Azərbaycanda XIII əsrə aid kompleks tapıldı
Füzuli rayonu ərazisində ötən illərə qədər sadəcə sərdabə və minarədən ibarət olduğu güman edilən XIII əsrə aid Şeyx Babı Yaqub türbəsinin yaxınlığında unikal tarixi abidə kompleksi aşkar edilib. Azərbaycandakı yeganə tarixi taxıl anbarı da bu ərazidədir. Bundan əlavə burda hamam kompleksi də, yeraltı yol da var.
Qədim yaşayış məskənlərindən olan Füzulidəki Şeyx Babı Yaqub türbəsi bölgənin nadir tarixi abidələrindəndir. Xalq arasında Şıxbabı adıyla məhşur olan türbə XIII əsrdə memar Əli Məcidəddin tərəfindən inşa edilib.
Abidənin adının Şeyx Babı Yaqub olması isə vaxtıyla bölgənin tanınmış təriqət şeyxlərindən olan Yaqub ibn İsmayılın burada dəfn edilməsiylə izah edilir. Ağ daşlardan hörülən türbə Naxçıvan memarlıq məktəbinə aid olub səkkiz güşədən ibarətdir.
Füzulinin işğalı abidə kompleksinə də təsirsiz ötüşmür. Sərdabənin günbəz hissəsi ermənilər tərəfindən tamamilə dağıdılır, binanın üzərindəki tarixi elementlər isə silinərək təhrif edilməyə çalışılır.
2013-2014-cü illərdə Mədəniyyət və Turizm Nazirliyinin xəttiylə türbənin bərpasına başlanır. Bərpa zamanı kompleksin təkcə sərdabə və minarədən ibarət olmadığı məlum olur.
“Bərpayla yanaşı, qazıntı işləri aparılıb. Bu, Azərbaycan Respublikası ərazisində hələlik tapılmış yeganə taxıl anbarı olub. Kompleksdə hamam və yeraltı yol da var". - deyə Füzuli mədəniyyət və turizm şöbəsinin müdiri Elman Məmmədov bildirib.
Füzuli rayon mədəniyyət və turizim şöbəsindən əldə etdiyimiz məlumata görə, bərpa işlərinin yalnız ilk hissəsi başa çatıb. Eyni zamanda ərazidə arxeoloji qazıntılar davam etdirilir. Ehtimal olunur ki, növbəti araşdırmalar zamanı abidə kompleksinin ərazisi daha da böyüyəcək.
Ölkə.Az