Xalq artisti Tamilla Mahmudova dünyasını dəyişib
Azərbaycanın xalq artisti, Moskva Dövlət Pedaqoji Universitetinin musiqi fakültəsinin professoru, pianoçu, “Şöhrət” ordenli Tamilla Mahmudova Almaniyada dünyasını dəyişib.
T. Mahmudovanın yaxınlarından APA-ya verilən məlumata görə, o, Almaniyaya müalicə üçün gedibmiş: “Almaniyada əməliyyat olunmalı idi, xəstəxanada dünyasını dəyişib. Cənazəsi Moskvaya gətiriləcək və uzun illər yaşadığı Moskvada dəfn olunacaq”.
Qeyd edək ki, Tamilla Mahmudova 1931-ci ildə Azərbaycanda doğulub, ilk musiqi təhsilini Azərbaycan Dövlət Konservatoriyasında alıb. Sonralar o, Moskva Konservatoriyasını və aspiranturanı bitirib. Onun repertuarına Qərbi Avropa və rus klassik bəstəkarlarının virtuoz əsərləri daxil idi. Tamilla Mahmudova musiqi haqqında çoxsaylı məqalələr, xatirələr kitabı yazıb.
