Vəzifəlilərin həbsi genişlənir: ən sərt tədbirlər görüləcək
Korrupsiyaya, rüşvətxorluğa, həmçinin məmurların öz vəzifə səlahiyyətlərini düzgün həyata keçirməyənlərə qarşı mübarizə cənab Prezidentin yürütdüyü daxili siyasətin əsas prioritetini təşkil edir.
Bunu “Ölkə.Az”a açıqlamasında deputat Cavid Osmanov deyib.
Onun sözlərinə görə, cənab Prezident İlham Əliyevin 2003-cü ildən Azərbaycana rəhbərlik etdiyi dövrdən etibarən ölkə hərtərəfli inkişafa nail olunub.
“Bununla belə ölkənin tərəqqisinə, inkişafına mane olan amillərə qarşı, xüsusən də korrpusiyaya, rüşvətxorluğa, eyni zamanda öz vəzifə səlahiyyətindən sui-istifadə edənlərə qarşı davamlı olaraq amansız mübarizə həyata keçirilib və bu proses davam etməkdədir”, - o qeyd edib.
Deputat əlavə edib ki, cənab Prezident hər zaman çıxışlarında məmurlara üzünü tutaraq üzərlərinə düşən məsuliyyəti düzgün dərk edib, xalqın xidmətçiləri olduğunu xatırladıb:
“Cənab Prezident onu da bəyan edib ki, vəzifə səlahiyyətinin öhdəsindən layiqincə gələ bilməyənlərə, onlara göstərilən etimadı doğrultmayanlara qarşı isə çox sərt, ağır cəza tədbiri görüləcək və onların qanunsuz əməlləri bağışlanılmayacaq. Ona görə də davamlı olaraq vəzifə səlahiyyətini öz şəxsi mənfəətləri naminə aşanlar cəzalandırılıb və qanunsuz əməllərinə görə hüquqi məsuliyyətə cəlb olunaraq ciddi şəkildə cəzalandırılıblar. Təəssüflər olsun ki, bir neçə məmurlar onlara göstərilən etimadı doğruldub, xalqın xidmətində, o cümlədən ölkənin tərəqqisi istiqamətində fəaliyyət göstərmək əvəzinə, yenə də öz şəxsi korporativ maraqlarını dövlət və xalqın mənafeyindən üstün tutub, qanunsuz hərəkətlərə yol verirlər. Lakin hüquq-mühafizə orqanları və aidiyyatı qurumlar belə qanunsuz hərəkətlərin qarşısını vaxtında alır. Elə son günlərdə həbs edilən vəzifəli şəxslərin saxlanılması və məsuliyyətə cəlb olunması bunun göstəricisidir. Saxlanılan şəxslərin də törətdikləri əməllər təsdiqini taparsa, onlara qarşı ən sərt cəza tədbirləri seçiləcək. Bu digərlərinə də dərs olmalıdır. Bilməlidirlər ki, onlar törətdikləri hər bir qanunsuz əməlin çox ağır bədəlini ödəməli olacaqlar”.
Qeyd edək ki, son günlər Baş prokuror yanında Korrupsiyaya qarşı Mübarizə Baş İdarəsi tərəfindən əməliyyatlar keçirilir və vəzifəsindən sui istifadə edən şəxslər saxlanılır.
Mürtəza
Ölkə.Az
