz təşəkkürünü bildirdi və səfirliyin xatirə hədiyyələrini təqdim etdi.

Ölkə.Az