Prezidentə müraciət edildi

“125-lər” Siyasi Klubu Azərbaycan Respublikasının Prezidenti cənab İlham Əliyevə təqvimə “Bakı günü”nün salınması ilə bağlı müraciət edib. 

Müraciətdə deyilir: Hörmətli cənab Prezident, 96 il bundan əvvəl, 1918-ci ilin 15 sentyabr tarixində paytaxtımız Bakı şəhəri yadelli işğalçılardan, o cümlədən, erməni qəsbkarlarından azad edildi. Düşünürük ki, xalqımızın milli kimliyinin xilası və qorunması baxımından misilsiz əhəmiyyətə malik olan bu günün geniş şəkildə qeyd olunmasına ehtiyac duyulur. Bildiyiniz kimi, dünya praktikasında özünü doğrultmuş bir ənənə - şəhərlərin öz günü var. Bu, həmin şəhərlərin tarixində hər hansı əhəmiyyətli bir hadisəylə bağlı günlərdir. Belə tarixi günlərin dəyərləndirilməsi, yadda qalması, paytaxtımızın və ümumilikdə ölkəmizin təbligi baxımından da Bakının azad edilməsi gününün təqvimdə Bakı günü (şəhər günü) olaraq qeyd edilməsi faydalı bir addım olardı.

Gənc nəslin maarifləndirilməsi, onlara vətənpərvərlik, müstəqillik dəyərlərinin aşılanması, müstəqilliyin hansı qurbanlar bahasına başa gəlməsinin vurğulanması baxımından, inanırıq ki, bu təşəbbüsümüzün əhəmiyyətini, dəyərləndirəcəksiniz. “125-lər” Siyası Klubu olaraq, təklif edirik ki, 15 sentyabr Bakı günü kimi qeyd edilsin. Xahiş edirik, bu təşəbbüsümüzə dəstək verəsiniz.

Qeyd edək ki, siyasi klub həmçinin 14 sentyabr saat 12:00-da Bakının bolşevik hərbi birləşmələri və daşnak dəstələrindən azad edilməsinin ildönümü münasibəti ilə Şəhidlər Xiyabanına ziyarət təşkil edib.

Ölkə.Az