Mətn ölçüsü:
  • 100%

Baş redaktorlardan Siyavuş Novruzovun sözlərinə

Siyavuş Novruzovun medianın gündəminə oturmuş “Elektron media ilə bağlı müzakirə olunan bir neçə məsələ var. İstər saytlarda, istərsə də sosial şəbəkələrdə istənilən istifadəçi öncədən şəxsiyyət vəsiqəsinin seriya nömrəsin daxil edib sonra şərh yaza bilsin” sözlərini baş redaktorlar Ölkə.az-a verdikləri açıqlamalarında münasibət bildiriblər.

Qaynar.info saytının baş redaktoru Zahir Əzəmət: “Siyavuş müəllim bildiyimiz kimi “Kitabi-Dədə-Qorqud” dastanındakı personajlardan biridir, çox müdrük insandır. Yəqin ki, hər gecə gördüyü yuxularda ona çox gözəl vəhylər gəlir. Pasport seriyasından əlavə, ümumiyyətlə şərh yazanlar şəkillərini, boylarının ölçüsünü, gözlərinin rəngini, xasiyyətnamələrini, qohumları, qonşuları haqda tam məlumat verməlidirlər. Hətta corablarının rənginə qədər qeyd etməlidirlər. Mən Siyavuş müəllimi dəstəkləyirəm!”.

Musavat.com saytının baş redaktoru Xalid Kazımlı: “Siyavuş Novruzovun fikri absurddur. Bu isanların fikir azadlıqlarının tam şəkildə çərçivələnməsi deməkdir”.

Bizimxəbər.az saytının baş redaktoru Ədil Hüseyinli: "Siyavuş Novruzovun həmişə qəribə fikirləri olub. Mənə elə gəlir ki, bu fikir Siyavuş Novruzovun özünə məxsusdur. Pasport nömrəsi yazmaq primitiv bir şeydir. YAP rəsmisinin bu formada açıqlaması əslində ciddi qəbul olunmalıdır. Ciddi deyəndə yəni bunun altında yatan fikirlər önəmlidir. Siyavuş Novruzovun fikirlərini zaman-zaman qəbul etmişik. Sosial şəbəkədə şərh yazılan zaman pasport seriyasının yazılmasına ehtiyac yoxdur. Kimin nəyə hansı formada rəy verməsi onun şəxsi işidir. Əgər şərhlər kimisə narahat edirsə, axtarıb, araşdırıb tapsınlar. Heç bir dövlətdə nəzarətsiz heç nə yoxdur. Onsuz da sosial şəbəkəyə nəzarət var. Bütün dünyada hər bir sosial şəbəkəyə nəzarət var. Mən nəzarətin olmasını dəstəkləyirəm, ancaq bu nəzarəti primitiv şeylərlə etmək mənasızdır. Siyavuş Novruzovun bu tipli çoxlu açıqlamaları olub. Ciddi qəbul etdiklərimiz də olub, qeyri-ciddi qəbul etdiklərimiz də. Əgər bu açıqlamanın altında hansısa bir ciddi məqam yoxdursa gəlin bunu ciddi qəbul etməyək".

Azxeber.com saytının baş redaktoru Əfsələddin Ağalarov: "Hansısa oxucunun öz adını gizli saxlaması, hansısa bir fikiri bildirməsi, təbii ki, təhqirlərdən söhbət getmir, normal bir haldır. Siyavuş müəllimin bildirdiyi kimi kimsə pasport seriyasını yazdıqdan sonra şərh yazması kimi dünyada bir praktika olmayıb. Dünyanın hər yerində sosial şəbəkələrdə insanlar öz fikirlərini bildirirlər, ancaq Siyavuş Novruzovun dediyi bir praktikaya rast gəlinməyib. Sosial şəbəkələr azaddır, Azərbaycanda da internetin azad olması ilə bağlı öz təsdiqini tapmış qanunlar var. Beynəlxalq təşkilatların yayımladığı hesabatlardan da görmək olur ki, Azərbaycan internetin azad olduğu ölkələr siyahısındadır. Hal-hazırda Azərbaycanda belə bir iddianı ortaya atmağa və belə bir təcrübəyə ehtiyac yoxdur”.

Bugun.az saytlının redaktoru Elçin Bayramlı: “Qısaca deyim ki, bu effekt verməz. Hər kəs ağlına gələn pasort nömrəsini yaza bilər və bu da kiminsə pasportu ola bilər. Xarici ölkə vətəndaşları necə olacaq? Mənə qalsa profil, e-mail və bu kimi şeylər açmaq üçün pasport tələb edilməlidir, mobil telefonlarda olduğu kimi. Beləcə də həm uşaqların girişi baş tutmaz və həm də anarxiya yaranmaz”.

Qafqazinfo.az saytının baş redaktoru Elbrus Ərud: "Bu məsələyə mütəxəssislər cavab versə daha yaxşıdır. Media işçisi kimi mən bunun əleyhinəyəm. Hesab edirəm ki, bu məsələnin tətbiqi çətin prosedurdur".

Avropa.info saytının baş redaktoru Ruslan Bəşirli: "Azərbaycan saytları, xəbər portalları, agentlikəri dünyada olan xəbər saytlarının tipindəndir. Biz özümüzdən hər hansısa bir şey kəşf edə bilmərik. Siyavuş Novruzovun təklifinin bilmirəm dünyada analoqu var yoxsa yoxdur, amma mənim izlədiyim saytların, Türkiyə saytları olsun, Rusiya saytları olsun və xarici saytlar olsun, onlarda belə bir şeyə rast gəlməmişəm. Əslində hər bir media orqanı özü müəyyənləşdirməlidir nəyi necə etməyi. Misal üçün “Avropa.info” saytında ümumiyyətlə şərh yerləri yoxdur. Hər hansısa bir millət vəkilinin belə bir təklif irəli sürməsi düzgün deyil. Hər bir sayt rəhbəri özü müəyyənləşdirməlidir nəyi necə edəcəyini. Hər hansısa bir media orqanı Siyavuş Novruzovun təklifini götürüb özü də edə bilər. Media orqanının özünün və dizaynerinin fəaliyyətindən aslıdır. Bunun mütləq şəkildə qanuna salınacağı, onun qanun şəklində bütün saytlara tətbiq olunacağını gözləmirəm və bu olmayacaq. Siyavuş Novruzovun millət vəkili kimi təklif vermək hüququ var və biz də onun təklilfinə hörmətlə yanaşırıq. Ancaq bu hadisə baş versə belə bu, Azərbaycanda mətbuat azadlığının məhdudlaşdırılması demək deyil.

Bakuinfo.az saytının baş redaktoru Əvəz Qurbanlı: "Bu məsələ parlamentin iclasında hələ müzkirə olunmayıb. Hər bir məsələnin Milli Məclisin sessiyasına çıxarılmamışdan öncə sosial əsası olur. Siyavuş Novruzov bu məsələni səsləndirirsə hər halda yəqin ki, onun buna əsası var. İnternet dünyası qarşısı alınmaz bir məkandır. Burada hər kəs açıq və anonim fikirlərin bildirir. Bir halda ki, kimsə təhqir olunacaqsa və bu anonim şəkildə ediləcəksə bu insanları narahat edir. Əgər anonim şərh yazılırsa və o şərhi yazan öz adını yazmırsa bu qərəzlidir".

Xatırladırıq ki, deputat Siyavuş Novruzov bu fikirləri dünən Qafqainfo.az saytına verdiyi açıqlamasında səsləndirmişdi.

Səxavət Məmməd

Ölkə.az