Astaradan sonra Masallının da öz bulvarı olacaq

Bu dəfə Xəzər Dənizinin yox, Viləşçayın sahilində.

Masallı rayonunda park bulvar kompleksinin tikintisinə başlanılıb. Bu, son 2 ildə cənub bölgəsində inşa olunan sayca ikinci bulvar kompleksidir.

Bulvar üçün inşaat işlərinə ötən ilin oktyabr ayından start verilib. Lakin çayda suyun səviyyəsi çoxaldığından, tikinti işləri müvəqqəti dayandırılmışdı. 2015-ci ilin mart ayından etibarən tikinti işləri yenidən davam etdirilən bulvarın ümumi uzunluğu 750 metrdir.

Hazırda çayın yataq hissəsində qazma və betonlama işləri aparılır. Bəndin hər iki tərəfdən hündürlüyü 3,7 metr, çayın iki sahili arasındakı məsafə 10, bulvarın eni isə 130-140 metr olacaq.

Tikinti işləri ilə əlaqədər Viləşçayın axını sol istiqamətə dəyişdirilib. Betonlama işləri tamamlandıqdan sonra çayın istiqaməti beton məcraya yönəldiləcək.

Tikinti işləri başa çatdıqdan sonra çayın hər iki sahilində yaşıllıq zolaqları, idman meydançaları salınacaq və çayın üzərində asma körpülər inşa ediləcək. Uşaqların istirahəti üçün atraksionlar, əyləncə mərkəzləri, kafe-çayxana da nəzərdə tutulub.

Park bulvarın 1 il ərzində istifadəyə verilməsi planlaşdırılır. (Region TV)

Ölkə.Az