Milli Qəhrəmanın adı məktəbdən götürülüb

Müstəqillik qazanmış ölkəmizdə indiyə qədər 200-dən çox adam Milli Qəhrəman fəxri adına layiq görülüb. Minlərlə şəhid əsgərlərimiz, onlarla Milli Qəhrəmanların şücayəti sayəsində dövlətimiz statusu qoruna bilib. Vaxtilə Milli Qəhrəman Tahir Həsənovun adı əbədiləşdirilərək 23 saylı məktəbə verilibmiş. Amma məktəbin təmirindən sonra Milli Qəhrəmanın adının təhsil ocağından götürülməsi onun ailəsini çox məyus edib.

Qalibə Budaqova Milli Qəhrəman olan oğlunun adının 23 saylı məktəbdən götürülməsindən narahatdır. Tahir Həsənov 1992-ci ildə Ağdərədə gedən döyüşlərdə şəhid olub. Anasının müraciətilə Milli Qəhrəman Tahir Həsənovun adı ölümündən iki il sonra, yəni 1994-cü il sentyabr ayının ikisində Bakı Şəhər Deputatları Sovetinin Rəyasət Heyətinin qərarı ilə 23 saylı məktəbə verilib. Və lövhədə də bu, öz əksini tapıb. Daha sonra məktəbdə müəllim işləyən Milli Qəhrəmanın Anası Qalibə Budaqova həmin təhsil ocağına direktor təyin olunub. Onun rəhbərliyi dövründə həm şəhidin portreti, həm büstü, həm də şəxsi əşyalarından ibarət yaradılmış güşə elə Milli Qəhrəmana layiq şəkildə saxlanılıb. Qalibə xanım vəzifədən uzaqlaşdırıldıqdan sonra, hər şey tamamilə mənfiyə doğru dəyişməyə başlayıb.

İki il əvvəl sökülüb yenidən tikilən məktəbdə Milli Qəhrəmanın adına guşə bərpa olunub. Hətta, şəhid anasından ona məxsus bir sıra şəxsi əşyalar da istənilib. Qalibə xanım da bu işi qiymətləndirərək köməklik edib. Ancaq məktəbdən oğlunun adının götürülməsi ailəni məyus edib.

Məsələ ilə əlaqədar Təhsil Nazirliyinə müraciətimizə cavab olaraq bildirildi ki, şəhid adının əbədiləşdirilməsi və şəhid ailələrinə edilən güzəştlər haqqında "Azərbaycan Respublikası Qanununa əsasən, şəhid adlarının məktəblərə verilməsi Azərbaycan Respublikası Nazirlər Kabinetinin müvafiq qərarı ilə həyata keçirilir”. Şəhid adının əbədiləşdirilməsi məqsədilə Təhsil Nazirliyi Milli Qəhrəman Tahir Həsənovun adının 23 saylı məktəbə verilməsilə bağlı aidiyyatı qurumların qarşısında vəsatət qaldırıb.

Nazirlikdən onu da bildirdilər ki, yaxın 2-3 gün ərazində bu məsələ tam həllini tapacaq. (Ans Tv)

Ölkə.Az