Məktəblərdə uşaqlara nifrət aşılanır? - Nazirdən müzakirələrə reaksiya

"Aydın məsələdir ki, məktəblərdə istər tariximiz, istər vətən sevgisi aşılanmalıdır. Bu birmənalıdır. Uşaqlar düşmənlərini də tanımalıdırlar. Keçmişdə baş verən məsələlərdən də xəbərdar olmalıdırlar".

Ölkə.Az xəbər verir ki, bu sözləri elm və təhsil naziri Emin Əmrullayev deyib. Nazir məktəblərdə himn oxunduqdan sonra şagirdlərin xor şəklində "vətənə sədaqət, düşmənə nifrət, nifrət, nifrət" kimi şüarları səsləndirilməsi ilə bağlı danışarkən bu sözləri deyib:

"Uşaqlar başa düşməlidirlər ki, niyə, nə üçün və nə baş verir. Amma bunu kor-koranə şüarlarla  müşahidə edilməsi məncə, doğru deyil. Mən bir vətəndaş olaraq vətənə sevgini belə anlamıram. Vətənə sevgi nifrət şüarları qışqırmaqla yox, konstruktiv müzakirələr, məsələnin səbəbini anlamaqla ola bilər.

 Heç o şüarları səsləndirənlərin çoxu bunun mənasını başa düşmür. Məncə, azyaşlı uşaqlarda daha çox vətənə sevgi aşılanmalıdır.

Münaqişəyə bağlı bənzər başqa hallara da rast gəlinir və bu mövzuda uşaqlardan istifadə olunur. Biz dəfələrlə bildirmişik ki, bu məsələlər xoşagəlməzdir.Məktəbdə vətən sevgisi, vətənə sədaqət məsələsi öz əksini tapıb. Uşaqlarımız da, müəllimlərimiz də o məzmuna uyğun olaraq hərəkət etməlidirlər".

Billurə Yunus