Bu qadağan olunmuş mal marketlərdə niyə açıq şəkildə satılır?

Çəkilmiş ətin market və qəssabxanalarda satışı artıq bir ildir ki, ölkədə qadağan edilib.

Azərbaycan Respublikası Kənd Təsərrüfatı Nazirliyi yanında Dövlət Baytarlıq Xidmətinin qərarı ilə mənşəyi məlum olmayan ət və ət məhsullarının ölkəyə gətirilməsi qadağan edilib.

Xatırladırıq ki, sümüksüz ətin qadağası ilə bağlı qərar hələ 2010-cu ildən verilib. Bu ilin əvvəlindən isə bu məsələ yenidən qərarlaşdırılıb. Yeni qərara əsasən sümüksüz və farş formasında olan ətlərin satışı qadağan edilib. Bu at və uzunqulaq ətlərinin dönərxanalarda, ictimai iaşə obyektlərində və restoranlarında satılması faktları ilə əlaqədar atılmış addımdır. Bu səbəbləri nəzərə alaraq Bakı Şəhər Baytarlıq İdarəsi tərəfindən müvafiq qərar verilib. Yeni qadağanın tətbiqində məqsəd alıcıları sağlam və keyfiyyətli ət məhsulları ilə təmin etməkdir. Əhali sümüksüz əti ət dükanlarından, mağazalardan tələb edə bilər. Yəni alıcının gözünün qabağında ət sümükdən təmizlənir və alıcıya təklif edilir.

Bu qərara baxmayaraq yenə də marketlərin soyuducularında, qəssab piştaxtalarında çəkilmiş ətin açıqdan-açığa satıldığının şahidi oluruq. Məsələyə aydınlıq gətirmək üçün şəhərin bir-neçə yerindəki müxtəlif market şəbəkələrinə aid supermarketlərdə araşdırma aparmaq qərarına gəldik.

Araşdırmalarımızı "Bolmart", "Favorit", "Səbət", "Neptun", "Sonti", "Makro", "Bizim Market", "Bazarstore"nin müxtəlif filiallarında apardıq. "Rahat" və "Araz" marketlərində də analoji halın şahidi olduq. Amma bu marketlərdən görüntü almağa araşdırmaçı qrupumuza imkan verilmədi.

Araşdırmalarımzın nəticəsində məlum oldu ki, demək olar ki, bütün iri supermarket şəbəkələrinin şöbələrindəki ət və ət məhsulları satılan bölmələrdə satışı qadağan olunmuş sümüksüz ət və farş açıq satışdadır. Həmin marketlərdən hazırladığımız fotoreportajı sizə təqdim edirik:

Ölkə.az-ın araşdırma qrupu