“National Geographic Azərbaycan” yerli fotoqraflar üçün master-klass təşkil edəcək

“National Geographic Azərbaycan” jurnalı yerli fotoqraflarla daha geniş əməkdaşlıq etmək, onları jurnalın iş prinsipləri və materiallara olan tələblərlə tanış etmək məqsədi ilə 23-24 iyul 2015-ci il tarixlərində Bakı şəhərində “National Geographic Fotoqrafı - Arzuladığınız İş” mövzusunda master-klass təşkil edəcək.

Yerli fotoqrafların müxtəlif mövzularda təkmilləşməsinə kömək məqsədilə planlaşdırılan master-klass Rusiya Federasiyasından dəvət olunacaq məşhur fotoqraf Viktor Lyaquşkin tərəfindən keçiriləcək. “National Geographic Россия” jurnalının fotoqrafı olan Viktor eyni zamanda rəsmi Nikon fotoqrafıdır və Avropa və ABŞ-ın bir sıra şəhərlərində onun sərgiləri təşkil olunmuşdur.

“National Geographic Azərbaycan” jurnalının naşiri, “Garant” Media Holdinqin baş direktoru Elnur Baimovun sözlərinə görə, bu tədbir yerli fotoqrafların peşəkar bacarıqlarının inkişaf etdirilməsi, həmçinin onların “National Geographic Azərbaycan” jurnalı ilə əməkdaşlığa cəlb edilməsi istiqamətində atılan mühüm addım olacaq.

Master-klass nəzəri və praktiki hissə olmaqla iki mərhələdə keçiriləcək. İyulun 23-də iştirakçılara “National Geographic” jurnalının iş prinsipləri, materiallara qoyulmuş tələblər, mövzu seçimi və b. mövzularda nəzəri təlim keçiriləcək. Ayın 24-də isə fotoqraflar kiçik materialların çəkilişini həyata keçirəcəklər. Bu mərhələdə çəkilmiş fotoşəkillərin bəziləri “National Geographic Azərbaycan” jurnalının müxtəlif saylarındakı məqalələrdə dərc olunmaq şansı qazanacaq.

Master-klassda iştirak etmək üçün aşağıdakı linkə daxil olaraq verilmiş formanı doldurmağınız yetərlidir.

Xatırladaq ki, yerlərin sayı məhdud olan təlimdə iştirak pulsuzdur.

Ölkə.Az