"İŞİD-in Qafqazda müharibəyə başlamaq üçün qüvvəsi yoxdur"

İŞİD terrorçuları Çeçenistanda və  ümumilikdə Qafqaz regionunda yeni müharibəyə başlayacaqları ilə hədələyiblər.

İŞİD trrorçularının hədələrinin ölkəmiz üçün təhlükəli olub-olmadığını ilahiyyatçı alimlər Qamət Süleymanov və Şahin Həsənli Ölkə.az-a şərh etdilər.

Qamət Süleymanov: İŞİD özü pis vəziyyətdədir. Onların verdiyi bəyanatlar hamısı boş-boş çıxışlardır. Bu bəyanatları ciddi qəbul etmirəm. İŞİD hal-hazırda nə o səviyyədədir ki, hardasa müharibə aparsın, nə də o abı-hava hiss olunmur. İndiki halda onlar özlərini fikirləşməlidirlər, qaldı ki, Qafqaza gəlsinlər. Qafqazda nəsə baş verəcəyi inandırıcı deyil. Çeçenistanda nələrsə baş verdi, ona da imkan vermədilər. İŞİD-də elə bir qüvvə yoxdur ki, o nə isə etsin. O, qüvvə olsa belə ciddi bir şey olmayacaq.

Şahin Həsənli: O cəryanların hansısa bir ərazidə genişlənməsi üçün həmin ölkədə onların sosial bazasının güclü olması lazımdır. Azərbaycanda radikallığın ciddi bir sosial dəstəyi yoxdur. Azərbaycan xalqı radikallığı qəbul etmir. Bizim cəmiyyətdə ənənəvi məzhəblər daha güclüdür. Onların ciddi bir sosial dəstəyi olmadığına görə, bizim ölkəmizdə onların fəaliyyətinin genişlənəcəyinə inanmıram. O tip bəyanatlar vaxtaşırı səsləndirilir, bəzən də İŞİD-in imkanları olduğundan daha çox şişirdilir, özləri və bəzi media orqanları tərəfindən. Amma biz bilməliyik ki, İŞİD bütyün dünya üçün təhlükədir. Heç bir dövlət tam şəkildə bundan sığortalanmayıb. Hər halda onların Qafqazda və Azərbaycanda fəaliyyətlərinin genişləndirilməsi və hansısa dağıdıcı bir şey etmərini real hesab etmirəm.

Bu məsələdə siyasi amilləri də nəzərə almalıyıq. Qərb dövlətləri bu tip qruplaşmalardan digər dövlətləri zəiflətmək üçün istifadə edirlər. Suriyada da biz bunun nümunəsini gördük. İraqda da bundan istifadə etdilər, ancaq ABŞ sonradan İŞİD-ə qarşı tədbirlər gördü. Tədbirlər də o zaman gprüldü ki, kürdlərə qarşı təhlükə yaranmışdı. Rusiyaya təzyiq olaraq bu tip cəryanların Rusiya ərazisində dağıdıcı fəaliyyətlə məşğul olmasını istisna etmirəm. Çeçenistanda əvvəllər baş verən hadisələri sonradan gördük ki, bəzi qərb dövlətləri Rusiyaya təzyiq üçün o qruplaşmalardan istifadə edib. Əsasən zəifləmiş dövlətlərə qarşı bu tip qruplaşmalardan istifadə edə bilərlər. Rusiya haqda isə bunu demək olmaz. Rusiya hal-hazırda güclü bir dövlətdir.

Səxavət Məmməd

Ölkə.az