DİM-in dünənki imtahanları ilə bağlı narazılıqlar bitmir - AÇIQLAMA
Ötən gün keçirilən doktorantura və dissertantura səviyyəsində xarici dildən qəbul və fəlsəfə doktoru imtahanlarında iştirak edən bir qrup şəxs Dövlət İmtahan Mərkəzinin (DİM) qarşısında etiraz aksiyası keçirib.
Onlar bildiriblər ki, dörd il ərzində ingilis dili fənni tədris olunmasa da, imtahana salınıb.
Etirazçılar dövlət attestasiya komissiyasına müraciət edərək bu tələbin aradan qaldırılmasını istəyiblər.
Mövcud narazılıqlarla bağlı Ölkə.Az-a danışan təhsil eksperti Elçin Əfəndi müsabiqə şərtlərinin yüngülləşdirilməsi təklifi ilə çıxış edib:
“Dünən Dövlət İmtahan Mərkəzi tərəfindən doktorantura və dissertantura səviyyəsində xarici dildən qəbul və fəlsəfə doktoru imtahanları keçirildi. Hər iki imtahanla bağlı müəyyən problemlər vardı. Daha çox ingilis dilində dinləmə mətnləri, eyni zamanda ümumi dialoq mətnləri ilə bağlı poblem yaranmışdı və bu texniki xəta ilə bağlı imtahandan sonra çoxaylı müraciətlər oldu. Eyni zamanda bu gün həmin imtahan verən şəxslər DİM-ə yaxınlaşaraq mərkəzin idarə heyətin sədri Məleykə Abbaszadə ilə görüşdülər. Nəticə etibarilə texniki xətaya görə üzrxahlıq etdilər və imtahanın iyunun 16-da təkrar keçirilməsi təklif edildi. DİM yol verilmiş xətalarla bağlı kompromisə getdi və bu, müsbət addımdır.
Həmçinin oxu:DİM üzr istədi: İmtahan yenidən keçiriləcək
Ümumilikdə isə imtahanda qoyulan bariyerin bir qədər yumşaldılmasının tərəfdarıyam. Bu da daha çox Ali Attestasiya Komissiyası və DİM-in birgə razılığı əsasında müəyyənləşməlidir. Çünki ingilis dili üzrə qoyulan 30 bal bariyeri fikrimcə, bir qədər aşağı salınsa, daha məqsədəuyğun olr. Çünki doktorantura üzrə hazırlaşanlar narazılıq etməkdə haqlıdırlar. Onların ixtisaslarında ingilis dili tələbi olmadığı halda bundan imtahan verilməsi tələb olunur. Bu isə neçə ildir ümumi narazılıqla müşahidə olunur.
Düşünürəm ki, bu imtahanların daha səmərəli olması üçün ilk növbədə qarşıdakı dövr ərzində təkrar keçirilməsi və ya ümumiyyətlə yeni imtahanlarda sırf bu cür texniki xətalar olmasın deyə mütləq daha diqqətlə yanaşılmalıdır. Eyni zamanda namizədlərin etirazları olmasın deyə müsabiqə şərtləri bir qədər yüngülləşdiriməlidir. Müsabiqəyə buraxılış balı ingilis dilindən 2 və ya 5 baladək aşağı salınsa daha məqsədəuyğun olar”.
İmtahanda vətəndaşlara dəyən maddi ziyana gəldikdə isə ekspert bildirib ki, təkrar imtahan keçirilərsə, DİM bunu vətəndaşların xeyrinə həll edəcək:
“Bu halda onlardan təkrar ödəniş tələb olunmayacaq”.
Billurə Yunus
