Səlim Müslümov: “Ünvanlı sosial yardım almaq istəyən ailələr real gəlirlərini gizlədir”

Bölgələrdə aztəminatlı ailələrə ünvanlı sosial yardımların təyin edilməsi prosesində problemlər ortaya çıxır.

Bu barədə əmək və əhalinin sosial müdafiəsi naziri Səlim Müslümov bildirib.

Nazir deyib ki, ailələrin həqiqi gəlir mənbələrini hesablayarkən məlum olur ki, onlardan bəziləri real gəlirlərini gizlədir.

“Məsələn, ailələr gəlirlərini gizlətməyə çalışırlar: onlar kənardan transfer olunan gəlirlərini, habelə torpaqdan gələn gəlirləri, fiziki əməkdən əldə etdikləri gəlirləri gizlədirlər və s. Bu da problemlərin ortaya çıxmasına səbəb olur. Son zamanlar belə hallar xüsusilə çoxalıb. Bir çox ailələrə bununla bağlı imtinalar verilir. Məsələ ilə bağlı komissiya da qərar verir ki, belə ailələrə bir il müddətinə ünvanlı sosial yardım verilməsin. Bu da narazılıqlara gətirib çıxarır. Ona görə də bütün ailələr gəlir bəyannaməsini düzgün doldurmalıdırlar. Bu, onların alacağı məbləği azalda bilər, amma ən azından alacaqları o fərq qədər həmin ünvanlı sosial yardım təyin olunacaq. Burada hər hansı bir məhdudiyyət yoxdur”, - deyə nazir qeyd edib.

Bununla yanaşı, S. Müslümov əlavə edib ki, bəzi ailələr ailə üzvlərinin sayını da gizlədirlər: “Məsələn, ailədə iki uşaq və iki valideyn var və həmçinin nənə və baba da onlarla yaşayır. Onlar da normal təqaüd alırlar. Onlar təqaüdü yüksək almaq üçün ata və ananı ailə üzvlərinin sırasından çıxarırlar. Amma belə olmamalıdır. Onların da gəlirləri ailənin gəlirlərinin formalaşmasında iştirak edir. Bu kimi hallar ortaya çıxdıqda ailələrə yardımla bağlı imtina verilir”.

Qeyd edək ki, ailələrə ünvanlı sosial yardım təyin edilərkən hər bir ailənin real gəlirləri müəyyən edilir. Bundan sonra ailə üzvlərinin sayı vurulur müəyyən edilmiş ehtiyac meyarına və ümumi məbləğ tapılaraq ailənin gəliri həmin məbləğdən çıxılır. Ortada qalan fərq ünvanlı sosial yardımın məbləğini müəyyən edir.(apa)

Ölkə.Az